Mua wewe kumvua buimpe bua malu adi mu Bible

Ukadiku mumvue buôwa bua kutuadija mudimu kampanda munene anyi? Bua kuvuija mudimu wa nanku mupepele, bivua pamuapa mua kukulomba bua kuwutapulula mu tutupa tukese tukese tua tumidimu tupepele tua kuenza. Ke mudibi kabidi bua dibala dia Bible. Udi mufuane kudiebeja ne: ‘Nembangile penyi ne dibala dia Bible?’ Mu dilongesha edi, netumone malu makese audi mua kuenza akuambuluisha bua kubala Bible ne kumulonga ne disanka.

1. Bua tshinyi mbimpe tuikale tubala Bible pa tshibidilu?

Muntu udi ubala Bible anyi “mikenji ya Yehowa” pa tshibidilu udi upeta disanka, ne malu ende adi enda bimpe. (Balayi Misambu 1:1-3.) Bua kutuadija, dienzeja bua wikale umubala mu minite mikese tshianana dituku dionso. Dîba adi, paudi wenda wibidilangana ne Dîyi dia Nzambi kakese kakese, neubange kumvua dikusankisha kabidi bua kudibala bikole.

2. Ntshinyi tshiudi mua kuenza bua dibala diebe dia Bible dikuambuluishe?

Bua dibala dia Bible kukuambuluishadi menemene, bidi bikengela wikale wanji kudimanyika kakese bua kuelangana meji a biudi ubala. Mbimpe kubibala, ne ‘kuelelangana kabidi meji’ abi. (Yoshua 1:8, dimanyisha) Paudi ubala Bible, ikala udiela nkonko, bu mudi: ‘Mvese eu udi undongesha tshinyi bua Yehowa Nzambi? Mmushindu kayi undi meme mua kumutumikila? Mmunyi mundi mua kuambuluisha bakuabu ne mvese eu?’

3. Udi mua kuenza tshinyi bua kupeta dîba dia kubala Bible?

Udi ne lutatu lua kupeta dîba dia kubala Bible anyi? Ke mudibi kabidi bua bantu ba bungi. Nanku, tetabi ‘kuenza malu bimpe bitambe ne dîba diebe.’ (Efeso 5:16) Udi mua kuenza nanku pa kudikosela dîba disunguluke dia kuikala kubala Bible dituku dionso. Bamue mbaditekele bua kubala Bible pa dindadinda. Bakuabu bobu mbateke bua kumubala mu munya, pamuapa dîba diabu dia kudia. Banga pabu badi bamubala dilolo kumpala kua kulala. Ndîba kayi diudi wewe umona ne: ndikukumbanyine?

BUELA MU BUONDOKE

4. Keba mua kunanga dibala dia Bible

Kabitu anu pamuapa bipepele bua kutuadija kubala Bible to. Nansha nanku, tudi mua kudijula “dijinga dikole” dia kumubala, anu mutu muntu wenda unanga biakudia bivuaye kayi udia kuonso eku padiye ubilabula njila ya bungi. Balayi 1 Petelo 2:2, pashishe nuandamune lukonko elu:

• Wewe ubala Bible dituku dionso, nebikusankishe bua kumvua mua kutungunuka ne kumubala anyi kabiakukusankisha?

Tangilayi FILME bua kumona muvua bantu kampanda bafike ku dinanga dibala dia Bible. Pashishe nuandamune nkonko idi ilonda.

FILME: Bansonga badi balonga mua kunanga Dîyi dia Nzambi (5:33)

• Mu filme eu, nntatu kayi ivua bansonga abu batantamene?

• Ntshinyi tshivua tshibambuluishe bua kulamata anu ku tshipatshila tshiabu tshia kubala Bible?

• Mmushindu kayi uvuabu bavuije dibala diabu dia Bible bualu bua disanka?

Mibelu ya mua wewe kutuadija:

• Sungula nkudimuinu wa Bible mujalame udi ne ngakuilu wa matuku etu aa. Udi mua kuangata nansha Nkudimuinu wa bulongolodi bupiabupia bikalaye mu muakulu wenu.

• Tuadijila kubala miaba idi malu atu akusankisha bikole. Bua kumanya mua kuenza nanku, ndaku mu “Keba mua kutuadija kubala Bible.”

• Leja muaba uukadi mubale. Ela kamanyinu mu dibeji dia “Leja muaba uukadi mu dibala dia Bible” didi mu mukanda eu.

• Ikala ubuela mu JW Library^®. Programe eu udi mua kukuambuluisha bua kubala Bible nansha kutelejamu dibala dia Bible muaba wonso uudi ne kamu kebe ka kufita minu anyi tshiamu tshikuabu.

• Ikala ubala Bisakidila bia mu Nkudimuinu wa bulongolodi bupiabupia. Muomu amu mudi tuarte, bimfuanyi, ne diumvuija dia miaku ya mu Bible bidi mua kuvuija kabidi dibala diebe bualu bua disanka dia bungi.

5. Ikala ulongolola dilonga diebe dia Bible

Balayi Misambu 119:34, pashishe nuandamune lukonko elu:

• Bua tshinyi mbimpe kusambila kumpala kua wewe kutuadija kubala Bible anyi kulongolola dilonga diebe dia Bible?

Ntshinyi tshiudi mua kuenza bua kumvua buimpe menemene bua dilonga dionso? Paudi ulongolola dilongesha dionso dia mu mukanda eu, ikala wenza malu adi alonda aa:

1. Bala bikoso bia mu dibeji dia mbangilu wa dilongesha.

2. Keba mvese idimu, uyibale. Teta kumvua dipetangana dia mvese ayi ne malu adi mu bikoso abi.

3. Ela kashonyi muinshi mua miaku anyi biambilu binene bidi ne diandamuna dia lukonko luonso; nebikuambuluishe panualua kutata dilongesha adi ne mulongeshi webe.

Udi mumanye anyi?

Bantemu ba Yehowa bakadi benzenze mudimu ne nkudimuinu mishilashilangane ya Bible. Kadi tudi nangananga banange Bible​—Nkudimuinu wa bulongolodi bupiabupia bua bujalame buende, bua mudiye ne malu matokesha bimpe, ne mudiye kabidi ne dîna dia Nzambi.​—Tangila tshiena-bualu tshia mu jw.org tshia “Bantemu ba Yehowa batu ne wabu bobu Bible anyi?”

TSHIA KUKUATA

Bua wewe kumvua buimpe menemene bua malu a mu Bible, ditekela dîba dia kuikala kumubala, ikala usambila bua kumvua biudi ubala, ne wikale udianjila kulongolola dilonga dionso.

Diambulula

• Ntshinyi tshiakuambuluisha bua kumvua buimpe menemene bua malu a mu Bible?

• Ndîba kayi diudi wewe mua kuditekela bua kuikala kubala Bible ne kudilongelaye?

• Bua tshinyi mbimpe kulongolola dilonga dia Bible kumpala kua kulonga ne mulongeshi?

BIA KUTANGILA KABIDI

Mona ngenyi yakuambuluisha bua kumvua buimpe bua malu audi ubala mu Bible.

“Mua kumanya malu a bungi mu dibala diebe dia Bible” (Tshibumba tshia Nsentedi No. 1 2017)

Mona mishindu 3 ya mua kubala Bible.

“Mmushindu kayi udi Bible mua kungambuluisha?​—Tshitupa tshia 1: Tambakana mu Bible webe” (Tshiena-bualu tshia mu jw.org)

Mona mudi kubala kua Bible mua kukusankisha.

“Mmushindu kayi udi Bible mua kungambuluisha?​—Tshitupa 2: Vuija dibala diebe dia Bible bualu bua disanka” (Tshiena-bualu tshia mu jw.org)

Mona mayele a bakadi babalabale Bible bidimu bia bungi.

Mua kudilongela bimpe (2:06)