TSHIENA-BUALU TSHINENE | UDIKU MUSUE KULONGA BIBLE ANYI?

Programe wa dilonga dia Bible bua bantu bonso

Bantemu ba Yehowa batu bamanyike bikole bua mutubu bayisha bantu patoke. Kadi uvuaku mumanye ne: tutu kabidi ne programe wa dilonga Bible ne bantu pa buloba bujima anyi?

Muntu ulonga Bible pa muaba wende wa mudimu

Mu tshidimu tshia 2014, Bantemu bapite pa miliyo 8 ba mu matunga 240 bavua balombole malonga a Bible matue ku 9 500 000 ngondo yonso.a Mu bulelela, bungi bua bantu batudi tulonga nabu Bible mbupite mene ne bua bantu badi mu matunga matue ku 140!

Bua kukumbaja mudimu wa dilongesha eu, Bantemu ba Yehowa batu bapatula tshidimu tshionso Bible, mikanda, bibejibeji ne bintu bikuabu bia kulonga nabi Bible mu miakulu mitue ku 700! Bintu bionso ebi bidi bifika ku muliyare umue ne tshitupa! Didifila bua kupatula mikanda didi kadiyi kufuanyikija edi didi diambuluisha bantu bua kulonga Bible mu miakulu idibu basue.

Katlego wa mu Afrique du Sud udi wamba ne: “Mu kalasa, tshivua musue kulonga to, kadi edi dilonga diodi divua dilenga. Kabidi malu amvua mulonge avua mankoleshe bikole!”

Bertha wa Mexique udi wamba ne: “Dilonga adi divua diandamuna nkonko yanyi yonso ne mikuabu ya bungi.”

Eziquiel wa mu Brésil udi wamba ne: “Tuvua tulongela Bible kuanyi dîba dimvua musue. Ntshinyi tshikuabu tshimvua mua kukeba?”

Viniana wa mu Australie udi wamba ne: “Imue misangu tuvua tulonga mu minite 15 anyi too ne ku 30, misangu mikuabu tupitshisha, bilondeshile mumvua meme musue.”

Aimé wa mu Bénin udi wamba ne: “Mvua ndonga tshiyi mfuta kantu, bimpe be!”

Karen wa mu Irlande du Nord udi wamba ne: “Mulongeshi wanyi wa Bible uvua ne lutulu ne muoyo mulenga. Tuakalua balunda ba menemene.”

Denton wa mu Angleterre udi wamba ne: “Bantu ba bungi badi balonga Bible, kadi kabayi balua Bantemu to.”

MANDAMUNA A NKONKO ITU BANTU BATAMBA KUELA PA BIDI BITANGILA PROGRAME WETU WA DILONGESHANGANA BIBLE

Programe wa dilonga udi bishi?

Tutu tuangata biena-bualu bishilashilangane bia mu Bible ne tukonkonona mvese ya mu Bible idi ipetangana ne biena-bualu abi. Tshilejilu, Bible udi wandamuna nkonko bu mudi: Nzambi nnganyi? Utu mushindu kayi? Utu ne dîna anyi? Utu musombele penyi? Tudiku mua kusemena pabuipi nende anyi? Lutatu ndua kumanya muaba udi mandamuna mu Bible.

Bua kuambuluisha bantu bua kupetabu mandamuna, tutu tuenza mudimu ne mukanda udi ne mabeji 224 udi ne tshiena-bualu ne: Bible utu ulongesha tshinyi menemene?b Bavua benze mukanda eu nangananga bua kuambuluisha bantu bua kumvuabu malongesha manene a mu Bible. Mudi malongesha adi atangila Nzambi, Yezu Kristo, makenga a bantu, dibishibua ku lufu, disambila ne malongesha makuabu a bungi.

Dilonga didi mua kuenzekela penyi ne dîba kayi?

Dilonga didi mua kuenzekela muaba wonso uudi musue ne dîba kayi dionso diudi musue.

Dilonga didi dienza minite bungi kayi?

Bantu ba bungi batu basungula bua kulonga Bible mu dîba dimue anyi kupita apu lumingu luonso. Kadi bule bua dilonga budi mua kushintuluka kakuyi bualu. Bule bua dilonga nebulonde programe webe. Bamue batu balonga anu bua minite 10 anyi 15 lumingu luonso.

Bidi bikengela kufuta makuta anga bua kulonga?

Dilonga didi dienzeka tshianana kabidi ne bintu bia kulonga nabi. Kuenza nunku kudi kupetangana ne mêyi avua Yezu muambile bayidi bende a ne: “Nuvua bapete tshianana, nufile tshianana.”—Matayi 10:8.

Dilonga dia mukanda mujima didi dienza matuku anga?

Udi mua kulonga bungi bua matuku onso buudi musue. Mukanda wa Bible utu ulongesha tshinyi menemene? udi ne malonga 19. Udi mua kulonga dilonga kayi dionso anyi onso mene bu muudi musue.

Ndi muenzejibue bua kulua Ntemu wa Yehowa anyi?

Tòo. Tutu tuitaba ne kanemu konso ne: muntu yonso udi ne bukenji bua kusungula malu adiye musue kuitaba. Kadi bantu badi bapeta dimanya dia mu Bible, badi mua kuenza disungula dia meji.

Nkuepi kundi mua kupetela malu makuabu a bungi?

Mu site wa jw.org mudi malongesha malelela a Bantemu ba Yehowa ne mudi midimu yabu.

Mmushindu kayi undi mua kulomba bua balue kundongesha Bible?

Uwuja dilomba ku Enternete mu site wa www.jw.org.
Fundila biro bidi pabuipi nebe mu adrese idi mileja mu dibeji dibidi dia mukanda eu.
Keba Bantemu ba Yehowa badi pabuipi nebe. Udi mua kutangila mu liste ya nimero ya telefone wa muaba unudi mu tshiena-bualu tshia ne: “Bantemu ba Yehowa.”

a Dilonga dia Bible ditu dienzeka pa tshibidilu ne muntu pa nkayende anyi ne kasumbu kakese ka bantu.

b Mupatula kudi Bantemu ba Yehowa. Bakadi bapatule mukanda eu miliyo mipita 230 mu miakulu mipite pa 260.

BIBLE UDI WAMBULUISHA BENA MU MÊKU

Eziquiel udi wamba ne: “Pavua mukajanyi mutuadije kulonga Bible, ngakamumona mushintuluke bikole. Nsombelu wetu mu dîku wakalengela. Pangakajinga kumanya malu avuaye ulonga, ngakabanga kulonga panyi Bible. Bimvua ndonga biakamvuija kabidi muntu muimpe bikole. Kulonga Bible kuakatushiya tshintu tshimue mu dîku dietu.”

Karen udi wamba ne: “Pamvua mubange kulonga Bible, ngakalekela tshilele tshibi tshia kunua diamba, meme kuimanyika bunuavi bua maluvu, kumanya ne mua kukanda tshiji tshianyi. Mpindieu kuanyi kudi mankenda ne bulongame kupita muvuabi kumpala. Ndi mulue kunanga ba mu dîku dianyi bikole, njinga anu kubenzela malu adi abenza disanka. Ndi ne disanka dia katshia.”

Viniana udi wamba ne: “Bantu bakuabu bavua bambipisha pamvua mutuadije kulonga Bible. Kadi bayanyi uvua mutue ku tshianyi, wamba ne: ‘Meme tshiena bualu ne bidi bantu bamba to. Bundi meme nabu mbua kumona muudi wenda ushintuluka ulua muntu muimpe. Tungunuka anu nanku!’ Mpindieu, nsombelu wa dîku dietu mmulenga wa katshia!”