Bikumina bidiku bileja ne: Nzambi mmuena tshikisu anyi?

UDI MUA KUMVUA BANTU BAMBA NE: “Bu mudi Nzambi mukokeshi wa buloba ebu, nunku yeye ke udi ukebesha bikumina; ke bua tshinyi tudi tuamba ne: mmuena tshikisu.”

TSHIDI BIBLE WAMBA: “Ba pa buloba bonso badi ku bukokeshi bua mubi.” (1 Yone 5:19) “Mubi” eu nnganyi? Bible udi uleja ne: mubi eu n’Satana. (Matayi 13:19; Mâko 4:15) Ndishima anyi? Alabi meji bua bualu ebu: bikala Satana mukokeshi wa buloba ebu, ne usesuisha bantu bua kuikala badinangi, bena lukuka ne kabayi bamona kule anu bu yeye; kabienaku bituambuluisha bua kumvua bua tshinyi bantu badi banyanga buloba anyi? Bamanyi ba bungi badi baleja ne: mushindu udi bantu banyanga buloba udi mua kuikala pawu ne buenzeji ku bikumina, pamuapa babikebesha, banyanga buloba bikole anyi bateka nsombelu wa bantu mu njiwu.

Kadi bua tshinyi Nzambi mmulekele Satana wenzeja malu a mushindu eu? Tshilumbu etshi tshiakatuadija tshikondo tshivua baledi betu ba kumpala batombokele bulombodi bua Nzambi. Bantu ba bungi badi balonda njila wa muomumue too ne lelu. Bualu buvuabu benze bua kubenga bulombodi bua Nzambi ebu, mbuenze bua ne: buloba buikale mu bianza bia Satana muena lukuna wa Nzambi. Ke bua tshinyi Yezu wakabikila Satana ne: “Mukokeshi wa buloba ebu.” (Yone 14:30) Satana neakokeshe kashidi ne tshiendelele anyi? Tòo!

Yehowaa kena usanka bua ntatu idi Satana ukebela bantu to. Mu bulelela, Nzambi utu unyingalala bikole padi bantu bakenga. Tshilejilu, pavua bena Isalele mu tshikondo tshikole tshia ntatu, Bible udi wamba bua Nzambi ne: ‘Mu makenga abu onso yeye wakumvua dikenga.’ (Yeshaya 63:9) Diakalenga, Nzambi mmulongolole bua kumbusha bukokeshi bua tshikisu bua Satana mu katupa kîpi emu! Mmusungule Muanende Yezu Kristo bua kuikalaye Mukalenge muakane bua kashidi ne tshiendelele.

MUDI TSHILUMBU ETSHI TSHIKUTANGILA: Nansha mudi bukokeshi bua Satana bupangile bua kukuba bantu ku bikumina, kadi bukokeshi bua Yezu bobu nebukube bantu. Dimue dituku Yezu wakakuba bayidi bende ku tshipepele tshikole. Bible udi wamba ne: Yeye “kukanyina tshipepele, kuambilaye mbuu ne: ‘Shii! Puwa!’ Tshipepele tshiakabatama, ditalala dia dikema kubueladi.” Bayidi bende kuambabu ne: “Eu mmuntu kayi eu udibu batumikila too ne kudi tshipepele ne mbuu?” (Mâko 4:37-41) Bualu ebu budi butujadikila ne: Yezu neakube bantu bonso badi batumikila Nzambi mu tshikondo tshikalaye mua kukokesha bu Mukalenge.​—Danyele 7:13, 14.