Muntu uvuaku mua kuenza midimu mimpe dituku dia Nsabatu anyi?

Yezu mmuenze malu a bungi mu mudimu wende munene wa kuyisha mu Galela. Kadi, padi Yezu wamba ne: “Ndi kabidi ne bua kumanyisha lumu luimpe lua Bukalenge bua Nzambi kudi bimenga bikuabu,” udi welela bimenga bikuabu meji ki nganu tshia Galela to. Nunku, udi uya “wenda uyisha mu nsunagoga ya mu Yudaya.” (Luka 4:43, 44) Mbikumbane bua kuenzaye nunku bualu bavua mpindieu mu muvu wa luya ne tshibilu tshivuabu benzela mu Yelushalema tshikavua tshisemene pabuipi.

Patudi tufuanyikija malu atudi tubala bua mudimu wa diyisha udi Yezu muenze mu Galela, tudi tupeta mu Evanjeliyo malu makese a mudimu wa diyisha udiye muenze mu Yudaya. Nansha mudi bantu ba bungi mu Yudaya kabayi basue kuteleja Yezu, bualu ebu kabuena bumupangisha bua kuyisha bikole ne kuenza midimu mimpe muaba wonso udiye to.

Katupa kakese pashishe, Yezu wakaya mu Yelushalema, tshimenga tshinene tshia Yudaya, bua Pasaka wa mu 31. Pabuipi ne Tshiibi tshia Mikoko, muaba utu bantu ba bungi, kudi dijiba dia mâyi dinene dinyunguluka kudi mbalanda didibu babikila ne: Beteseda. Bantu ba bungi bavua basama, bampofu, ne balema bavua balua ku dijiba edi. Bua tshinyi? Bualu bantu bavua bitabuja ne: bantu badi mua kuondopibua pavuabu babuela mu dijiba edi padi mâyi avuanduluka.

Mpindieu ntshikondo tshia Nsabatu, Yezu udi umona muntu mukuabu ku dijiba edi uvua usama kukavua bidimu 38. Yezu udi umuebeja ne: “Udi musue kumvua bimpe anyi?” Muntu eu wakamuandamuna ne: “Mukalenge, tshiena ne muntu wa kungela mu dijiba dia mâyi padi mâyi avuanduluka, kadi pantshidi ngenda nya, muntu mukuabu udi upueka kumpala kuanyi.”​—Yone 5:6, 7.

Yezu wakamba bualu buvua ne bua kuikala bukemeshe muntu eu ne muntu mukuabu yonso uvua ubumvua, wamba ne: “Juka! Ambula tshiata tshiebe, enda.” (Yone 5:8) Ke tshivua muntu eu wenza menemene. Muntu eu uvua muondopibue diakamue, kuambulaye tshiata tshiende ne kutuadija kuenda!

Pamutu pa bena Yuda kusanka bua bualu buimpe buvua buenzeke, badi bamona muntu au ne bamulumbuluisha bamba ne: “Lelu ndia Nsabatu, ki mbianyishibue bua wewe kuambula tshiata to.” Muntu au udi ubandamuna ne: “Yeye muine uvua mungondope uvua mungambile ne: ‘Ambula tshiata tshiebe, enda.’” (Yone 5:10, 11) Bena Yuda abu bavua bamba muntu uvuabu bondope dia Nsabatu au mêyi avua kaayi mimpe to.

Badi bamuebeja bua kumanya bamba ne: “Mmuntu kayi uvua mukuambile ne: ‘Tshiambula, enda’?” Bua tshinyi badi bebeja muntu eu nunku? Bualu Yezu “mmuongoloke mubuele mu musumba wa bantu,” ne muntu uvuabu buondope eu kavua mumanye dîna dia Yezu to. (Yone 5:12, 13) Kadi muntu eu uvua ne bua kutuilangana kabidi ne Yezu. Muntu au uvua ulua kutuilangana ne Yezu mu ntempelo ne umanya muntu uvua mumuondope ku dijiba dia mâyi.

Muntu uvuabu bondope eu wakaya kudi bena Yuda bavua bamuebeje bua kumanya muvuaye mufike ku diumvua bimpe. Wakabambila ne: Yezu ke uvua mumuondope. Pavua bena Yuda bamanye bualu ebu, bakaya kudi Yezu. Bavuaku baya bua kumanya kuvua Yezu upetela bukokeshi bua kuenza malu a dikema a nunku anyi? Tòo. Kadi mbua kupisha Yezu bua muvuaye wenza malu mimpe dituku dia Nsabatu. Badi mene batuadija kumukengesha!