Bulelela bua Bukalenge—Kufila biakudia bia mu nyuma

UDI umona disanka mu mêsu a mulongi webe wa Bible padiye upeta diumvuija dia mvese unudi nufuma ku dikonkonona nende. Udi ukuebeja ne lutulu ne: “Udi usua kuamba ne: Bible udi ulongesha ne: tudi mua kushala ne muoyo kashidi mu Mparadizu anu pa buloba apa anyi?” Muanetu unudi nende mu buambi udi utua mimuemue ne umuebeja ne: “Bible mmuambe tshinyi?” Bu mudibi bikemesha mulongi, udi ukupa mutu ne wamba ne: “Ndi nkema bua mumvua katshia tshiyi muanji kumanya bualu ebu.” Udi uvuluka ne: mbingu mikese kumpala, uvua muambe mêyi a muomumue pavuaye mulonge bua musangu wa kumpala ne: dîna dia Nzambi n’Yehowa.

Kutuku muanji kupeta bualu bua nunku anyi? Bikadi bifikile bantu ba Nzambi ba bungi. Malu makese adi mua kutuvuluija dipa dia mushinga didibu batupeshe, mmumue ne: dimanya dia bulelela. Anji elabi meji kakese: Mmunyi muuvua mufike ku dipeta dipa edi? Netuandamune lukonko elu mu tshitupa etshi. Mushindu udi bantu ba Nzambi bapete butoke mu nyuma ku kakese ku kakese, ntshijadiki tshinene tshia mudi Bukalenge bua Nzambi buikale bualu bulelela. Mu bule bua bidimu lukama, Yezu Kristo Mukalenge wabu mmutabalele bua bantu ba Nzambi balongeshibue bulelela.