TSHIENA-BUALU TSHIA KULONGA 15
MUSAMBU WA 30 Tatu wanyi, Nzambi wanyi, ne Mulunda wanyi
“Kusemena pabuipi ne Nzambi nkuimpe” buetu tuetu!
“Kadi buanyi meme, kusemena pabuipi ne Nzambi nkuimpe buanyi meme.”—MIS. 73:28.
LUNGENYI LUNENE
Mua kushemesha bulunda ne Yehowa ne masanka atuapeta bua bualu abu.
1-2. a) Ntshinyi tshitudi ne bua kuenza bua kushemesha bulunda ne muntu? b) Ntshinyi tshituakuila mu tshiena-bualu etshi?
UTU ne mulunda wa pa muoyo anyi? Uvua muenze tshinyi bua kudia nende bulunda? Pamuapa uvua usomba nende bikole. Uvua mudienzeje bua kumanya malu avua mamufikile mu nsombelu wende ne bituye musue ne bituye kayi musue. Wakamona ne: uvua ne ngikadilu mimpe iuvua pebe musue kuikala nayi. Ke wewe kumunanga.
2 Bitu bilomba dîba ne makanda bua kushemesha bulunda ne muntu. Ke mudibi kabidi bua yonso wa kutudi kushemesha malanda ende ne Yehowa Nzambi. Mu tshiena-bualu etshi, netumone mutudi mua kushemesha bulunda ne Nzambi ne masanka atuapeta bua bualu abu. Netuanji kumona bua tshinyi mbimpe bua kusemena pabuipi ne Yehowa, mulunda wetu mutambe buimpe.
3. Bua tshinyi mbimpe tuelangane meji a malu mimpe atudi tupeta patudi tushemesha bulunda ne Yehowa? Fila tshilejilu.
3 Tudi bamanye bimpe ne: kudia bulunda ne Yehowa kutu anu kuimpe. Kadi kuelangana meji a malu mimpe atudi tupeta kudi mua kutusaka bua kutungunuka ne kukolesha bulunda buetu nende. (Mis. 63:6-8) Tshilejilu, tudi bamanye ne: kudia biakudia bishilashilangane mu mushindu mukumbanyine, kuibidija mubidi, kuikisha mudibi bikengela, ne kunua mâyi a bungi kudi kutuambuluisha bua kuikala ne makanda a mubidi mimpe. Bantu ba bungi batu balengulula malu aa, bapua muoyo ne: badi badienzela bibi. Tuetu tutamba kuela meji a mudi kuenza malu aa kutuambuluisha bua kuikala ne makanda a mubidi mimpe, netutungunuke anu ne kuenza. Bia muomumue, tudi mua kuikala bamanye ne: kusemena pabuipi ne Yehowa nkuimpe. Kadi tuetu belangane meji a malu mimpe adi bulunda buetu nende butupetesha, nebitusake bua kutungunuka ne kubushemesha.—Mis. 119:27-30.
4. Ntshinyi tshivua mufundi wa Misambu muambe mu Misambu 73:28?
4 Bala Misambu 73:28. Mufundi wa Musambu wa 73 uvua muena Lewi uvuabu bateke kangimba ku ntempelo wa Yehowa. Kukavua bidimu bia bungi bivuaye utendelela Yehowa, muikale ne lulamatu. Kadi uvua mumanye muvuabi ne mushinga bua kuikala anu muvuluke ne: “kusemena pabuipi ne Nzambi” kuvua kuimpe buende yeye. Uvua musue kabidi bua bantu bakuabu bamanye ne: kuvua kuimpe buabu pabu. Kudia bulunda ne Nzambi kudi kupetesha muntu malu mimpe kayi?
“KUSEMENA PABUIPI NE NZAMBI” KUDI KUTUPETESHA DISANKA
5. a) Bua tshinyi kusemena pabuipi menemene ne Yehowa kudi kutupetesha disanka? b) Bilondeshile Nsumuinu 2:6-16, fila bilejilu bia mudi meji a Yehowa mua kukuambuluisha ne kukukuba.
5 Tuetu tusemena pabuipi ne Yehowa netupete disanka dia bungi. (Mis. 65:4) Kudi malu a bungi adi atusaka bua kuamba nanku. Tshilejilu, tuetu tutumikila malu adi mu Dîyi dia Nzambi, tudi tulua bena meji. Meji au neatukube ku malu adi mua kutuenzela bibi, ne neatuambuluishe bua kubenga kuenza bilema binene. (Bala Nsumuinu 2:6-16.) Ke bualu kayi Bible udi wamba ne: “Wa diakalenga mmuntu udi upeta meji ne muntu udi upeta dijingulula dia malu.”—Nsu. 3:13.
6. Ntshinyi tshivua tshifikishe mufundi wa Musambu wa 73 ku dijimija disanka?
6 Bushuwa, nansha balunda ba Yehowa batu batuilangana ne malu atu ababungamija. Mufundi wa Musambu wa 73 wakajimija disanka diende pakatuadijaye kumona malu mu mushindu mubi. Wakatuadija kumona ne: bantu babi bavua anu ne nsombelu muimpe nansha muvuabu kabayi batumikila Nzambi to; kumupeshabi mpindieu tshiji, ukeba bua apete pende bivuabu nabi abi. Uvua udishima, udiambila ne: bena tshikisu ne bena diambu bavua anu bapeta bionso bivuabu nabi dijinga, bikale ne makanda a mudibi mimpe, kabayi nansha bakenga to. (Mis. 73:3-7, 12) Bu muvuabi bimutonda bikole nanku, biakamufikisha ku dimona ne: bionso bivuaye wenza bua kuenzela Yehowa mudimu kabivua ne mushinga to. Ke yeye kuamba ne: “Bushuwa, ndi mulame muoyo wanyi mukezuke patupu.”—Mis. 73:13.
7. Ntshinyi tshitudi ne bua kuenza padi malu matutonde? (Tangila kabidi tshimfuanyi.)
7 Mufundi wa Musambu eu kakalekela dibungama diende adi dimutshibuila panshi to. Tshiakenzaye ntshinyi? ‘Wakabuela mu muaba munene munsantu wa Nzambi,’ muakashintulula Yehowa lungenyi luende. (Mis. 73:17-19) Patudi ne malu matutonde, Yehowa mulunda wetu mutambe bunene mmumanye. Patudi tusambila tumulomba buludiki, mbimpe tuitabe diambuluisha didiye utupesha mu Dîyi diende ne ku diambuluisha dia tshisumbu tshia bena Kristo. Dîba adi, netupete bukole bua kunanukila mu ntatu yetu. Nansha tunyinganyinga tututshibuile panshi, Yehowa neatukoleshe ne neatusambe.—Mis. 94:19.a
Muena Lewi uvua mufunde Musambu wa 73 muimane “muaba munene munsantu wa Nzambi” (Tangila tshikoso 7)
“KUSEMENA PABUIPI NE NZAMBI” KUDI KUTUPETESHA NSOMBELU WA NSONGO LELU NE DITEKEMENA BUA MATUKU ATSHILUALUA
8. Mmu mishindu kayi mikuabu mudi kusemena pabuipi ne Nzambi kuimpe buetu tuetu?
8 Kusemena pabuipi ne Nzambi nkuimpe buetu tuetu mu mishindu mikuabu minene ibidi. Wa kumpala, kudi kutupetesha nsombelu muimpe tuetu bashemeshe bulunda buetu ne Nzambi. Muibidi, kudi kutupetesha ditekemena dia malu ikala ne bua kuenzeka. (Yel. 29:11) Tukonkononayi malu au.
9. Mmunyi mudi kusemena pabuipi ne Yehowa kutupetesha disanka?
9 Tuetu bashemeshe bulunda ne Yehowa, netuikale ne nsombelu wa disanka. Bantu ba bungi lelu batu bamba ne: Nzambi kenaku to. Nanku, ki mbamanye bua tshinyi bantu badi pa buloba to. Buabu bobu, bantu kabakuikalapu kabidi kumpala eku to. Kadi dilonga dietu dia Dîyi dia Nzambi nditujadikile ne: Nzambi “udiku ne udi ulua mufutshi wa badi bamukeba ne muoyo mujima.” (Eb. 11:6) Nansha lelu, tudi ne disanka bualu tudi tuenza tshivuabu batufukile, mmumue ne: tudi tuenzela Yehowa, Tatu wetu wa mu diulu mudimu.—Dut. 10:12, 13.
10. Bilondeshile Misambu 37:29, ntshinyi tshidi Yehowa mulaye bantu badi bamueyemena?
10 Bantu ba bungi kabena ne ditekemena dilelela bua matuku atshilualua to. Tshiabu tshionso tshidibu natshi tshidi anu tshia kuenza mudimu, kusela anyi kusedibua, kulela bana, ne kukeba bua kupeta tshialua kubambuluisha pangatabu pansio. Ki mbamanye tshidi Nzambi mulongolole bua matuku atshilualua to. Kadi tuetu tudi bamanye ne: Yehowa utu utabalela batendeledi bende. (Mis. 25:3-5; 1 Tim. 6:17) Tudi tueyemena Nzambi utudi bavuije mulunda wetu, batuishibue ne: neakumbaje bionso bidiye mutulaye. Kudi malu mimpe a bungi atudi bindile ne muoyo kuulu kuulu. Mu malu au mudi kutendelela Yehowa mu Mparadizu bua kashidi.—Bala Misambu 37:29.
11. Kusemena pabuipi ne Nzambi kudi kutuambuluisha mushindu kayi? Mmunyi mudi Yehowa umvua?
11 Kusemena pabuipi ne Nzambi nkuimpe buetu tuetu mu mishindu mikuabu ya bungi. Tshilejilu, Yehowa mmulaye bua kutubuikidila mpekatu patudi tunyingalala. (Yesh. 1:18) Nanku, kabiena bikengela tutungunuke ne kudipisha bua mpekatu ituvua benze kale to. (Mis. 32:1-5) Dîba adi, Yehowa udi usanka, bitusankisha petu. (Nsu. 23:15) Tudi batuishibue ne: kudi malu makuabu a bungi atudi bapete bua bulunda butudi badie ne Yehowa. Ntshinyi tshiudi mua kuenza bua kutungunuka ne kusemena pabuipi ne Nzambi?
MUA KUTUNGUNUKA NE “KUSEMENA PABUIPI NE NZAMBI”
12. Ntshinyi tshiuvua muenze bua kusemena pabuipi menemene ne Nzambi?
12 Biwikala ukadi mubatijibue, bidi bileja ne: ukadi muenze malu a bungi bua kusemena pabuipi ne Yehowa. Udi mulonge malu a bungi malelela adi atangila Yehowa Nzambi ne Yezu Kristo, munyingalale bua mpekatu iuvua muenze, muleje muudi ne ditabuja dikole kudi Nzambi, ne mudienzeje bua kumutumikila mu nsombelu webe. Kadi bua kusemena pabuipi menemene ne Nzambi, tudi ne bua kutungunuka ne kuenza malu aa.—Kolos. 2:6.
13. Mmalu kayi asatu adi mua kutuambuluisha bua kutungunuka ne kusemena pabuipi menemene ne Yehowa?
13 Ntshinyi tshiatuambuluisha bua kutungunuka ne kusemena pabuipi menemene ne Yehowa? 1) Tudi ne bua kutungunuka ne kubala Bible ne kumulonga. Patudi tumubala, tshipatshila tshietu katshikadi anu tshia kulonga malu patupu to, kadi tshikale tshia kumanya tshidi Nzambi musue bua tuikale tuenza ne tshia kuenza bua mêyi manene adi mu Dîyi dia Nzambi atulombole. (Ef. 5:15-17) 2) Tudi ne bua kuelangana meji a malu adi atujadikila ne: mmutunange. Dîba adi, nebikoleshe ditabuja dietu. 3) Tudi ne bua kutungunuka ne kukina malu adi anyingalaja Yehowa ne kubenga kudia bulunda ne bantu badi baenza.—Mis. 1:1; 101:3.
14. Anu mudi 1 Kolinto 10:31 uleja, mmalu kayi atudi ne bua kuenza dituku dionso edi bua kusankisha Yehowa? (Tangila kabidi bimfuanyi.)
14 Bala 1 Kolinto 10:31. Mbimpe tuenze malu adi asankisha Yehowa. Malu au kaena anu atangila kuya mu buambi ne mu bisangilu to. Kadi tudi ne bua kuenza malu adi asankisha Nzambi mu nsombelu wetu wa buatshia buila. Tshilejilu, tuetu bikale ne bululame mu malu onso ne tuabanyangana bintu ne bakuabu, tudi tusankisha Yehowa. (2 Kol. 8:21; 9:7) Yehowa udi usanka kabidi patudi tuangata muoyo ne mushinga wa bungi. Tuetu bikale ne nkatshinkatshi mu tshilumbu tshia didia ne dinua, ne tutabalela makanda etu a mubidi mu mishindu mikuabu mimpe, netusemene pabuipi menemene ne Nzambi udi mutupeshe muoyo. Tuetu tudienzeja bua kusankisha Yehowa nansha mu tumalu tukese menemene, neatunange bikole.—Luka 16:10.
Kudikuba patudi tuendesha mashinyi, kuibidija mubidi ne kudia biakudia bidi biwudisha bua kutabalela makanda etu a mudibi, ne kuabanyangana bintu ne bakuabu ngimue mishindu itudi mua kusankisha Yehowa (Tangila tshikoso 14)
15. Yehowa mmusue bua tuenzele bakuabu malu mushindu kayi?
15 Yehowa utu wenzela bantu bakane ne bantu babi malu mimpe. (Mat. 5:45) Mmusue bua tuetu petu tumuidikije. Tshilejilu, katuena ne bua ‘kuakula bibi bua muntu nansha umue, kuikala tutandangana, kadi tuikale ne bupole buonso kudi bantu bonso.’ (Tito 3:2) Nanku katupepeji bantu anu bualu kabena bitabuja malu atudi tuitabuja to. (2 Tim. 2:23-25) Tuetu tuenzela bantu bonso malu mimpe ne tubangata ne mushinga, netusemene pabuipi menemene ne Yehowa.
TUDI MUA KUSEMENA “PABUIPI NE NZAMBI” NANSHA TUETU BENZE BILEMA
16. Mmunyi muakalua mufundi wa Musambu wa 73 kumvua tshikondo kampanda?
16 Kadi tshiakuenza ntshinyi wewe mutuadije kumona ne: Yehowa ki mmukunange bua bilema biudi muenze? Anu mutukadi baleje, mufundi wa Musambu wa 73 wakamona pende nanku. Wakamba ne: “Makasa anyi akavua mambe kupambuka.” (Mis. 73:2) Wakamba muvuaye ‘munyingalale’ ne ‘mupangile meji’ “bu nyama udi kayi ne lungenyi” kumpala kua Yehowa. (Mis. 73:21, 22) Mêyi ende aa adiku aleja ne: bua tshilema tshiende atshi kuende kuvua kujike, Yehowa kayi mua kumunanga kabidi anyi?
17. a) Ntshinyi tshiakenza mufundi wa Musambu wa 73 nansha pavuaye mutekeshibue bikole mu mikolo? b) Bualu buende budi butulongesha tshinyi? (Tangila kabidi bimfuanyi.)
17 Bikalabi ne: mufundi wa Musambu eu uvua muele meji ne: Yehowa uvua mumubenge, kakaela musangu mule to. Bidi bimueneka ne: tshikondo tshivuaye mutekeshibue mu mikolo atshi, wakamona ne: bivua bikengela kusemena pabuipi menemene ne Nzambi, bualu wakamba ne: “Kadi mpindieu, ndi nebe [Yehowa] dîba dionso; udi munkuate ku tshianza tshianyi tshia balume. Wewe udi undombola ne mibelu yebe, ne pashishe neumfikishe ku butumbi.” (Mis. 73:23, 24) Nanku patudi tudiumvua batekeshibue mu mikolo, mbimpe tulombe petu Yehowa bua atukoleshe. (Mis. 73:26; 94:18) Nansha tuetu benze bilema binene, tudi mua kupingana kudi Yehowa, batuishibue ne: ‘mmudiakaje bua kubuikidilangana.’ (Mis. 86:5) Mbimpe tusemene pabuipi menemene ne Nzambi nangananga patudi batekeshibue mu mikolo.—Mis. 103:13, 14.
Tuetu bamone ne: ditabuja dietu nditekete, mbimpe tusambile bikole ne tuikale ne tshibidilu tshia kubuela mu bisangilu bua kusemena pabuipi menemene ne Yehowa (Tangila tshikoso 17)
‘SEMENA PABUIPI NE NZAMBI’ BUA KASHIDI
18. Bua tshinyi tudi ne bua kutungunuka ne kusemena pabuipi menemene ne Yehowa bua kashidi?
18 Tudi mua kutungunuka ne kusemena pabuipi menemene ne Yehowa bua kashidi ne kutungunuka anu ne kulonga malu ende. Bible udi wamba ne: njila ya Yehowa, meji ende, ne dimanya diende ‘kabiena kulondolola.’—Lomo 11:33.
19. Mukanda wa Misambu udi utushindikila tshinyi?
19 Misambu 79:13 udi wamba ne: “Tuetu bantu bebe, mikoko ya mu mpata webe wa kudishila nyama, netukusakidile kashidi; netumanyishe butumbi buebe mu bipungu ne bipungu bia bantu.” Tuetu batungunuke ne kusemena pabuipi ne Nzambi, netuikale ne dishindika dia ne: netupete masanka a kashidi. Newambe ne dishindika dionso ne: “Nzambi udi dibue dia muoyo wanyi ne tshitupa tshianyi tshindi mupete bua kashidi.”—Mis. 73:26.
MUSAMBU WA 32 Luaku ku luseke lua Yehowa
a Bantu badi bashala ne dibungama, anyi ne malu mabatonde munkatshi mua matuku a bungi, bidi mua kulomba ne: baye kua munganga. Bua kumanya malu makuabu, bala Tshibumba tshia Nsentedi tshia No. 1 2023.