MUUDI MUA KUIMANYIKA LUKUNA

1 | Kuikadi ne kansungansunga to

Tshidi Bible wamba:

“Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.”—BIENZEDI 10:34, 35.

Tshidi mvese eu umvuija:

Yehowaa Nzambi katu utuenzela malu utangila tshisamba tshietu, dikoba dietu, anyi ditunga dietu to. Kadi utu ukeba tshidi ne mushinga menemene, mmumue ne: tshitudi munda muetu. Bible udi kabidi wamba ne: “Muntu wetu eu udi umona tshidi tshimueneka ku mêsu, kadi Yehowa yeye udi umona mu muoyo.”—1 Samuele 16:7.

Mudi mvese eu mua kukuambuluisha:

Nansha mutudi katuyi mua kumona munda mua muntu, tudi mua kudienzeja bua kuidikija Nzambi ne kubenga kuikala ne kansungansunga. Pamutu pa kumona bantu mu tshibungi, mbimpe tudienzeje bua kumona tshidi muntu ne muntu pa nkayende. Wewe mujingulule ne: udi umona bakuabu mu mushindu mubi pamuapa bualu mba dikoba dikuabu anyi ditunga dikuabu, sambila ulomba Nzambi bua akuambuluishe bua kuikadi ubamona nanku to. (Misambu 139:23, 24) Wewe mulombe Yehowa ne muoyo mujima bua akuambuluishe bua kuikadi ne kansungansunga, ikala mutuishibue ne: neateleje dilomba diebe ne neakuambuluishe.—1 Petelo 3:12.

a Yehowa ke dîna dia Nzambi.—Misambu 83:18.

“Tshivuaku muanji kusomba mu ditalala ne mutoke to . . . Lelu eu, ndi mu dîku dia bana betu ba pa buloba bujima.”—TITUS

Bualu buvua buenzeke—TITUS

Wakatshimuna lukuna

Muntu kampanda diende Titus uvua ne tshiji tshikole bua mikenji ivuabu bela ivua isunguluja makoba a bantu. Nunku wakaya kubuela mu dingumba kampanda dia bantu bavua ne lungenyi lua buena luende. Udi wamba ne: “Tuvua tuya miaba kampanda ya mu tshimenga ivuabu kabayi banange bafiike, bu mudi ku nzubu ya tshilala benyi anyi ku nganda, anu bua kukebesha mvita.” Titus uvua mumanye ne: lukinu ke luvua lumusaka ku dienza malu au. Udi wamba ne: “Pamvua tshiyi mpetangana ne muntu ku mêyi, meme ke uvua wa kumpala ku dijula mvita.”

Titus wakabanga kushintuluka pakatuadijaye kulonga Bible ne Bantemu ba Yehowa. Dibala dia Bible divua dimusaka kudimona malu mu mushindu mukuabu. Tshivua tshimusaka menemene mmulayi wa malu alua kuenzeka matuku atshilualua, wa ne: “lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi” to.—Buakabuluibua 21:3, 4.

Kumpala uvua udienzeja bua kumbusha lukinu luvua munda muende. Udi wamba ne: “Bivua mbikolele menemene bua kushintulula ngelelu wanyi wa meji ne ngenzelu wanyi wa malu.” Kadi tshivuaye mulonge mu Bienzedi 10:34, 35, tshia ne: Nzambi kena ne kansungansunga, tshivua tshimuambuluishe bikole.

Ntshinyi tshiakapetaye? Udi wamba ne: “Ngakapeta dishindika dia ne: Bantemu ba Yehowa badi mu tshitendelelu tshilelela pangakamona muvuabu banangangane, pabu bikale ba makoba mashilangane. Kabidi, kumpala kua meme kubatijibua, Ntemu mukuabu wa mu tshisumbu tshietu uvua mutoke wakambikila kuende bua tuetu kuela tshianza mukana. Biakankemesha bikole bualu bivua anu bu tshilota! Tshivuaku muanji kusomba mu ditalala ne mutoke to. Kadi mpindieu mvua mua kudia nende kuende kumbelu. Lelu eu, ndi mu dîku dia bana betu ba pa buloba bujima.”