MUUDI MUA KUIMANYIKA LUKUNA

2 | Kudisombuedi to

Tshidi Bible wamba:

“Kanupingajidi muntu bubi ku bubi. . . . Bikalaku mushindu, enzayi tshionso tshinudi nuenu mua kuenza bua kuikala mu ditalala ne bantu bonso. Kanudisombuedi, . . . bualu mbafunde ne: ’Yehowa udi wamba ne: “Disombuela ndianyi; meme nemfute.”’”—LOMO 12:17-19.

Tshidi mvese eu umvuija:

Nansha mudibi anu mua kuenzeka ne: tufiike munda padibu batuenzele bualu bubi, Nzambi ki mmusue bua tupingaje bubi ku bukuabu to. Kadi mmusue bua tuikale ne lutulu bualu mmulaye ne: mu katupa kîpi emu, neakaje malu mabi onso.—Misambu 37:7, 10.

Tshiudi mua kuenza:

Patu bantu bapange bupuangane badisombuela, bitu anu bikebesha lukuna lupite bungi. Ke bualu kayi muntu yeye mukuenzele bualu bubi, kupingaji bubi ku bukuabu to. Kufiiki munda to, dienzeja bua kumuandamuna ne ditalala. Mu nsombelu mikuabu mbimpe kupua nansha bualu abu muoyo. (Nsumuinu 19:11) Minga misangu bidi mua kulomba bua nuenu kuyukila bua tshivua tshienzeke. Tshilejilu, biobi bikale ne: nguewe ke udibu benzele bualu bubi menemene, udi mua kupangadija bua kuya ne tshilumbu kua mbulamatadi anyi kudi bantu bakuabu badi ne bukokeshi.

Kupingaja bubi ku bukuabu nkudienzela bibi

Kadi biobi ne: au ki mmushindu muimpe wa kujikija tshilumbu mu ditalala, newenze tshinyi? Anyi ne: ukadi muenze muebe muonso bua kutshijikija mu ditalala, kadi bimueneka ne: kakuena mushindu wa kuenza nanku to, newenze tshinyi? Kudisombuedi to. Bualu bidi mua kulua kunyangakaja kabidi malu. Kadi kupingaji bubi ku bukuabu to. Dienzeja bua kueyemena mushindu utu Nzambi ujikija malu. “Mueyemena, ne yeye neenze tshienzedi bua bualu buebe.”—Misambu 37:3-5.

Bualu buvua buenzeke—ADRIÁN

Wakatshimuna muoyo wa kudisombuela

Patshivua Adrián nsonga, wakalua muluanganyi wa mvita ya mu njila uvua ne tshikisu ne lukinu lua bungi, ne uvua musue kupingaja bubi ku bukuabu. Udi wamba ne: “Mvua ne tshibidilu tshia kuluangana ne bingoma. Misangu ya bungi mvua njikija mvita ne mashi pambidi, nshala mulale mu njila bu tshitalu.”

Adrián wakatuadija kulonga Bible pavuaye ne bidimu 16. Udi wamba kabidi ne: “Pamvua ngenda nya kumpala ne dilonga dianyi dia Bible, ngakamona ne: bivua bikengela nshintulule bumuntu buanyi.” Uvua ne bua kulekela lukinu ne tshikisu. Mêyi adi mu Lomo 12:17-19 a kubenga kupingaja bubi ku bukuabu ke akamuambuluisha bikole. Udi wamba ne: “Ngakitaba ne: Yehowa neajikije tshikisu mu mushindu udiye musue ne dîba didiye musue. Ku kakese ku kakese, ngakalekela tshikisu.”

Dilolo kampanda, kasumbu ka bansongalume bavua bamuluisha kakalua kumubunda. Mfumuabu wakamuela dîyi ne: “disungila aku!” Adrián udi wamba ne: “Ngakumvua bukuku bunjuke bua kuluangana nabu.” Kadi wakenza anu ka disambila kîpi, kumbukaye muaba au.

Adrián udi wamba kabidi ne: “Dituku diakalonda, ngakapetangana ne mfumuabu au nkayende. Ngakumvua tshiji tshikole, kujinga bua kumualujila, kadi ngakasambila Yehowa mundamunda bua angambuluishe bua kudikanda. Biakankemesha bikole pakaluaye kundi kungambilaye ne: ‘Mfuile koku luse bua tshimvua mukuenzele malaba dilolo. Mu bulelela ndi musue kukufuana. Ndi musue panyi kulonga Bible.’ Mvua mumvue disanka bua mumvua mudikande. Bualu abu buakenza bua tutuadije kulonga nende Bible.”