Bua tshinyi bantu badi bamba ne: Nzambi mmuena tshikisu?

UDIKU umona ne: tshiena-bualu tshidi pa mutu pa tshizubu tshia tshibejibeji etshi tshidi tshitonda anyi? Ke mudi bantu bakuabu bamba, kadi bantu ba bungi badi badiebeja lelu eu bua kumanya bikala Nzambi ne tshikisu. Bakuabu badi bitaba ne: udi natshi. Bua tshinyi?

Bamue bantu bavua bapande ku bikumina batu badiebeja ne: “Bua tshinyi Nzambi mmulekele malu a mushindu eu enzeka? Kena utabalela bantu anyi? Udi ne tshikisu anyi?”

Bakuabu pabu bidi bibatonda mu mushindu wa muomumue padibu babala babala Bible. Padibu babala muyuki bu mudi wa Nowa ne wa Mvula wa kabutu, badi badiebeja ne: ‘Bua tshinyi Nzambi wa dinanga uvua mushipe bantu bonso abu? Mmuena tshikisu anyi?’

Ukadiku pebe imue misangu mudiele nkonko ya buena eyi anyi? Peshi bituku bikukolele bua kuandamuna bantu badi bamba mudi Nzambi mmuena tshikisu anyi? Bikalabi nanku anyi kabiyi nanku, tukonkonone lukonko lukuabu ludi mua kukuambuluisha.

BUA TSHINYI TUDI TUKINA MALU A TSHIKISU?

Mu tshikoso, tudi tukina malu a tshikisu bualu tudi ne dimanya dia malu mimpe ne malu mabi. Mu bualu ebu, tudi bashilangane bikole ne nyama. Mufuki wetu uvua mutufuke ‘mu tshimfuanyikiji tshiende.’ (Genese 1:27) Bidi bisua kumvuija tshinyi? Uvua mutupeshe bukole bua kuleja ngikadilu yende ne kutumikila mikenji yende ne kuikala ne mmuenenu wende wa tshidi tshimpe ne tshidi tshibi. Tuangate tshilejilu etshi: bikalabi ne: Nzambi ngudi muenze bua tuikale ne mmuenenu wa tshidi tshimpe ne tshidi tshibi ne tutu tukina malu mabi, kabienaku bileja ne: Nzambi udiku pende ukina malu mabi anyi?

Bible udi ujadika bualu ebu bualu Nzambi udi utuambila mu Bible ne: ‘Njila yanyi idi ipita njila yenu kuikala muulu, ne meji anyi adi apita meji enu kuikala muulu.’ (Yeshaya 55:9) Tuetu tuamba mudi Nzambi ne tshikisu, katuenaku tubenga tshidi Bible wamba ne: njila yende mmipite yetu kule ne kule anyi? Mu bulelela, bidi bikengela kumanya malu a bungi kumpala kua kuitaba mmuenenu eu. Imue misangu tudi mua kudiebeja ne: bikala Nzambi kayi ne tshikisu, bua tshinyi amue malu adiye wenza adi aleja mudiye ne tshikisu? Bua kumvua bualu ebu bimpe, tukonkononayi tshidi “tshikisu” tshiumvuija mu bulelela.

Tuetu tuamba ne: muntu kampanda udi ne tshikisu, mumue ne: tudi tumumona ne meji mabi. Muena tshikisu mmuntu udi usanka padiye umona bakuabu bakenga anyi udi kayi ubatabalela padibu mu dikenga. Nunku, tatu udi unyoka muanende anu bua kumukengesha patupu, mmuena tshikisu. Kadi tatu udi unyoka muanende bua kumulombola ne kumukuba, ntatu muimpe. Bu mutudi katuyi anu mua kumanya tshidi bakuabu benzela bualu kampanda, mbipepele bua kubenga kubumvue bimpe.

Tukonkononayi malu abidi adi asaka bamue bantu bua kuela meji ne: Nzambi mmuena tshikisu. Malu au ngowu aa: bikumina bidi bienzeka lelu ne malu atudi tubala mu Bible bua manyoka a Nzambi. Kudiku bijadiki bilelela bidi bileja ne: Nzambi mmuena tshikisu anyi?