Lama ditekemena diebe dia buena Kristo dikole

1. Nditekemena kayi didi Yehowa mutupeshe?

YEHOWA mmutupeshe ditekemena dimpe dia dikema dia muoyo wa tshiendelele. Bamue mbatekemene bua kusomba ne muoyo kashidi mu diulu bu bifukibua bia mu nyuma bidi kabiyi mua kufua. (1 Kol. 15:50, 53) Kadi bantu ba bungi menemene badi ne ditekemena dia kusomba kashidi pa buloba, bikale ne disanka ne makanda a mubidi mapuangane. (Buak. 21:3, 4) Ditekemena dietu nansha diodi dia kupeta muoyo wa tshiendelele mu diulu anyi pa buloba, tudi badindile ne muoyo kuulu kuulu ne tudi tudiangata ne mushinga wa bungi.

2. Ditekemena dietu ndimanyine pa tshinyi? Bua tshinyi tudi tuamba nanku?

² Muaku “Ditekemena” udi mu Bible udi mua kumvuija “kuindila ne: malu mimpe neenzeke.” Tudi batuishibue ne: malu atudi batekemene matuku atshilualua neakumbane kakuyi kadiwu bualu Yehowa ke udi mualaye. (Lomo 15:13) Tudi bamanye malu adiye mutulaye au, ne utu anu ukumbaja mêyi ende. (Nom. 23:19) Tudi bashindike ne: Yehowa udi ne dijinga ne bukole bua kukumbaja bionso bidiye muambe ne: neenze. Nunku ditekemena dietu ki ndimanyine pa bualu butudi badifuanyikijile anyi butudi bajinge patupu bua buenzeke to, ndimanyine pa malu malelela adi ne bijadiki.

3. Mmalu kayi atuamona mu tshiena-bualu etshi? (Misambu 27:14)

³ Tatu wetu wa mu diulu mmutunange, ne mmusue bua tumueyemene. (Bala Misambu 27:14.) Ditekemena ditudi nadi kudi Yehowa diodi dikole, netunanukile ntatu ne netuikale anu ne dikima ne disanka nansha malu kayi matufikile. Tumonayi mudi ditekemena dietu ditukuba. Netuanji kumona mudi ditekemena dikale bu luongo ne bu tshifulu. Pashishe netumone mutudi mua kukolesha ditekemena edi.

DITEKEMENA DIETU DIDI BU LUONGO

4. Ditekemena ndifuanangane ne luongo mushindu kayi? (Ebelu 6:19)

⁴ Mu mukanda uvua mupostolo Paulo mufundile bena Ebelu, uvua mufuanyikije ditekemena dietu ne luongo. (Bala Ebelu 6:19.) Bu muvuaye utamba kuenzela ngendu pa mâyi, uvua mumanye ne: luongo lutu luambuluisha bua mazuwa kaapambuki to. Musangu kampanda uvua mu mazuwa pavua tshipepele tshikole tshitute. Anu mu tshipepele atshi, wakamona muvua bendeshi ba mazuwa bela luongo mishilangane mu mâyi bua mazuwa kaaditutshi ku mabue. (Bien. 27:29, 39-41) Ditekemena dietu didi anu bu luongo ludi lujalamija buatu bualu didi ditushindamija bua katupambuki, tuya kule ne Yehowa patudi mu bikondo bia ntatu mikole to. Ditekemena dietu dishindame didi dituambuluisha bua kushala talalaa mu ntatu bualu tudi batuishibue ne: bikondo bia ditalala mbituindile. Vuluka muvua Yezu mutudimuije ne: bavua ne bua kutukengesha. (Yone 15:20) Kuelangana meji a malu adi Yehowa mutulaye kudi kutuambuluisha bua kutungunuka ne kumuenzela mudimu.

5. Mmunyi muvua ditekemena dikuatshishe Yezu kumpala kua lufu?

⁵ Tumonayi muvua ditekemena divua nadi Yezu dimuambuluishe bua kushala mushindame nansha muvua lufu lubi lumuindile. Mu Pentekoste wa mu 33 P.Y., mupostolo Petelo wakatela dîyi dia buprofete dia mu mukanda wa Misambu didi dileja bimpe dishindika ne ditukija bivua nabi Yezu; didi diamba ne: “Meme nensombe mu ditekemena; bualu wewe kuakundekela mu Lukita anyi kuakuitaba bua muena lulamatu webe abole to. . . . Neunguwuje tente ne disanka dia bungi kumpala kuebe.” (Bien. 2:25-28; Mis. 16:8-11) Nansha muvua Yezu mumanye ne: uvua ne bua kufua, uvua ne ditekemena dishindame dia ne: Nzambi uvua ne bua kumubisha ku lufu ne uvua ne bua kupeta disanka dia kudimona kabidi ku luseke lua Tatu wende mu diulu.​—Eb. 12:2, 3.

6. Ntshinyi tshivua muanetu mukuabu muambe bua ditekemena?

⁶ Ditekemena dietu dia buena Kristo ndiambuluishe bana betu ba bungi bua kunanukila. Tuangate tshilejilu tshia Leonard Chinn, muanetu wa lulamatu uvua musombele mu Angleterre. Mu Mvita ya kumpala ya buloba bujima, bakamuela mu buloko bua muvuaye mubenge kubuela ku busalayi, yeye kushalamu ngondo ibidi kayi umona pambelu dîsu. Pashishe kutuadijabu kumuenzeja mudimu wonso wa mukole. Wakalua kufunda ne: “Malu avua manfikile aa akamfikisha ku dimona mudi ditekemena ne mushinga wa bungi bua tuetu kunanukila. Tshilejilu tshia Yezu, tshia bapostolo, ne tshia baprofete, ne milayi ya mushinga mukole idi mu Bible bidi bitupesha ditekemena dikole bua matuku atshilualua ne bitupesha bukole bua kunanukila.” Ditekemena divua bu luongo kudi Leonard, ne didi kabidi mua kulua bu luongo kutudi tuetu petu.

7. Mmushindu kayi udi ntatu ikolesha ditekemena dietu? (Lomo 5:3-5; Yakobo 1:12)

⁷ Patudi tunanukila mu ntatu ne tumona mudi Yehowa utuambuluisha ne utuanyisha, ditekemena dietu didi dikola kabidi bikole. (Bala Lomo 5:3-5; Yakobo 1:12.) Nanku tudi ne ditekemena dikole menemene kupita dituvua nadi patuvua bitabe lumu luimpe. Satana mmusue bua ntatu itupuile panshi, kadi tudi mua kuyitantamena yonso ku diambuluisha dia Yehowa.

DITEKEMENA DIETU DIDI BU TSHIFULU

8. Ditekemena ndifuanangane ne tshifulu mushindu kayi? (1 Tesalonike 5:8)

⁸ Bible utu ufuanyikija kabidi ditekemena ne tshifulu. (Bala 1 Tesalonike 5:8.) Musalayi utu uvuala tshifulu bua kukuba mutu wende ku mikete idi baluishi mua kumuasa. Bu mutudi mu mvita ya mu nyuma, tudi ne bua kukuba meji etu ku buluishi bua Satana. Udi wenza mudimu ne bintu bia bungi bishilashilangane bua kututeya ne kutunyanga lungenyi. Anu mudi tshifulu tshikuba mutu wa musalayi, ditekemena dietu didi dikuba meji etu bua tushale anu ne lulamatu kudi Yehowa.

9. Ntshinyi tshidi tshifikila bantu badi kabayi ne ditekemena?

⁹ Ditekemena dietu dia muoyo wa tshiendelele nedituambuluishe bua kuenza malu ne meji ne busunguluji. Kadi diodi diteketa ne tutuadija kutuma meji anu ku majinga etu a mubidi, tudi mua kupanga kumona mushinga udi nawu muoyo wa tshiendelele. Tuakulabi bua bamue bena Kristo ba mu Kolinto wa kale. Kabatshivua bitabuja kabidi mulayi wa Nzambi wa kutekemena dibishibua dia bantu ku lufu to. (1 Kol. 15:12) Paulo wakamba ne: bantu badi kabayi ne ditekemena dia kuikala ne muoyo matuku atshilualua, badi baditatshisha anu bua kukumbaja majinga abu a lelu. (1 Kol. 15:32) Bantu ba bungi badi kabayi ne ditekemena mu milayi ya Nzambi batu benza muabu muonso bua bikale ne disanka lelu. Kadi tuetu tudi batuishibue ne: malu adi Nzambi mutulaye matuku atshilualua neakumbane. Ditekemena dietu didi bu tshifulu tshia mu tshimfuanyi tshidi tshikuba meji etu ne tshituambuluisha bua katuimanyinyi anu pa majinga etu nkayetu, bualu tuetu bimanyinapu malanda etu ne Yehowa neanyanguke.​—1 Kol. 15:33, 34.

10. Mmunyi mudi ditekemena dituambuluisha bua kuepuka ngelelu mubi wa meji?

¹⁰ Tshifulu tshietu tshia ditekemena tshidi kabidi tshituepula ku ngelelu wa meji wa ne: katuakukumbana bua kusankisha Yehowa to. Tshilejilu, bamue badi mua kudiambila ne: ‘Tshiakuikala munkatshi mua bantu basomba ne muoyo kashidi to. Tshiena anu muntu muimpe nangananga to. Tshiakukumbana bua kuenza malu adi Nzambi musue to.’ Vuluka ne: Elifaza, musambi wa dishima wakeleshisha Yobo meji mu mushindu wa muomumue eu. Elifaza wakamba ne: “Muntu ufuafua eu nnganyi bua yeye kuikala mukezuke?” Pashishe wakamba bua Nzambi ne: “Tangila! Yeye kena weyemena bansantu bende, nansha diulu dine kadiena dikezuke ku mêsu kuende to.” (Yobo 15:14, 15) Tshivua dishima dia dikema! Vuluka, Satana ke udi upetesha bantu ngelelu wa meji eu. Mmumanye ne: wewe wela meji mushindu eu, neutuadije kujimija ditekemena diebe. Benga mashimi a mushindu eu, utambe kutuma meji ku milayi ya Yehowa. Mmusue bua usombe ne muoyo kashidi ne neakuambuluishe bua kukumbaja tshipatshila etshi; kuelakanyi to.​—1 Tim. 2:3, 4.

LAMA DITEKEMENA DIEBE DIKOLE

11. Bua tshinyi tudi ne bua kuikala ne lutulu patudi bindile bua malu atudi batekemene akumbane?

¹¹ Kabitu anu bipepele bua kulama ditekemena dietu dikole to. Tudi mua kupanga lutulu patudi bindile bua Nzambi akumbaje milayi yende. Kadi bu mudi Yehowa muikale wa tshiendelele, tshikondo tshitudi tuetu tumona bu tshile atshi, kudiye yeye ntshîpi. (2 Pet. 3:8, 9) Neakumbaje malu adiye mulaye mu mushindu muimpe menemene, kadi pamuapa kakuakumbaja dîba ditudi batekemene to. Ntshinyi tshidi mua kutuambuluisha bua kulama ditekemena dietu dikole patudi bindile ne lutulu bua Nzambi akumbaje milayi yende?​—Yak. 5:7, 8.

12. Bilondeshile Ebelu 11:1, 6, tshia kuenza ntshiyi bua kuikala ne ditekemena?

¹² Yehowa neakumbaje anu malu atudi batekemene, nunku tuetu basemene pabuipi nende, netulame ditekemena dietu dikole. Bua tuetu kuikala ne ditekemena, tudi ne bua kuitabuja ne: Yehowa udiku ne udi “mufutshi wa badi bamukeba ne muoyo mujima.” (Bala Ebelu 11:1, 6.) Tuetu tuitabuja ne: Yehowa udiku bushuwa, nebitambe kutushindikila ne: neakumbaje bionso bidiye mulaye. Tukonkononayi mishindu mimpe itudi mua kukolesha malanda etu ne Yehowa bua tulame ditekemena dietu dikole.

13. Tshia kuenza ntshinyi bua kusemena pabuipi ne Nzambi?

¹³ Sambila Yehowa, ubale kabidi Dîyi diende. Nansha mutudi katuyi mua kumona Yehowa, tudi mua kusemena pabuipi nende. Tudi mua kuyukila nende mu disambila, batuishibue ne: neatuteleje. (Yel. 29:11, 12) Tudi mua kuteleja Nzambi patudi tubala Dîyi diende ne tudielela meji. Patudi tubala malu a muvua Yehowa utabalela bantu bavua ne lulamatu kale, ditekemena dietu didi dikola menemene. Bualu buonso budi mu Dîyi dia Nzambi bavua ‘babufunde bua kutulongesha, bua tupete ditekemena ku diambuluisha dia dinanukila dietu ne dia busambi bua mu Mifundu.’​—Lomo 15:4.

14. Bua tshinyi mbimpe kuelangana meji a malu adi Yehowa muenzele bakuabu?

¹⁴ Elangana meji a mudi Yehowa mukumbaje milayi yende. Ela meji bua tshivua Nzambi muenzele Abalahama ne Sala. Bua bukole bukavuabu, kabavua mua kulela kabidi to. Kadi Nzambi wakabalaya ne: bavua ne bua kulela muana. (Gen. 18:10) Ntshinyi tshiakenza Abalahama? Bible udi wamba ne: “Uvua ne ditabuja dia ne: uvua ne bua kulua tatu wa bisamba bia bungi.” (Lomo 4:18) Abalahama kavua mumanye muvuabi mua kuenzeka to, kadi uvua mutuishibue ne: Yehowa uvua ne bua kukumbaja tshivuaye mulaye. Muntu wa ditabuja eu kakedibua mâyi ku makasa to. (Lomo 4:19-21) Miyuki ya mushindu eu idi itulongesha ne: tudi anu ne bua kueyemena Yehowa, batuishibue ne: neakumbaje milayi yende, nansha tuetu tumona bu ne: kabiena mua kuenzeka.

15. Bua tshinyi mbimpe kuela meji a malu adi Nzambi mutuenzele?

¹⁵ Ela meji a malu adi Yehowa mukuenzele. Ela meji a mukadi dikumbana dia milayi idi mu Dîyi dia Nzambi dikuambuluishe wewe. Tshilejilu, Yezu uvua mulaye ne: Tatu wende neakupeshe biudi nabi dijinga. (Mat. 6:32, 33) Uvua mukujadikile kabidi ne: Yehowa neakupeshe nyuma muimpe paudi umulombayi. (Luka 11:13) Yehowa mmukumbaje milayi eyi. Pamuapa udi uvuluka milayi mikuabu idiye mukumbaje bua bualu buebe. Tshilejilu, mmulaye bua kukufuila luse, bua kukusamba, ne bua kukudiisha mu nyuma. (Mat. 6:14; 24:45; 2 Kol. 1:3) Paudi wela meji a malu akadi Nzambi mukuenzele, bidi bikolesha ditekemena diebe bua malu akuenzelaye kumpala eku.

NUSANKE MU DITEKEMENA

16. Bua tshinyi ditekemena ndipa dia mushinga mukole?

¹⁶ Ditekemena dia muoyo wa tshiendelele ditudi nadi ndipa dia mushinga mukole dia kudi Nzambi. Tudi bindile malu malenga a matuku atshilualua ne muoyo kuulu kuulu, ne tudi batuishibue ne: neenzeke. Ditekemena didi anu bu luongo, bualu didi ditushindamija bua tumone mua kutantamena ntatu, tuimana tshishiki padibu batukengesha, nansha kumpala kua lufu. Didi anu bu tshifulu, bualu didi dikuba meji etu bua tubenge tshidi tshibi, tulamate tshidi tshimpe. Ditekemena didi Bible utupesha didi ditusemeja pabuipi menemene ne Nzambi ne didi dileja mudiye mutunange bikole menemene. Tuetu balame ditekemena dietu dikole, nebituambuluishe kabidi bikole.

17. Bua tshinyi ditekemena dietu didi ditufikisha ku disanka?

¹⁷ Mupostolo Paulo wakafundila bena Lomo bua kubakankamija ne: “Nusanke mu ditekemena.” (Lomo 12:12) Paulo uvua anu ne bua kusanka bualu uvua mutuishibue ne: yeye mushale ne lulamatu, uvua upeta muoyo wa tshiendelele mu diulu. Tuetu petu tudi ne bua kusanka mu ditekemena dietu bualu tudi batuishibue ne: Yehowa neakumbaje milayi yende. Anu muvua muimbi wa misambu mufunde ne: “Wa diakalenga mmuntu . . . udi ne ditekemena diende mu Yehowa Nzambi wende . . . utu ushala anu ne lulamatu.”​—Mis. 146:5, 6.