NKONKO YA BABADI

Diosha bitalu ndimpe bua bena Kristo anyi?

Mifundu kayena ileja bualu kampanda busunguluke budi buleja mudibi bibi bua kuosha bitalu to.

Mu Bible kudi miyuki idi ileja muvuabu buoshe mibidi ne mifuba bia bafue. (Yosh. 7:25; 2 Kul. 34:4, 5) Bualu ebu budi mua kuikala buleja ne: bantu abu bavua mua kuikala bamueneka kabayi bakumbane bua kubajika bimpe. Pavuabu buosha bitalu kabivua anu biumvuija ne: kabivua bikumbanyine kujikibua to.

Tudi mua kumuenena bualu ebu mu muyuki wa lufu lua mukalenge Shaula ne lua bana bende basatu. Bonso banayi bakafua pavuabu baluangana ne bena Peleshete. Umue wa mu bana bende uvua Yonatana uvua mulunda wa pa muoyo wa Davidi ne mumuambuluishi wa lulamatu. Pakumvua bena bukitu ba bena Isalele bavua basombele mu Yabesha-gilada tshivua tshienzeke, bakajingila mibidi ya bitalu binayi abi, kuyoshabu ne pashishe kuoshabu mifuba yabi. Pashishe Davidi wakatumbisha bena Isalele abu bua malu avuabu benze.​—1 Sam. 31:2, 8-13; 2 Sam. 2:4-6.

Ditekemena didi Bible ufila bua bafue ndibishibua, mmumue ne: Nzambi upingaja muntu ku muoyo. Nansha buobu buoshe tshitalu tshia muntu anyi kabayi batshioshe, Yehowa kakupangila bukole bua kupeshilula muntu au muoyo ne mubidi mupiamupia to. Bena Ebelu basatu ba lulamatu bavua kumpala kua lufu mu tshikutu tshia kapia bu muvua mukalenge Nebukadenesâ mutume dîyi. Kabavua ne bua kutshina bamba ne: bobu babuoshe mushindu au Nzambi uvua mua kupanga kubabisha to. (Dan. 3:16-18) Ke muvuabi kabidi bua batendeledi ba Yehowa ba lulamatu bavua bafue ne balue kubuosha mu tumponya tua bena Nazi. Batendeledi ba Nzambi bashilashilangane ba lulamatu mbafue mu midilu peshi lufu lua mushindu mukuabu udiku kakuyi mushindu wa kuangula tshitupa nansha tshimue tshia mubidi to. Kadi, nebikale ne bua kubishibua kakuyi mpata.​—Buak. 20:13.

Bua Yehowa kujula muntu ku lufu kabiena bikengela bua asangishe bitupa bia mubidi wende to. Ebi bidi bimuenekela mu mushindu udi Nzambi ubisha bena Kristo bela manyi bua kuikalabu ne muoyo mu diulu. Anu bu Yezu “wakavuijibua ne muoyo mu nyuma,” muena Kristo muela manyi udi ubishibua anu yeye au kadi muikale ne mubidi wa mu nyuma. Kabena baya mu diulu ne tshitupa kampanda tshia mubidi wabu wa kale wa mashi ne mâyi to.​—1 Pet. 3:18; 1 Kol. 15:42-53; 1 Yone 3:2.

Ditekemena dietu dia dibishibua ku lufu didi ne bua kuimanyina pa ditabuja bukole budi nabu Nzambi ne dijinga diende bua kukumbaja milayi yende, kadi ki mpa tshidibu ne bua kuenza ne mibidi to. (Bien. 24:15) Bushuwa, katuena mua kumvua menemene muvua Nzambi muenze tshishima pavuaye mubishe bantu ba kale peshi muikalaye mua kubabisha mu matuku adi alua to. Kadi, tudi beyemene Yehowa. Mmufile “tshijadiki” pavuaye mubishe Yezu.​—Bien. 17:31; Luka 24:2, 3.

Bena Kristo badi ne bua kunemeka bibidilu bia bantu, mmuenenu wa muaba udibu basombele ne mikenji ya mushindu wa kupita ne bitalu. (2 Kol. 6:3, 4) Nunku, kuosha mubidi wa muntu mufue peshi kubenga kuwuosha, ndipangadika didi ditangila muntu nkayende peshi dîku.