MANDAMUNA A NKONKO YA MALU A MU BIBLE
Tudiku mua kumanya bulelela pa bidi bitangila Nzambi anyi?
Bua tshinyi Nzambi mmusue bua tumanye bulelela? Bala Yone 17:3
Nzambi uvua muyukile ne bantu ba bungi. Ku bukole bua nyuma muimpe anyi bukole buenzeji buende wakateka ngenyi yende mu mitu ya bantu bavua bafunde Bible. (2 Petelo 1:20, 21) Tudi mua kufika ku dimanya bulelela pa bidi bitangila Nzambi patudi tubala Bible.—Bala Yone 17:17; 2 Timote 3:16.
Nzambi mmusokolole malu a bungi adi amutangila mu Bible. Mmumvuije bua tshinyi uvua mufuke bantu, tshialuaye kuenzela bukua bantu ne nsombelu udiye musue bua tuikale nende. (Bienzedi 17:24-27) Yehowa Nzambi mmusue bua tumanye bulelela pa bidi bimutangila.—Bala 1 Timote 2:3, 4.
Bua tshinyi Nzambi udi ubikila bantu badi banange bulelela?
Yehowa udi Nzambi wa bulelela ne wakatuma Muanende Yezu bua kulongesha bantu bulelela. Nunku, Yezu udi ukoka bantu badi banange bulelela. (John 18:37) Nzambi mmusue bua bantu ba mushindu eu bamutendelele.—Bala Yone 4:23, 24.
Satana Diabolo mmupangishe bantu ba bungi bua kumanya Nzambi padiye mubalongesha malu a mashimi adi atangila Nzambi. (2 Kolinto 4:3, 4) Bantu badi kabayi banange malu mimpe ke badi bitaba malongesha a dishima au. (Lomo 1:25) Kadi dilonga dia Bible didi diambuluisha miliyo ya bantu ba muoyo muimpe bua kumanya bulelela pa bidi bitangila Nzambi.—Bala Bienzedi 17:11.