TSHIENA-BUALU TSHINENE | UDI MUA KUSEMENA PABUIPI NE NZAMBI
Udiku udiumvua pabuipi ne Nzambi anyi?
CHRISTOPHER, nsonga wa mu ditunga dia Ghana udi wamba ne: “Kuikala mu malanda ne Nzambi kudi kuenza bua udiumvue mu bukubi ne mushindame. Bienza anu bu ne: Nzambi udi misangu yonso ukutabalela bua diakalenga diebe.”
HANNAH, muana wa bidimu 13 wa mu Alaska mu États-Unis udi wamba ne: “Nzambi udi umona makenga ebe wonso, ukutabalela ne dinanga dionso kupita muudi mua kuela meji.”
GINA, mamu wa bidimu 40 ne bia mu njila wa mu Jamaïque udi wamba ne: “Kumanya ne: udi mu malanda mimpe ne Nzambi kudi kusankisha bikole menemene!”
Christopher, Hannah ne Gina kabena nkayabu badi badiumvua nunku to. Bantu ba bungi pa buloba bujima mbatuishibue ne: Nzambi udi ubamona bu balunda bende. Wewe udi wela meji bishi? Udiku udiumvua pabuipi ne Nzambi anyi? Peshi udi musue kusemena pabuipi nende anyi? Pamuapa udi mua kudiebeja ne: ‘Bidiku mua kuenzeka bushuwa bua muntu wetu eu kuikalaye mu malanda mimpe ne Nzambi wa Bukole Buonso anyi? Bikalabi nanku, mushindu kayi?’
KUDI MUSHINDU WA MUNTU KUSEMENA PABUIPI NE NZAMBI
Bilondeshile Bible kudi mushindu wa muntu kuikala mu malanda ne Nzambi. Bible udi wamba ne: Nzambi wakabikila Abalahama nkambua wa bena Ebelu ne: “mulunda wanyi.” (Yeshaya 41:8) Mona kabidi dibikila didi mu Yakobo 4:8 dia ne: “Semenayi pabuipi ne Nzambi ne yeye neasemene pabuipi nenu.” Nunku, bidi biumvuika patoke ne: kudi mushindu wa muntu kudia bulunda ne Nzambi. Kadi bu mudi Nzambi kayi umueneka, mmunyi muudi mua ‘kusemena pabuipi’ nende ne kudia nende bulunda?
Bua kuandamuna lukonko elu, tukonkonone tshitu tshienzeka bua bantu kutuadijabu kudia bulunda. Pa tshibidilu patu bantu babidi basua kudia bulunda batu banji kuambilangana mêna abu. Pashishe, padibu bayukidilangana pa tshibidilu ne bambilangana malu, bulunda buabu budi bukola. Padibu badienzeja bua kuenzelangana malu mimpe, bulunda buabu budi bukola bikole. Ke mudibi kabidi bua bulunda budi muntu mua kudia ne Nzambi. Tukonkononayi mudibi mua kuenzeka nanku.