Yezu ke Nzambi wa Bukole Buonso anyi?

Mutu ba bungi bandamuna:

▪ “Eyowa, Yezu ke Nzambi wa Bukole Buonso.”

▪ “Yezu nNzambi uvua mulue kumueneka mu mubidi.”

Kadi Yezu pende wakamba tshinyi?

▪ “Bu nuenu bansue, nuakadi kusanka, bualu bua meme ndi nya kudi Tatu, bua Tatu udi muntambe meme.” (Yone 14:28) Yezu wakamba ne: kena diatshimue ne Tatuende to.

▪ “Ndi nya kulu kudi Tatu wanyi ne Tatu wenu, kudi Nzambi wanyi ne Nzambi wenu.” (Yone 20:17) Yezu kavua udiamba ne: yeye ke Nzambi to, kadi uvua utela Nzambi bu muntu mukuabu pa bule.

▪ ‘Tshiena ndiambila nkayanyi; Tatu wakantuma wakampa mukenji wa malu angamba ne bu mungaamba.’ (Yone 12:49) Malu avua Yezu ulongesha kaavua afuma mu mutu muende to, kadi avua afuma kudi Tatuende.

YEZU uvua wamba muvuaye Muana wa Nzambi, kavua udiangata bu Nzambi wa Bukole Buonso to. Bu Yezu yeye Nzambi, nnganyi uvuaye ulomba mu masambila pavuaye pa buloba? (Matayo 14:23; 26:26-29) Yezu kavua udingidija patupu bu uvua wakula ne muntu mukuabu to, ki mmuomu anyi?

Pavua bayidi ba Yezu babidi balue kumulomba miaba minene mu Bukalenge buende, wakabandamuna ne: ‘Kushikama ku tshianza tshianyi tshia balume ne ku tshianza tshianyi tshia bakaji ki mbualu buanyi bua kupa muntu; kushikama nunku kudi bualu bua bantu bakabulongoluelabu kudi Tatu wanyi.’ (Matayo 20:23) Yezu uvua mubadinge pavuaye mubambile ne: kavua ne bukokeshi bua kubakumbajila dilomba diabu anyi? Too, s’uvua muambe bulelela! Uvua muitabe ne bupuekele buonso ne: anu Nzambi nkayende ke udi ne bukole bua kuangata dipangadika dia mushindu au. Kabidi Yezu muine wakaleja muvuaku malu makuabu avuaye yeye nansha banjelu kabayi bamanye, kadi anu Tatuende nkayende muamanye.​—Mâko 13:32.

Yezu uvua kuinshi kua Nzambi anu pavuaye pa buloba apa anyi? Too. Bible udi uleja mudi Yezu mushadile kudi Nzambi nansha panyima pa lufu luende ne pa kubishibua kuende. Mupostolo Paulo udi utuvuluija ne: Nzambi ‘udi ku mutu kua Kristo.’ (1 Kolinto 11:3, MMM) Bible udi wamba ne: mu matuku adi kumpala eku ‘patekabu bintu bionso muinshi muende, pashishe, Muana muine kabidi neatekibue muinshi mua Tatu wakateka bintu bionso muinshi muende, bua Nzambi kuikala ku mutu kua bionso ne mu bintu bionso.’​—1 Kolinto 15:28.

Mbitoke bimpe ne: Yezu ki nNzambi wa Bukole Buonso to. Ke bua tshinyi uvua ubikila Tatuende ne: “Nzambi wanyi.”​—Buakabuluibua 3:2, 12; 2 Kolinto 1:3, 4.a

[Mêyi adi kuinshi]

[Lungenyi lunene lua mu dibeji 7]

Yezu wakamba muvuaku malu makuabu avuaye yeye nansha banjelu kabayi bamanye, avua anu Tatuende nkayende mumanye