MUUDI MUA KUIMANYIKA LUKUNA

3 | Umbusha lukuna munda muebe

Tshidi Bible wamba:

“Nushintuluke pa kukudimuna meji enu, bua nudijadikile nuenu nkayenu disua dia Nzambi didi dimpe, didi dianyishibue ne didi dipuangane.”—LOMO 12:2.

Tshidi mvese eu umvuija:

Mushindu utudi tuela meji udi ne mushinga kudi Nzambi. (Yelemiya 17:10) Tudi ne bua kuepuka diamba bakuabu mêyi mashile anyi dibenzela malu ne lukinu, kadi katuimanyinyi apu to. Lukinu lutu lutuadijila mu meji ne mu muoyo. Nunku, tudi ne bua kumbusha meji etu ku kalu ne kalu kuonso kadi mua kutufikishe ku dikala ne lukinu munda muetu. Tuetu benze nanku, tudi mua ‘kushintuluka’ mu bulelela ne kutshimuna lukinu.

Tshiudi mua kuenza:

Konkonona bimpe bimpe mushindu uutu umona bakuabu, nangananga ba dikoba dikuabu anyi ba mu ditunga dikuabu. Diebeja ne: ‘Ntu mbamone mushindu kayi? Mmuenenu undi nende buabu mmuimanyine anu pa bindi mumanye bua bualu buabu anyi? Peshi mpa biambamba bia bantu?’ Paudi ubuela ku Enternete, kutangidi bintu anyi kubadi malu adi asakangana ku dikala ne lukinu to.

Dîyi dia Nzambi didi mua kutuambuluisha bua kutshimuna lukinu munda muetu ne mu meji etu

Kabitu anu bipepele misangu yonso bua kudikonkonona ne muoyo mujima bua kumanya bimpe meji atudi nawu to. Kadi Dîyi dia Nzambi didi mua kutuambuluisha bua “kujingulula meji ne malu adi muoyo musue kuenza.” (Ebelu 4:12) Nunku tungunuka ne kukonkonona malu adi mu Bible. Tangila bikala meji ebe apetangana ne tshidiye ulongesha ne dienzeje bua kuikala kuela meji mu mushindu udi usankisha Nzambi. Dîyi dia Nzambi didi mua kutuambuluisha bua kutshimuna lukuna ludi luele miji “bikole menemene” mu meji etu ne muoyo wetu.—2 Kolinto 10:4, 5.

Bualu buvua buenzeke—STEPHEN

Wakashintulula ngelelu wende wa meji

Bavua benzele Stephen ne bena mu dîku diabu malu ne lukinu kudi batoke. Biakamufikisha ku dibuela mu tshisumbu kampanda tshia tshididi tshivua tshimanyina manême a bantu. Pakapita matuku wakaditua mu dienza dia malu a tshikisu mabi matambe. Udi wamba ne: “Umue musangu meme ne balunda banyi tuakamona filme wa kale uvua uleja muvuabu bakengesha bapika ba mu Afrike bavua mu États-Unis. Malu aa akatujula tshiji tshikole, musangu umue tuetu kututa bansonga ba batoke anu muaba au. Pashishe tuetu kuya miaba ivua batoke bua kukeba bantu bakuabu ba kukuma.”

Ngelelu wende wa meji wakashintuluka menemene pakatuadijaye kulonga Bible ne Bantemu ba Yehowa. Udi uvuluka wamba ne: “Bu mumvua mumone malu a bungi a kansungansunga ka makoba, malu angakamona kudi Bantemu avua mankemeshe bikole. Tshilejilu, pavua Ntemu mutoke wenza luendu uya ku babende, uvua ushiya bana bende mu dîku dia mufike. Meme kumona kabidi dîku dia mutoke diakidila nsonga kampanda mufike uvua kayi ne kua kusombela.” Stephen wakajadike bushuwa ne: Bantemu ba Yehowa badi bu bena mu dîku badi banaganangane, biobi kumufikishe ku dimona mudibu bakumbaja mêyi a Yezu a ne: bena Kristo balelela bavua ne bua kunangangana mu bulelela.—Yone 13:35.

Ntshinyi tshivua tshiambuluishe Stephen bua kulekela bienzedi biende bia tshikisu? Mêyi adi mu Lomo 12:2 ke avua mamuambuluishe. Udi wamba ne: “Ngakatuadija kumona ne: bivua bikengela nshintulule mushindu wanyi wa kuela meji. Mvua ne bua kuakaja ngelelu wanyi wa meji bua ngikale ngenza malu adi akebesha ditalala ne mmona kabidi ne: eu ke nsombelu muimpe undi ne bua kuikala nende.” Kukadi mpindieu bidimu bipite pa 40 bidi Stephen ne nsombelu wa kayi ne lukinu munda muende to.