Ntshinyi tshidi Bible wamba bua bipupu?

Diandamuna dia mu Bible

Nzambi katu ukebesha bipupu bidi bienzeka lelu eu to, kadi udi uditatshisha bua bantu badi bipupu ebi bikuata. Bipupu mbimue bia ku malu adi akebesha ntatu, yalua Bukalenge bua Nzambi kujikija. Mu tshikondo etshi, Nzambi udi usamba badi bipupu bikuate.​—2 Kolinto 1:3.

• Bua tshinyi tudi mua kuikala batuishibue ne: bipupu ki ndinyoka dia kudi Nzambi to?

• Bipupu ntshimanyinu tshia matuku a ku nshikidilu anyi?

• Mmushindu kayi udi Nzambi wambuluisha badi bipupu bikuate?

• Bible udi mua kutuambuluisha bua kuikala badilongolole kumpala kua tshipupu anyi?

• Mvese ya mu Bible ya kusamba nayi badi bipupu bikuate

Bua tshinyi tudi mua kuikala batuishibue ne: bipupu ki ndinyoka dia kudi Nzambi to?

Tudi bamanye ne: mu Bible badi bakula bua muvua Yehowa mukuate mudimu ne makole a mu bintu bidiye mufuke bua kunyoka bantu. Kadi mbishilangane bikole ne bipupu bitu bienzeka.

• Bipupu bidi bishipa bantu ne bibakengesha kabiyi bisunguluja. Kadi patudi tutangila malu adibu balonde mu Bible, tudi tumona ne: manyoka a Nzambi avua akuata anu bantu bavuaye mufunkune. Tshilejilu, pavua Nzambi mubutule tshimenga tshia Sodoma ne Amola, uvua mumbushe muntu muimpe Lota ne bana bende ba bakaji babidi. (Genese 19:29, 30) Nzambi uvua mumone mu muoyo wa muntu ne muntu yonso wa mu tshikondo atshi ne kubutululaye anu bavuaye mumone ne: mbenji ba malu mabi.​—Genese 18:23-32; 1 Samuele 16:7.

• Misangu ya bungi bipupu bitu bidimuija ku mpukampuka ne mikuabu kabitu bidimuija to. Kadi eku, Nzambi yeye utu anu udimuija benji ba malu mabi kumpala kua kukuata mudimu ne makole a mu bintu bidiye mufuke bua kubanyoka. Bantu bavua bateya ntema ku madimuija bakapanduka.​—Genese 7:1-5; Matayi 24:38, 39.

• Mu mushindu kampanda, bantu ke batu bakebesha bipupu. Mmushindu kayi au? Bantu badi banyangakaja nyungulukilu ne badi bibaka miaba idi dikanka dia buloba dienzeka, idiyi mâyi mua kupasalala anyi idi mivu inyanguka. (Buakabuluibua 11:18) Nzambi ki ngua kuela tshilumbu pambidi bua mapangadika a mushindu au adi bantu bangata to.​—Nsumuinu 19:3.

Bipupu ntshimanyinu tshia matuku a ku nshikidilu anyi?

Eyowa, mêyi a buprofete a mu Bible avua maleje ne: bikumina bivua ne bua kuenzeka ku “nshikidilu wa ndongoluelu wa malu eu,” anyi “matuku a ku nshinkidilu.” (Matayi 24:3; 2 Timote 3:1) Tshilejilu, Yezu uvua muambe bua matuku etu aa ne: “nekuikale biyole bia nzala, buloba nebukanke ku muaba ne ku muaba.” (Matayi 24:7) Mu katupa kîpi emu, Nzambi neumbushe malu onso adi akebela bantu ntatu, too ne bikumina bine.​—Buakabuluibua 21:3, 4.

Mmushindu kayi udi Nzambi wambuluisha badi bipupu bikuate?

• Nzambi udi ubasamba ku diambuluisha dia Bible, Dîyi diende. Bible udi utepesha dishindika dia ne: Nzambi udi ututabalela ne bitu bimusama ku muoyo padiye utumona tukenga. (Yeshaya 63:9; 1 Petelo 5:6, 7) Udi wakula kabidi bua mulayi wa Nzambi wa ne: nekuikale tshikondo tshikala bikumina anyi bipupu kabiyi mua kuenzeka kabidi nansha. Tangila “Mvese ya mu Bible ya kusamba nayi badi bipupu bikuate.”

• Nzambi udi ukuata mudimu ne batendeledi bende bua kubambuluisha. Nzambi udi ukuata mudimu ne batendeledi bende ba pa buloba bua bidikije tshilejilu tshivua Yezu mushiye. Mêyi a buprofete akavua mamanyishe ne: Yezu uvua ne bua kusamba “badi ne muoyo musunsuke” ne “bonso badi badila.” (Yeshaya 61:1, 2) Batendeledi ba Nzambi badi badienzeja bua kuenza bia muomumue.​—Yone 13:15.

  Nzambi udi kabidi ukuata mudimu ne batendeledi bende bua kupetesha badi bipupu bikuate bintu bidibu nabi dijinga.​—Bienzedi 11:28-30; Galatiya 6:10.

Bible udi mua kutuambuluisha bua kuikala badilongolole kumpala kua tshipupu anyi?

Eyowa. Nansha mudi Bible kayi mukanda udi ne malu a kuenza bua kuikala badilongolole kumpala kua tshipupu kuenzeka, udi ne mêyi manene adi mua kutuambuluisha. Tshilejilu:

• Dianjila kulongolola tshia kuenza kumpala kua tshipupu kuenzekatshi. Bible udi wamba ne: “Muntu mudimuke udi umona njiwu, udi usokoma.” (Nsumuinu 22:3) Mbia meji tuetu balongolole tshia kuenza kumpala kua malu kunyangukawu. Bidi bikengela kulongolola tshibuta tshia kunyema natshi, ne kumanya muaba unuaya wewe ne bena mu dîku diebe tshipupu tshiotshi tshienzeke.

• Angata muoyo ne mushinga kupita bintu. Bible udi uleja ne: “Katuena balue ne tshintu panu, ne katuena mua kumbukapu ne tshintu to.” (1 Timote 6:7, 8) Tudi ne bua kuikala badiakaje bua kushiya nzubu ne bintu bietu bikuabu bua kudikuba ku tshipupu. Mbimpe tuvuluka ne: muoyo wetu udi ne mushinga wa bungi kupita tshintu kayi tshionso tshitudi mua kuikala natshi.​—Matayi 6:25.