Uvua mumanye anyi?

Ntshinyi tshivua tshienze bua Stefano ashale anu ne ditalala pavuabu bamukengesha?

STEFANO uvua kumpala kua kasumbu ka bantu ba tshikisu. Bantu abu bavua balumbuluishi 71 ba ku kabadi kanene ka mu Isalele (anyi Tshilumbuluidi tshinene) ne bavua munkatshi mua bantu bavua ne buenzeji bua bungi kudi bantu. Bavua babakungije kudi muakuidi munene Kayifa uvua mulombole tubadi ngondo mikese kumpala kua kukoselabu Yezu tshibawu tshia lufu. (Mat. 26:57, 59; Bien. 6:8-12) Pavuabu balua ne bantemu ba dishima umue ku umue, bakamona bualu kampanda bua dikema kudi Stefano, mpala wende uvua “bu mpala wa muanjelu.”​—Bien. 6:13-15.

Ntshinyi tshivua tshienze bua Stefano ashale anu ne ditalala kayi uzakala mu nsombelu au? Kumpala kua kuyabu ne Stefano ku Tshilumbuluidi tshinene, nyuma wa Nzambi uvua mumuambuluishe bua kuditua mu mudimu wa diambuluisha bakuabu. (Bien. 6:3-7) Pavuabu bamulumbuluisha, nyuma umue umue au uvua umusamba ne umuvuluija malu. (Yone 14:16, dim.) Anu mudi Bienzedi nshapita wa 7 uleja, pavua Stefano udilumbuluila ne dikima dionso, nyuma wa Nzambi wakamuvuluija mvese mitue ku 20 anyi kupita apu ya mu Mifundu ya tshiena Ebelu. (Yone 14:26) Kadi ditabuja dia Stefano diakakola kabidi pakamonaye tshikena kumona tshia Yezu muimane ku dia balume dia Nzambi.​—Bien. 7:54-56, 59, 60.

Tudi mua kudimona dimue dituku kumpala kua bantu badi batufunyina anyi batukengesha. (Yone 15:20) Tuetu ne tshibidilu tshia kubala Dîyi dia Nzambi ne kuyisha ne tshisumi, tudi tuenza bua nyuma wa Nzambi atuambuluishe. Netupete kabidi bukole bua kukandamena buluishi eku bikale ne ditalala dietu dia mu muoyo.​—1 Pet. 4:12-14.