Yezu udi wendela pa mâyi

Yezu kavua anu wondopa babedi ne ubisha bantu ku lufu to, uvua kabidi utumina tshipepele ne mvula dîyi. Yeye mumane kusambila ku mukuna, wakatangila ku Mbuu wa Galela, kumonaye ne: kuvua tshipepele tshikole. Bapostolo bende bavua mu buatu, benda baluangana ne tshipepele atshi. Yezu wakapueka, kutuadijaye kuendela pa mâyi mutangile kuvua buatu buvua ne bapostolo. Pavua bapostolo bamone muntu wendela pa mâyi, bakumvua buôwa bua bungi. Kadi Yezu wakabambila ne: ‘Mmeme. Kanutshinyi to.’

Petelo wakamba ne: ‘Mukalenge, pikalabi ne: nguewe menemene, ntumina dîyi bua ndue kuudi aku.’ Ke Yezu kuambila Petelo ne: ‘Luaku.’ Nunku Petelo wakatuluka mu buatu munkatshi mua tshipepele tshikole atshi, kuendelaye pa mâyi mutangile kuvua Yezu. Kadi pakafika Petelo pabuipi nende, wakatangila tshipepele tshikole atshi, kumvuaye buôwa. Wakadiumvua wenda udina mu mâyi. Petelo wakela dîyi ne: ‘Mukalenge, nsungila!’ Yezu wakamukuata ku tshianza wamba ne: ‘Bua tshinyi uvua mutuadije kuelakana? Ditabuja diebe didi kuepi?’

Yezu ne Petelo bakabanda mu buatu, diakamue tshipepele tshikole atshi kutalalatshi. Tetabi kumona mu lungenyi muvua bapostolo mua kuikala badiumvue! Bakamuambila ne: “Wewe udi bushuwa Muana wa Nzambi.”

Yezu kavua mutumine tshipepele dîyi anu musangu umue au to. Musangu mukuabu kabidi pavua Yezu ne bapostolo bende mu buatu batangile dia muamua dia mbuu, Yezu wakaya kulala ku tshitaku tshia buatu. Pavuaye mulale apu, tshipepele tshikole menemene tshiakajuka. Mavuala avua adituta ku buatu, mâyi kuwulawu mu buatu. Bapostolo bakajula Yezu, bela mbila ne: ‘Mulongeshi, tudi tuamba kufua! Tuambuluisha koku!’ Yezu wakajuka, kuambilaye mbuu ne: “Puwa!” Diakamue tshipepele ne mbuu biakatalala. Ke Yezu kuebeja bapostolo bende ne: ‘Ditabuja dienu didi kuepi?’ Bobu kuambilangana ne: “Badi bamutumikila too ne kudi tshipepele ne mbuu!” Bapostolo bakapeta dilongesha edi: bobu beyemena Yezu ne muoyo mujima, kabavua mua kutshina tshintu to.