Padi bipupu bia ku bintu bifuka bituta

Accra, mu Ghana, dia 4 Kashipu 1995: Mvula mitamba bukole munkatshi mua bidimu bu 60 yakakeba dipasalala dia mâyi dikole. Bantu 200 000 bakajimija bionso, 500 000 kabavua ne mushindu wa kufika ku mabu, ne 22 bakajimija mioyo yabu.

San Angelo, Texas, mu États-Unis, dia 28 Lumungulu 1995: Mpepele mikole ne mvula ya mabue biakanyanga tshimenga etshi tshia bantu 90 000, pa kukeba dinyanga bintu dipite pa miliyo ya dolare mifike ku 120.

Kobe, mu Japon, dia 17 Tshiongo 1995: Tshikumina tshiakanenga anu sekonde 20 tshiakashiya binunu bia bafue, makumi a binunu bia batapike, ne nkama ya binunu bia bakena nzubu.

TUDI ne muoyo mu tshikondo tshitudi mua kubikila ne: tshikondo tshia bipupu. Luapolo kampanda lua Matunga Masanga ludi lusokolola ne: mu lupolo lua bidimu 30, kuangatshila ku 1963-92, bungi bua bantu bashipibue, batapike, peshi bamuangeja kudi bipupu buakadiunda ne muayene wa bantu 6 pa lukama ku tshidimu tshionso. Nsombelu wa dibungama eu mmuenzeje O.N.U. bua kufunkuna bidimu bia 1990 bu “Bidimu dikumi bia bukua-matunga bua dikepesha tshipupu tshia ku bintu bifuka.”

Bushuwa, bukole kampanda bua mu bufuki​—bu mudi mvula ya mabue, diluka kapia dia mikuna, peshi tshikumina—​kabutu misangu yonso butuala tshipupu nansha. Nkama [ya makole aa] itu imueneka tshidimu tshionso kakuyi dienzela bantu bibi. Kadi padiku dijimija dia mioyo divule, tshidi tshibikidibua bimpe menemene se: ntshipupu.

Divulangana dia bipupu bia ku bintu bifuka didi dimueneka kadiyi kuepuka. Mukanda wa Bipupu bia ku bintu bifuka​—Mbienzedi bia Nzambi anyi mbienzedi bia bantu? (Angl.) udi wamba ne: “Bantu badi benda bashintulula muaba udi mubanyunguluke, bauvuija muanyika bikole ku bipupu kampanda, ne badi ne nsombelu udi ubavuija buobu bine bikale ne butekete bua bungi kumpala kua njiwu eyi.” Mukanda eu udi ufila tshilejilu etshi tshifuanyikija: “Tshikumina tshipepele mu tshiasasa kampanda tshia nzubu ya bidioto miashila ku luseke lua kabandabanda kapulumuke, tshidi mua kulua tshipupu pa kutangila lufu ne makenga a bantu. Kadi tshipupu atshi ntshitambe kuikala tshipeta tshia dizakala dia buloba anyi peshi tshia mushindu udi bantu basombele mu nzubu ya njiwu bu eyi ne base pa muaba wa njiwu wa nunku?”

Kudi balongi ba Bible, kutshidi kabingila kakuabu ka mudi divulangana mu bipupu bia ku bintu bifuka kadiyi dikemesha. Kukadi bidimu bu 2 000, Yezu Kristo wakadianjila kumanyisha ne: “nkomenu wa ndongoluelu eu wa malu” uvua ne bua kumuenekela ku malu bu mudi “dipangika dia biakudia ne bikumina ku muaba umue ne pashishe ku mukuabu.” (Matayo 24:3, 6-8, NW) Bible wakadianjila kumanyisha kabidi ne: mu “matuku a ku nshikidilu,” bantu bavua ne bua kuikala badinangi nkayabu, banangi ba biuma, kabayi ne disuangana dia ku tshilelelu, ne kabayi banangi ba bimpe.a (2 Timote 3:1-5, NW) Bimanyinu ebi misangu mivule bidi bienzeja muntu mudimu udi unyanga muaba udi mumunyunguluke, pa kuvuija bantu bikale ne butekete bua bungi kumpala kua makole a ku tshifukilu. Bipupu bikeba kudi bantu bidi kabidi bifumina mu nsangilu wa bantu ukena dinanga mudi bavule ne bua kusombela.

Bu mudi dibulunge dietu dienda diuula ne bantu, bu mudi ngikadilu wa muntu uteka bantu mu njiwu mitambe bukole, ne bu mudi mabanji a buloba mu mushindu mualabale matumika nawu bibi, bipupu nebitungunuke ne kukengesha bantu. Dipetesha diambuluisha mbualu bukole, bu mualeja tshiena-bualu tshidi tshilonda etshi.

[Mêyi adi kuinshi]

[Mêyi a dianyisha bua tshimfuanyi mu dibeji 3]

Kuulu: Information Services Department, Ghana; ku dia balume: San Angelo Standard-Times

[Mêyi a dianyisha bua tshimfuanyi mu dibeji 2]

TSHIZUBU: Maxie Roberts/​Courtesy of THE STATE