MANDAMUNA A NKONKO YA MU BIBLE
Dîna dia Nzambi nnganyi?
Muntu yonso wa mu dîku dietu udi ne diende dîna. Nansha nyama idi payi ne mêna. Kabiena bimuenekaku patoke ne: Nzambi udi pende ne dîna anyi? Nzambi udi ne mianzu ya bungi mu Bible, bu mudi: Nzambi wa Bukole buonso, Mukalenge wa diulu ne buloba ne Mufuki, kadi udi kabidi ne dîna disunguluke.—Bala Yeshaya 42:8.
Nkudimuinu ya Bible ya bungi idi ne dîna dia Nzambi mu Musambu wa 83:18. Tshilejilu mu Mukanda wa Nzambi, mvese eu mmukudimuna ne: ‘wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’
Bua tshinyi tudi ne bua kutela dîna dia Nzambi?
Patutu tuyukila ne bantu batudi banange tshilejilu bu mudi balunda betu ba pa muoyo, tutu tubabikila mu mêna abu
Yehowa mmusue ne: tuikale tumubikila mu dîna diende. Patutu tuyukila ne bantu batudi banange, tshilejilu bu mudi balunda betu ba pa muoyo, tutu tubabikila mu mêna abu, nangananga padibu batulomba bua kubabikila mu mêna au. Katuenaku ne bua kuenza bia muomumue patudi tuyukila ne Nzambi anyi? Nansha Yezu Kristo kabidi wakakankamija bantu bua kuikala kubikila Nzambi mu dîna diende.—Bala Matayi 6:9; Yone 17:26.
Kadi, bua kuikala mulunda wa Nzambi tudi ne bua kumanya malu a bungi adi amutangila. Tshilejilu, Nzambi utu mushindu kayi? Kudiku mushindu wakusemena pabuipi nende anyi? Udi mua kupeta mandamuna a nkonko eyi mu Bible.