Yezu Kristo nnganyi?

Yezu Kristo nnganyi?

Bishilangane ne bantu bakuabu, Yezu Kristo uvua mu diulu ne mubidi wa mu nyuma kumpala kua kuluaye pa buloba. (Yone 8:23) Yeye ke muan’a bute wa bifukibue bionso bia Nzambi ne uvua mumuambuluishe bua kufuka bintu bikuabu bionso. Yeye ke uvua Yehowa nkayende mudifukile. Ke bualu kayi badi bamubikila ne: ‘Muana umuepele mulela’ wa Nzambi. Yezu uvua wenze mudimu bu Muleji-mpala wa Nzambi, ke bualu kayi mbamubikile ne: ‘Dîyi.’​—Yone 1:1-3, 14; bala Nsumuinu 8:22, 23, 30; Kolosai 1:15, 16.

Tshivua Yezu muluile pa buloba ntshinyi?

Nzambi wakatuma Yezu pa buloba pa kumbusha muoyo wende mu diulu ne kuwelaye mu difu dia Mariya, nsongakaji muena Yuda utshivua kamama. Nanku, Yezu kavua ne tatuende wa pa buloba to. (Luka 1:30-35) Yezu wakalua pa buloba bua: (1) kutulongesha bulelela bua Nzambi, (2) kutushile tshilejilu bua tuetu kuenza disua dia Nzambi ne (3) kufila muoyo wende uvua kauyi bubi bua ‘kutupikula.’​—Bala Matayo 20:28; Yone 18:37.

Bua tshinyi tudi dijinga ne tshia-bupikudi?

Tshia-bupikudi mmushinga udibu bafuta bua kulekesha muntu udibu bakuate. Nzambi kavua mufuke bantu bua bikale bafua ne bakulakaja to. Bua tshinyi tudi tuamba nanku? Nzambi wakambila Adama, muntu wa kumpala ne: bu yeye mua kuenza tshidi Bible ubikila ne: bubi, uvua ne bua kufua. Bu Adama kayi muenze bubi, kavua ufua to. Nansha muvua Adama mulale nkama ya bidimu, ku mêsu kua Nzambi wakafua mu dituku divuaye mumutombokele adi. (Genese 2:16, 17; 5:5) Adama wakasambulujila ndelanganyi yende yonso bubi ne lufu. Nunku, lufu “luakafika” kudi bantu bonso lufumine kudi Adama. Ke bualu kayi tudi dijinga ne tshia-bupikudi.​—Bala Lomo 5:12; 6:23.

Yezu wakafua bua tshinyi?

Nnganyi uvua mua kutupikula ku lufu? Padi muntu ufua, udi ufuta tshibawu tshia mibi yende yeye nkayende. Kakuena muntu muena mapanga udi mua kufila tshintu bua kupikula natshi mibi ya bakuabu to.​—Bala Musambu 49:7-9.

Bu muvua Yezu kayi mupiane bubi bua kudi tatu wa pa buloba, wakafua, ki mbua mibi yende yeye to, kadi bua mibi ya bantu bakuabu. Nzambi wakatuma Muanende bua atufuile bua kuleja ne: mmunange bantu bikole. Yezu wakaleja pende muvuaye mutunange pavuaye utumikile Tatuende ne pakafilaye muoyo wende bua mibi yetu.​—Bala Yone 3:16; Lomo 5:18, 19.

Yezu udi wenza tshinyi mpindieu?

Pavua Yezu muondope babedi, mubishe bafue ne mufile muoyo wende bua kutupikula ku bubi ne ku lufu, uvua mudianjile kuleja malu enzelaye bantu bonso badi batumikila mikenji ya Nzambi. (Luka 18:35-42; Yone 5:28, 29) Yezu mumane kufua, Nzambi wakamubisha ku lufu ne mubidi wa mu nyuma. (1 Petelo 3:18) Yezu kuanji kusombaye ku dia balume dia Nzambi too ne pavua Yehowa ne bua kumupesha bukokeshi bua kuikalaye Mukalenge pa buloba bujima. (Ebelu 10:12, 13) Mpindieu, Yezu udi ukokesha mu diulu. Bayidi bende badi benda bayisha lumu luimpe pa buloba bujima.​—Bala Danyele 7:13, 14; Matayo 24:14.

Bu mukadi Yezu Mukalenge, ukadi pa kuenza mudimu ne bukokeshi buende bua kujikija makenga ne kubutula badi baakebesha. Bantu miliyo ne miliyo badi baleja mudibu bitabuje Yezu ne bamutumikila nebapete muoyo mu mparadizu pa buloba.​—Bala Musambu 37:9-11.