Kônelio udi upeta nyuma muimpe

Mu Kaisalia muvua mfumu munene kampanda wa basalayi ba bena Lomo diende Kônelio. Nansha muvuaye kayi muena Yuda, bena Yuda bavua bamunemeka. Uvua wambuluisha ne muoyo mujima bapele ne bantu bavua bakenga. Kônelio wakitaba Yehowa ne uvua umusambila misangu yonso. Dimue dituku, muanjelu wakamuenekela Kônelio, kumuambilaye ne: ‘Nzambi mmumvue masambila ebe. Mpindieu tuma bantu mu tshimenga tshia Yopa mudi Petelo musombele, bamuambile alue kuudi.’ Diakamue Kônelio wakatuma bantu balume basatu ku Yopa, ntanta wa kilometre mitue ku 50 ku sud.

Tshikondo atshi mu Yopa, Petelo wakamona tshikena kumona. Wakamona nyama ivuabu kabayi banyishile bena Yuda bua kudia, kumvuaye dîyi dimuambila bua kuyidia. Petelo wakabenga wamba ne: ‘Kadi tshitu muanji kudia nyama udi kayi mukumbane to.’ Pashishe dîyi adi kumuambila ne: ‘Kuambi ne: nyama eyi ki mmikumbane to. Nzambi mmuyivuije mikumbane.’ Ke dîyi adi kuambiladi kabidi Petelo ne: ‘Ku tshiibi tshiebe kudi bantu basatu. Ndaku nabu.’ Petelo wakaya ku tshiibi, kuebejaye bantu abu tshivuabu balue kukeba. Bakamuandamuna ne: ‘Kônelio mfumu wa basalayi ba bena Lomo mmututume bua tuye nebe kuende ku Kaisalia.’ Petelo wakalomba bantu abu bua kulala kuende bu benyi bende. Dituku diakalonda wakaya nabu ku Kaisalia pamue ne bena Kristo bakuabu ba mu Yopa.

Ndekelu wa bionso pavua Kônelio mumone Petelo wakatua binu. Kadi Petelo wakamuambila ne: ‘Juka! Ndi muntu anu bu wewe. Nzambi mmungambile bua kulua kuebe nansha mutu bena Yuda kabayi badiata ku nzubu ya bantu ba bisamba bikuabu. Mpindieu ngambila koku tshiudi mumbikidile.’

Ke Kônelio kuambila Petelo ne: ‘Kukadi matuku anayi andi nsambila Nzambi, ne muanjelu wende mmungambile bua kukubikidisha. Tulongeshaku mêyi a Yehowa.’ Petelo kuamba ne: ‘Ndi mmona ne: Nzambi kena ne kansungansunga to. Udi witaba muntu yonso udi musue kumutendelela.’ Ke Petelo kubalongesha malu a Yezu a bungi. Pashishe Kônelio ne bantu bavua nende bakapeta nyuma muimpe, ne bonso buabu bakabatijibua.