Divulangana dia malu mabi!

Smitaa mamu wa bidimu 35 wa mu Dhaka Bangladesh uvua ne lumu luimpe kudi bantu bualu uvua ne dinanga ne utabalela bakuabu. Bantu bavua bamumanye bu muenji wa mudimu wa kalanda musenga ne mamu wa disanka uvua musue kuambuluisha bakuabu bua kumanya malu avuaye mulonge bua Nzambi. Biakabungamija bikole bena mu dîku diabu ne balunda bende bua muvua Smita mupete disama dia tshimpitshimpi divua dimushipe munkatshi mua lumingu.

James ne mukajende bavua ne bidimu 30 ne bia pa mutu, bavua pabu bantu bimpe anu bu Smita. Mu tshikondo kampanda, bakaya bua kusombesha balunda babu ba ku Ouest kua États-Unis. Kabavua bapingane kabidi muabu mu New York to. Bualu, pavuabu ku luendu alu, bakapetangana ne njiwu ya mashinyi, kushiyabu bena mu dîku diabu ne bena mudimu nabu mu kanyinganyinga kakole.

Kabiena bilomba kunana lungenyi bikole bua kumona ne: malu mabi mmavulangane pa buloba lelu. Basalayi ne bantu ba tshianana badi bafua mu mvita. Dishipangana ne malu a tshikisu bidi bikuata bantu badi kabayi ne bualu. Njiwu ya lufu ne masama a lufu bidi bikuata bantu ba bidimu bionso ne ba nsombelu mishilashilangane. Bikumina bidi bibutula bantu kabiyi bisunguluja. Malu a kansungasunga ne a disunguluja bantu mmatangalake pa buloba bujima. Imue misangu malu aa akatu makufikile pebe.

Bidi ne mushinga bua kudiela nkonko bu eyi:

• Bua tshinyi malu mabi atu afikila bantu bimpe?

• Nzambi ke udi ukebesha malu onso aa anyi?

• Ntatu, mmalu adi enzeka mumpukampuka anyi peshi muntu ngudi uyikebesha?

• Karma, mmumue ne: bipeta bia malu avua muntu muenze kumpala kua kuledibua, ke bidi bimukebela ntatu anyi?

• Bikala Nzambi wa Bukole buonso udiku, bua tshinyi kena ukuba bantu bimpe ku malu mabi?

• Makenga ne malu mabi neajikaku dimue dituku anyi?

Bua kuandamuna nkonko eyi, mbimpe tuanji kumvua mandamuna a nkonko ibidi minene eyi: Bua tshinyi malu mabi adi afikila bantu? Nzambi neenze tshinyi?