Yehowa wakatuambuluisha bua kuibidilangana ne miaba ivuabu batutuma ne kuikala ne disanka

Muanetu Mats ne mukajende bakabuela mu Kalasa ka Gilada mu 1979, ne mu kupita kua bidimu bakabatuma mu Iran, mu Maurice, mu Myanmar, mu Tanzanie, ne mu Zaïre. Mulongeshi wa mu Kalasa ka Gilada, diende Jack Redford, ke uvua mubapeshe mubelu au. Misangu yonso ivuabu babumbusha eku babatume eku, mubelu au uvua ubambuluisha bikole. Tulekelayi badiakuile.

Mats, tulondela muwakamanya bulelela?

Mats: Pavua tatu mu Pologne tshikondo tshia Mvita mibidi ya buloba bujima, wakamona muvua bena mu tshitendelelu tshia Katolike ba bungi bikale bena mpala ibidi. Nansha nanku uvua udiambila ne: “Tshitendelelu tshilelela tshidi anu ne bua kuikalaku!” Ngakalua kumona ne: uvua wambilamu. Ngakasumba mikanda ya kale ya bungi. Umue wa kudiyi wa tshizubu tshia ble uvua ne tshiena-bualu tshia ne: Bulelela budi bufikisha ku muoyo wa kashidi. Tshivua tshinsankisha bikole, ke meme kuwubala wonso anu butuku bumvua muwupete abu. Pangakawubala wonso, ngakamona ne: mvua mupete bulelela!

Kutuadijila mu ngondo 4/1972, ngakabala mikanda mikuabu ya bungi ya Bantemu ba Yehowa, meme kupeta mandamuna a nkonko yanyi ya malu a mu Bible. Ngakadiumvua anu bu ngenda mushinga wa mu tshilejilu tshivua Yezu mufile. Pavua ngenda mushinga au mupete dibue dia busanga dia mushinga mukole, wakapana bintu biende bionso bua kudisumba. “Ngakapana” panyi tshipatshila tshianyi tshia kulonga tulasa tua iniversite bua kulua doktere, meme kusumba “dibue dia busanga,” tuambe ne: bulelela bumvua mupete. (Mat. 13:45, 46) Ngakabatijibua mudia 10/12/1972.

Tshidimu tshimue pashishe, baledi banyi ne muakunyanyi wa balume bakitaba bulelela, bobu kubatijibua. Mu ngondo wa 7/1973 ngakalua mpanda-njila wa pa tshibidilu. Mu bampanda-njila ba tshisumi ba mu tshisumbu tshietu muvua muanetu wa bakaji mukuabu uvua munange Yehowa bikole, diende divua Ann-Catrin. Tuakanangangana, tuetu kuselangana mu 1975. Tuakenza nende bidimu 4 mu tshimenga tshilenga tshia Strömsund, mu Suède, muvua bantu ba bungi basue kulonga bulelela.

Ann-Catrin: Tatu wakalonga bulelela pakavuaye pa kujikija tulasa tuende tua iniversite mu Stockholm. Tshikondo atshi, ntshivua muana wa ngondo isatu, kadi uvua uya nanyi mu bisangilu ne mu buambi. Bivua bitonda mamu, ne uvua musue anu kuleja ne: Bantemu ba Yehowa mbena dishima. Kadi kavua ukumbana to, nunku panyima pa matuku, yeye pende wakabatijibua. Pangakakumbaja bidimu 13, ngakabatijibua panyi. Pangakakumbaja bidimu 16, ngakalua mpanda-njila. Meme mumane kuenza mudimu mu tshimenga tshia Umeå muvuabu dijinga ne bamanyishi ba Bukalenge ba bungi, ngakalua mpanda-njila wa pa buende.

Tuetu bamane kuselangana ne Mats, tuakapeta diakalenga dia kulongesha bantu ba bungi bulelela. Munkatshi muabu muvua muana wa bakaji utshivua tshitende, diende Maivor. Wakalekela mudimu uvuaye nawu mu malu a manaya, yeye kulua mpanda-njila. Uvua uyisha pamue ne muakunyanyi wa bakaji umuepele umvua nende uvua pende mpanda-njila. Bakabuela mu Kalasa ka Gilada mu 1984, ne patudi tuakula apa mbamisionere mu ditunga dia Équateur.

Panuvua bamisionere, mmunyi munuvua nutumikila mubelu wa kuikala ne disanka ne kuibidilangana ne miaba ivuabu banutuma?

Mats: Bavua batutuma miaba mishilashilangane. Kadi kudienzeja bua kuidikija didipuekesha divua nadi Yezu kuvua kutuambuluisha bikole. (Kolos. 2:6, 7) Tshilejilu, katuvua tuindila ne: bena Kristo netu ba miaba ivuabu batutuma badienzeje bua kuibididilangana netu to. Tuetu tuvua tudifila bua kumanya tshivuabu benzela malu mu mushindu kampanda anyi kansanga. Tuvua basue kumanya ngelelu wabu wa meji ne bilele biabu. Bu mutuvua tuidikija Yezu, bivua bipepele bua kuibidilangana ne miaba ivuabu batutuma ne kuikala ne disanka.​—Mis. 1:2, 3.

Ann-Catrin: Bua mutshi kukolawu padibu bawukuna muaba mukuabu, udi dijinga ne kamunya. Yehowa utu anu “dîba” dietu. (Mis. 84:11) Utu utupetesha kaluya ku diambuluisha dia bena Kristo netu badi batunange. Tshilejilu, bana betu ba mu katshisumbu ketu ka mu Téhéran, mu Iran, bavua bakididi ba benyi anu bu bamue bantu badibu batele mu Bible. Tuvua basue kusomba mu Iran, kadi bu muvuabu bakandikamu midimu ya Bantemu ba Yehowa mu ngondo wa 7/1980, mbulamatadi wakatupesha matuku abidi tshianana bua kumbukamu. Bakatutuma mu Zaïre (ukadibu babikila ne: République démocratique du Congo) mu Afrike.

Pangakumvua ne: bavua batutume mu Afrike, ngakadila. Mvua ne buôwa bualu bantu bavua bamba ne: mu Afrike mutu nyoka ne masama a bungi. Kadi muanetu wa balume kampanda ne mukajende bakavua benzamu mudimu bidimu bia bungi bakatuambila ne: “Kanutu banji kuyamu to, anji ndayi, tudi batuishibue ne: Afrike au, nenumuanyishe bikole.” Ke tuetu kuya! Bena Kristo netu batuakapetamu bavua batunange ne bavua bantu ba musangelu. Bidimu 6 pashishe pakatuambilabu bua kumbuka mu Zaïre bua muvuabu bakandikamu mudimu wetu, ngakadiseka nkayanyi bua munkavua mpindieu nsambilla, ndomba Yehowa ne: “Bua luse, tulekela tusombe mu Afrike.”

Mmalu mimpe kayi anudi bapete mu bidimu bionso abi?

Mats: Tudi bapete balunda bimpe ba miaba mishilashilangane bavua pabu bamisionere. Mu imue miaba ivuabu batutume, tuvua tulonga Bible ne bantu ba bungi, ne bivua bitupesha disanka dia bungi be! Katuena mua kupua muoyo muvua bana betu ba mu Afrike banangangane ne bikale bakididi ba benyi to. Patuvua tukumbula bisumbu bia mu Tanzanie, tuvua tulala mu mashinyi atuvua tuya nawu. Bana betu bavua benza muabu muonso bua kutupetesha bituvua nabi dijinga nansha muvuabu bapele. (2 Kol. 8:3) Kuvua tshikondo tshia pa buatshi tshituvua tubikila ne: tshikondo tshia miyuki. Ntshikondo tshituvua meme ne Ann-Catrin tusomba, dilolo dionso, tuyukila bua malu avua mapitakane munda mua dituku ne tuela Yehowa tuasakidila bua muvuaye netu.

Ann-Catrin: Buanyi meme, ndi ne disanka dia bungi bua mutudi bafike ku dimanyangana ne bana betu ba pa buloba bujima. Tudi balonge miakulu mipiamipia, bu mudi muakulu wa Farsi, wa Mfualansa, wa Luganda, ne wa Swahili, ne tudi bamanye bilele bimpe bia miaba mishilashilangane. Tudi balongeshe bena Kristo bapiabapia ba bungi, bapete balunda balelela, ne benzele nabu Yehowa mudimu pamue.​—Sef. 3:9.

Tudi bamone kabidi bintu bilenga bia dikema bidi Yehowa mufuke. Musangu wonso utuvua tuitaba bua kuya muaba uvuabu batutuma bua kuenzela Yehowa mudimu, tuvua tumvua anu bu tuvua tuenza luendu ne Yehowa, muikale kumpala kuetu. Mmutulongeshe malu atuvua katuyi mua kudilongela nkayetu to.

Ntatu kayi inuvua bapete? Mmunyi munuvua bayitantamene?

Mats: Tuvua bapete masama a bungi mu kupita kua bidimu. Mu masama au muvua dia malaria. Kuvua misangu ivuabu bapande Ann-Catrin, bualu buvuaye kayi muelele meji to. Tusamisha kabidi mutu bua baledi betu bakavua bakulakaje; tudi tuela bena mu mêku etu onso abidi tuasakidila bua muvuabu babatabalela tshikondo tshituvua tuetu mu mudimu. Bavua babambuluisha bikale ne disanka ne lutulu, ne bavua babanange. (1 Tim. 5:4) Nansha mutuvua tubambuluishila ku bule, imue misangu tuvua tumvua bibi, tujinga anu ne: tubenzele bia bungi kupita apu.

Ann-Catrin: Mu 1983 patuvua mu Zaïre, disama dibi dia kolera diakankuata. Doktere wakambila Mats ne: “Umbuka nende mu ditunga edi anu lelu eu!” Dituku diakalonda, bumuvuaku anu ndeke wa mabuki, ke utuakangata, tuetu kuya mu Suède.

Mats: Tuakadila bualu tuvua tuela meji ne: mudimu wa bumisionere ukavua wimana. Nansha muvua docktere muambe ne: Ann-Catrin kavua mua kumvua bimpe, kadi wakumvua anu bimpe. Bidimu ndambu pashishe, tuakapingana mu Zaïre, musangu eu bavua batutume ku Lubumbashi, ne tuvua tubuela mu katshisumbu ka muakulu wa Swahili.

Ann-Catrin: Patuvua ku Lubumbashi aku, ngakapeta difu, diodi kutuka. Nansha mutuvua katuyi bele meji a kulela, ngakabungama bikole menemene. Kadi Yehowa wakatupesha dipa dituvua katuyi belele meji. Tuakatuadija kulonga Bible ne bantu ba bungi kupita ne kumpala. Tuvua bamanyishi 35 mu katshisumbu ketu aku, kadi tshidimu tshijima katshiyi tshianji kukumbana, tuakalua bamanyishi 70. Kumpala tuvua tudisangisha bantu 40, kadi apa tukavua 220. Tuvua tuyisha bikole, ne mushindu uvua Yehowa utubenesha uvua unkolesha. Nansha nanku, tuvua anu tuvuluka difu divua dituka adi, tuela meji a muanetu utuvua mua kuikala balele au, ne tuvua tuyukila misangu yonso bua bualu abu. Tudi bindile tshikondo tshikala Yehowa mua kujikija tunyinganyinga tuetu bua kashidi.

Mats: Tshikondo kampanda, Ann-Catrin wakatuadija kutshioka bikole. Bakankuata disama dia kansere ku dile dinene dia munda, ne bivua bikengela bampande. Kadi nkadi bimpe mpindieu, ne Anne-Catrin pende udi wenza muende muonso bua kuenzela Yehowa mudimu.

Tuakafika ku dimona ne: ki ntuetu kayetu bavua ne ntatu to. Mu 1994 bamane kushipa bantu ba bungi mu Rwanda, tuakaya kukumbula bana betu ba bungi bavua basombele miaba ivuabu balongoluele bantu bavua banyema mvita. Patuakamona ditabuja diabu, dinanukila diabu, ne mushindu uvuabu anu bakididi ba benyi, biakatulongesha ne: Yehowa udi ne bukole bua ku kukuatshisha bantu bende mu lutatu kayi luonso.​—Mis. 55:22.

Ann-Catrin: Tuakapeta lutalu lukuabu patuvua babuele mu tshibilu tshia dibanjija betele mupiamupia mu Ouganda mu 2007. Panyima pa tshibilu atshi, tuakatula mashinyi pamue ne bena mu dîku dia betele, batangile mu Nairobi, mu Kenya. Kumpala kua kufika ku mikalu, mashinyi makuabu a manene avua afumina luseke lukuabu akalua kudikuma ku etu. Muendeshi wa mashinyi ne bena Kristo netu batanu bakafua diakamue; muanetu wa bakaji mukuabu wakalua kufuila mu lupitadi. Tudi ne dijinga dikole dia kubamona kabidi!​—Yobo 14:13-15.

Panyima pa matuku, mputa imvua meme mupete yakuma. Kadi njiwu ayi yakatushiya, meme ne Mats ne tunyinganyinga tukole menemene. Imue misangu tulu tuvua tunkoseka butuku, ndiumvua anu bu muntu ne disama dia muoyo; bingenza ne buôwa. Kadi disambila ne busambi bua mu Mifundu ya tshijila imvua mbala ne ngelela meji biakangambuluisha bua kunanukila. Bakatuambuluisha kabidi bimpe menemene kudi badoktere batu bamanye kujikija ntatu ya mushindu au. Mpindieu katuena kabidi ne tunyinganyinga tukole atu to. Tudi tulomba Yehowa bua atuambuluishe bua kusamba bana betu bakuabu padi pabu ne tunyinganyinga tukole.

Pauvua umvuija mushindu unuvua nutantamena ntatu, uvua muambe ne: Yehowa uvua munuambule “bu mayi mabishi.” Uvua usua kuamba tshinyi?

Mats: Mêyi au nga mu Swahili, adi amba ne: “Tumebebwa kama mayai mabichi,” anyi “bavua batuambule bu mayi mabishi.” Anu mutu muntu wambula mayi adi kaayi malamba, uengeleka bua kaatayiki, Yehowa pende uvua mutuengeleke miaba yonso ivuabu batutuma. Tuvua anu ne bionso, kupita too ne bituvua nabi dijinga. Mushindu uvua Kasumbu kaludi kaditeka pa muaba wetu wakaleja muvua Yehowa mutunange ne utukuatshisha.

Ann-Catrin: Ndi musue kutela bumue bualu budi buleja muvua Yehowa mutukuatshishe. Dimue dituku bakambikila ku telefone, bangambila ne: tatu uvua mu lupitadi usama bikole menemene mu Suède. Nansha muvua Mats ufuma ku diumvua bimpe ku disama dia malaria, utshivua ne kabutekete, ne katuvua ne makuta a kufuta ndeke bua kuya kuetu to. Nunku tuakapangadija bua kupanyisha mashinyi etu. Pashishe muanetu wa balume kampanda ne mukajende bavuabu balondele lutatu lutuvua nalu bakatubikila ku telefone, batuambila ne: bavua basue kutufutshila ndeke. Muanetu wa bakaji mukuabu ukavua mukulakaje wakatubikila pende ku telefone. Uvua mulame makuta mu kashete, ne uvua mufundapu ne: “Bua bantu badi mu dikenga.” Mu minite mikese tshianana, Yehowa wakatupetesha mushindu wa kufuta ndeke!​—Eb. 13:6.

Mmalu kayi anudi balonge mu bidimu 50 binudi benze mu mudimu wa ku dîba ne ku dîba?

Ann-Catrin: Ndi mulonge ne: bukole buetu budi “mu dishala talalaa ne dikala ne dieyemena.” Patudi tueyemena Yehowa, mvita ivua yetu ayi, idi ishala yende. (Yes. 30:15; 2 Kul. 20:15, 17) Didifila dietu mu mudimu wa Yehowa muaba wonso uvuabu batutuma nditupetesha masanka a bungi atuvua katuyi mua kupeta bu tuetu baditue mu midimu mikuabu ya tshianana.

Mats: Dilongesha dinene dindi mupete ndia kueyemena Yehowa mu nsombelu yonso ne kumona muenzaye tshienzedi bua bualu buanyi. (MIs. 37:5) Uvua ungambuluisha anu muvuaye mulaye. Utshidi anu utuambuluisha nansha ku betele kutudi mu Myanmar emu.

Tudi batekemene ne: bansonga ba bungi badi basue kuvudija mudimu wabu nebalabule pabu dinanga dia lulamatu dia Yehowa anu mutudi petu badilabule. Tudi batuishibue ne: nebadilabule anu bobu balekele Yehowa ubambuluisha bua kuikala ne disanka miaba yonso yabatumabu ne kuibidilangana ne nsombelu ya miaba ayi.