Amue malu atu akumbana, kadi a bungi kaatu akumbana

Udiku musue kumanya muikala matuku ebe atshilualua anyi? Bantu ba bungi batu ne dijinga edi. Ba bungi batu bamanyisha malu atshilualua, kadi bipeta bia malu adibu bamanyisha mbishilangane. Tukonkonone malu adi alonda aa:

• BENA SIANSE Badi benza mudimu ne biamu bia mpolondo ne batula makuta a bungi bua kumanya malu mashilashilangane a matuku atshilualua bu mudi: mushindu udi dinyanguka dia kapepa mua kunyanga buloba anyi bua kumanya bikala mvula mua kuloka muaba udibu basombele.

• BAKONKONONYI BA MALU BAPILUKE badi bamanyisha muikala malu a mishinga ne a tshididi. Bu muvua malu a makuta a Warren Buffett umue wa ku bantu babanji ba pa buloba bujima enda bimpe, uvua mumanyike bu muntu uvua udianjila kumanyisha bantu muikala malu a mpetu mu matuku atshilualua. Nate Silver mumanyi mukuabu wakumvuija ditshinka divua dimuambuluishe bua kumanyisha bualu buonso buvua butangila tshididi tshia mu États-Unis mu filme wa Hollywood.

• MIKANDA YA KALE ivua yangatshibua bu mikanda ya milayi. Bamue bantu badi bamona malu adi enzeka lelu eu bu akavua Michel de Notredame mudianjile kufunda mu bidimu bia 1500. Kalandriye ka bena Maya kavua kajike mu 21/12/2012, kavua kaleje muvua buloba mua kubutudibua mu matuku au.

• BAMFUMU BA BITENDELELU batu imue misangu bamanyisha malu ikala mua kuenzeka matuku atshilualua bua kudimuija bantu ne kusangisha batendeledi babu. Muprofete mukuabu diende Harold Camping ne bantu bende bavua badianjile kumanyisha muvua buloba mua kubutudibua mu 2011. Nansha nanku, buloba butshidi anuku too ne lelu.

• BENA MBUKU badi badiamba mudibu ne bukole bua kumanyisha malu atshilualua. Edgar Cayce ne Jeane Dixon bavua bambe amue malu avua makumbane mu bidimu bia 1900. Kadi bavua bambe malu a bungi avua kaayi makumbane to. Tshilejilu, Dixon uvua muambe ne: Mvita mibidi ya buloba bujima ivua ne bua kutuadija mu 1958; Cayce pende uvua muambe ne: tshimenga tshia New York netshidine mu mbuu munkatshi mua bidimu bia 1970.

Kakuenaku bulelela mushindu wa kumanya malu atshilualua ne bujalame buonso anyi? Ndukonko lua mushinga mukole ludi muntu mua kudiela. Wewe mudianjile kumanya malu ikala mua kuenzeka matuku atshilualua, newenze malu bilondeshile dimanya diudi nadi mu bualu ebu.