Badi banyema mukokeshi mubi

Jozefe udi ubisha Mariya ku tulu bua kumuambila lumu lua lukasa lukasa. Muanjelu wa Yehowa mmufume ku dimumuenekela mu tshilota umuambila ne: “Juka, angata muana ne mamuende nunyemene mu Ejipitu, nushalamu too ne pangakuambila dîyi, bualu Helode udi usua kukeba muana bua kumushipa.”​—Matayi 2:13.

Anu pine apu, Jozefe, Mariya, ne muanabu bakanyema butuku butuku. Bakanyema anu pa dîba, bualu Helode uvua mumvue ne: bena lubuku lua mitoto mbamushimakaje. Uvua mubambile bua bapingane bua kulua kumuandamuna. Kadi bobu bakumbuka mu tshimenga kabayi benze nanku to. Helode uvua ne tshiji wamba kudia muntu. Bu mutshivuaye ujinga bua kushipa Yezu, wakatuma dîyi bua bashipe bana ba balume bonso mu Beteleheme ne mu misoko ivua kumpenga kuende bavua ne bidimu bibidi kupueka. Mmuenze makumi bua kupeta bungi bua bidimu ebi bilondeshile tshikavua bena lubuku lua mitoto bavua balue bafumina ku Est bamuambile.

Dishipa bana ba balume bonso abu divua bualu bua kanyawu! Katuena mua kumanya bungi bua bana ba balume bavuabu bashipe to, kadi muadi wa kanyinganyinga ne kabobo ka muadi bia bakaji bavua bafuishe bidi bikumbaja mêyi a buprofete a mu Bible avuabu bambe kudi Yelemiya, muprofete wa Nzambi.​—Yelemiya 31:15.

Pine apu, Jozefe ne dîku diende bakavua banyemene mu Ejipitu ne ke mutshivuabu basombele. Pashishe, muanjelu wa Yehowa wakamuenekela kabidi Jozefe butuku mu tshilota. Kumuambilaye ne: “Juka, angata muana ne mamuende, nupingane mu buloba bua Isalele, bualu bavua bakeba muoyo wa muana bakadi bafue.” (Matayi 2:20) Nunku Jozefe wakamona mpindieu ne: dîku diende divua mua kupingana mu buloba buabu. Bualu ebu buvua bukumbaje mêyi makuabu a buprofete a mu Bible: Badi babikila muana wa Nzambi bua kupatuka mu Ejipitu.​—Hoshea 11:1.

Bidi bimueneka ne: Jozefe uvua ne meji a ne: dîku diende disombele mu Yudaya, pamuapa pabuipi ne tshimenga tshia Beteleheme, muaba uvuabu basombele kumpala kua kunyemenabu mu Ejipitu. Kadi wakumvua ne: Âkelao, muana wa Helode, uvua muntu mubi ke ukavua mukalenge mu Yudaya. Nzambi wakadimuija Jozefe bua njiwu ayi mu tshilota tshikuabu. Ke Jozefe ne dîku diende kuenza luendu lule batangile ku nord, kusombelabu mu tshimenga tshia Nazaleta mu buloba bua Galela, kule ne muaba uvua bena Yuda bapuila bua kutendelela. Yezu wakakolela muaba au bua kukumbaja mêyi makuabu a buprofete aa: “Nebamubikile ne: muena Nazaleta.”​—Matayi 2:23.