TSHITUPA TSHIA 7
Tshivua Nzambi mulaye ku butuangaji bua baprofete
BAPROFETE ba kale bavua ne ditabuja kudi Nzambi. Bavua bitabuja milayi yende ne benza malu mu diumvuangana nayi. Mbualu kayi buvua mu milayi ayi?
Diakamue pavua Adama ne Eva batombokele Nzambi mu Edene, Nzambi wakalaya ne: neasungule muntu walua kuboza mutu wa “nyoka” udi tshimfuanyi tshia “dragon munene . . . nyoka wa kale au, udibu babikila ne: Diabolo ne Satana,” umubutula bua kashidi. (Genese 3:14, 15; Buakabuluibua 12:9, 12) Nnganyi uvua ne bua kulua au?
Bidimu bitue ku 2 000 Yehowa mumane kufila mulayi wa kumpala au, wakalaya muprofete Abalahama ne: Muntu uvua ne bua kulua au uvua ne bua kufumina mu ndelanganyi yende. Nzambi wakambila Abalahama ne: ‘Bisamba bionso bia pa buloba nebisanke bualu bua tunkanunuina tuebe, bualu bua wewe wakatumikila dîyi dianyi.’—Genese 22:18.
Mu tshidimu tshia 1473 kumpala kua Yezu, Nzambi wakambila muprofete Mose malu a bungi adi atangila “kankanunuina” aku. Mose wakambila bana ba Isalele ne: ‘Yehowa, Nzambi wenu, neanubishile muprofete munkatshi mua bana benu bu meme, nenumvue dîyi diende.’ (Dutelonome 18:15) Muprofete mufuane Mose uvua ne bua kufumina munkatshi mua bana ba Abalahama.
Muprofete au uvua ne bua kuikala kabidi wa mu ndelanganyi ya Mukalenge Davidi ne yeye muine uvua ne bua kulua mukalenge munene. Nzambi wakalaya Mukalenge Davidi ne: ‘Nensungule muana webe udi ulopoka munda muebe, nenjadike nkuasa wa bukalenge buende tshiendelele.’ (2 Samuele 7:12, 13) Nzambi wakaleja kabidi ne: nebabikile muana wa Davidi eu ne: ‘Mukalenge wa ditalala.’ Kuambaye kabidi ne: ‘Kuvudija kua bukokeshi buende ne kua ditalala kakuena kuikala ne nshikidilu, bua kujadika nkuasa wa bukokeshi wa Davidi, ne bukalenge buende, ne bua kubukolesha ku kulumbulula kuakane ne ku buakane, mpindieu too ne tshiendelele.’ (Yeshaya 9:6, 7) Eyowa, Mulombodi muakane au uvua ne bua kupingaja ditalala ne buakane pa buloba bujima. Kadi uvua ne bua kulua dîba kayi?
Muanjelu Gabaliele wakambila Danyele muprofete wa Nzambi ne: ‘Nunku umanye, ujingulule ne: Dîba diapatuka mukenji ne: bapingaje bantu mu Yelushalema ne base musoko tshiakabidi, too ne ku difika dia muntu muedibue manyi pa mutu, mukokeshi mene, mbingu muanda mutekete neyipite, pashishe mbingu makumi asambombo ne ibidi.’ (Danyele 9:25) Mbingu 69 ayi ivua mbingu ya bidimu, mbuena kuamba ne: lumingu luonso luvua ne bidimu 7. Yonso ivua yenza bidimu 483. Yakatuadija mu 455 kumpala kua Yezu, kujikayi mu 29 bikondo bietu.a
Masiya, muprofete mufuanangane ne Mose ne “kankanunuina” kindila uvuaku mulue mu 29 anyi? Tuanji kumona bualu ebu.
[Mêyi adi kuinshi]
a Bala mukanda wa Bible utu ulongesha tshinyi menemene? dibeji dia 197-199, mupatula kudi Bantemu ba Yehowa.
[Kazubu mu dibeji 19]
Mmunyi muwandamuna?
• Ntshinyi tshialua “kankanunuina” kalaya ka Abalahama kuenzela Satana?
• Ntshinyi tshivua Nzambi mulaye ku butuangaji bua Mose?
• Bakambila Davidi tshinyi bua “kankanunuina” aku?
• Muanjelu Gabaliele uvua muambile Danyele tshinyi?
[Bimfuanyi mu dibeji 18, 19]
“Kankanunuina” kalaya kavua ne bua . . . kufumina mu ndelanganyi ya Abalahama kuikala muprofete mufuane Mose kulua mu tshidimu tshia 29 bikondo bietu kufumina mu bana ba Davidi kuboza nyoka, Satana