Mandamuna a nkonko yenu

▪ Ntshinyi tshitudi mua kuenza bua kuambuluisha bampanda-njila?

Mu tshidimu tshia mudimu tshia 2009, bana betu batue ku 800 000 bavua benze mudimu wa bumpanda-njila bua pa tshibidilu ne bua pa buabu. Bana betu aba badi bakuata mudimu ne dîba diabu, makanda abu ne bintu biabu bua kualabaja mudimu wa kuyisha lumu luimpe. (Nsu. 3:9) Yehowa uvua musanke bikole bua mudimu wabu. Anu bu Yehowa, mmunyi mutudi petu mua kubambuluisha bua bikale ne disanka ne bua batungunuke ne mudimu eu?

Tudi mua kubakolesha ku muoyo ne mêyi mimpe. (Nsu. 25:11) Katuenaku mua kuakaja programe wetu wa mu lumingu bua kuyisha nabu anyi? Patudi tuyisha nabu, tudi mua kubambuluisha ne makuta a kufutabu njila. (1 Kol. 13:5; Filip. 2:4) Tudi kabidi mua kubambuluisha patudi tubakidila ku mbanza yetu anyi tubabikila imue misangu bua kudia nabu.​—1 Pet. 4:8, 9.

Bible udi utujadikila ne: Yehowa neakumbajile bantu badi bakeba kumpalampala Bukalenge buende bintu bidibu nabi dijinga. (Mus. 37:25; Mat. 6:33) Umue wa ku mishindu udiye ubapeshabi nku diambuluisha dia bena Kristo netu. (1 Yone 3:16-18) Kadi bampa-njila kabatu batekemena bua bantu bakuabu babambuile bujitu to. Padibu dijinga ne tshintu kampanda, kabatu anu bambila bakuabu to. Kadi tudi mua kuambuluisha bampanda-njila badi benza mudimu ne lulamatu bua ‘dikepela dia bintu biabu,’ mu mishindu miakanyine patudi tubatabalela bikole.​—2 Kol. 8:14, 15.

Tshilejilu, pavua Foibe (mumanyishi wa lumu luimpe wa tshisumi wa mu tshisumbu tshia ku Kenekelea tshia mu bidimu lukama bia kumpala) muye ku Lomo, Paulo wakambila bena Kristo ba mu Lomo ne: ‘Numuitabuje mu Mukalenge bu mudi bansantu ne bualu bua kuenza, ne numukuatshishe ne bualu buonso budiye ukengela kunudi.’ (Lomo 16:1, 2) Tudi petu ne mishindu ya kuleja dinanga dia mushindu eu patudi tuambuluisha bana betu badi bananukila mu mudimu wa bumpanda-njila bua pa tshibidilu ne bua pa buabu badi mu tshisumbu tshietu.​—Bien. 5:42.