MUUDI MUA KUIMANYIKA LUKUNA

4 | Tshimuna lukuna ne diambuluisha dia Nzambi

Tshidi Bible wamba:

“Dimuma dia nyuma didi: dinanga, disanka, ditalala, lutulu, bulenga, buimpe, ditabuja, bupole, didikanda.”—GALATIYA 5:22, 23.

Tshidi mvese eu umvuija:

Nzambi udi mua kutuambuluisha bua kuimanyika lukuna. Nyuma wende muimpe udi mua kutuambuluisha bua kuikala ne ngikadilu itudi katuyi mua kupeta ku bukole buetu to. Nunku pamutu pa kueyemena bukole buetu bua kutshimua lukinu, mbimpe tueyemene diambuluisha didi Nzambi utupesha. Tuetu benze nanku, netumvue petu bu muvua mupostolo Paulo mumvua pavuaye muambe ne: “Bua malu onso ndi ne bukole ku diambuluisha dia yeye udi umpesha bukole.” (Filipoyi 4:13) Ne kabidi, netufike ku diamba ne: “Dikuatshisha dianyi didi difumina kudi Yehowa.”—Misambu 121:2.

Tshiudi mua kuenza:

“Yehowa mmunshintulule, mvua muntu wa tshikisu, mpindieu ndi muena ditalala.”—WALDO

Sambila Yehowa ne muoyo mujima umulombe nyume wende. (Luka 11:13) Mulombe akuambuluishe bua kuikala ne ngikadilu mimpe mu nsombelu webe. Longa tshidi Bible wamba bua ngikadilu bu mudi dinanga, ditalala, lutulu, ne didikanda. Ngikadilu eyi idi mua kukuambuluisha bua kumbusha lukinu munda muebe. Keba mishindu ya kuikala ne ngikadilu eyi mu nsombelu webe. Pashishe diaku bulunda ne bantu badi badienzeja pabu bua kuikala ne ngikadilu eyi. Balunda aba badi mua kukusaka “ku dinanga ne ku bienzedi bimpe.”—Ebelu 10:24.

Bualu buvua buenzeke—WALDO

Wakatshimuna lukuna lukole luvuaye nalu

Waldo uvua mu nsombelu mukole menemene pavuaye wenda ukola. Udi wamba ne: “Tuvua tuluangana misangu ne misangu ne bapanyi ba diamba mu njila . . . Musangu mukuabu, muntu wa dingomba dikuabu dia benzavi uvua muntumine muluanganyi wa mvita muende lumu bua kunshipa, kadi ngakanyema ne mputa wa kele kavuaye muntue.”

Pavua mukajende mutuadije kulonga Bible ne Bantemu ba Yehowa, Waldo kavua musanke to. Udi wamba ne: “Mvua mukine Bantemu, ne misangu ya bungi mvua mbamba malu a busenji. Kadi misangu yonso bavua bangandamuna bimpe.”

Ndekelu wa bionso Waldo wakatuadije pende kulonga Bible. Udi wamba ne: “Kabivua bipepele bua meme kutumukila malu avuabu bandongesha to. Mvua mutuishibue ne: tshiakukokesha bua kulekela tshikisu tshimvua natshi to.” Kadi bualu kampanda buvuaye mulonge mu Bible bua kashintulula mmuenenu wa malu uvuaye nende au.

Waldo udi wamba ne: “Dikuabu dituku, mulongeshi wanyi wa Bible Alejandro wakandomba bua kubala Galatiya 5:22, 23. . . . Alejandro wakangumvuija ne: nyuma wa Nzambi ke udi mua kungambuluisha bua kuikala ne ngikadilu eyi, kadi ki nku bukole buanyi meme nkayanyi to. Bulelela ebu buakashintula mmuenenu umvua nende bikole!”

Waldo wakatshimuna lukuna bualu uvua mueyemene Nzambi. Udi wamba ne: “Balela banyi ne balunda banyi ba kale badi bakema bikole bua mundi mushintuluke bikole.” Udi wamba kabidi ne: “Yehowa mmunshintulule, mvua muntu wa tshikisu, mpindieu ndi muena ditalala.”