Ikala uvuluka bua kusambila bua bakuabu

1. Bua tshinyi tudi tuamba ne: masambila etu adi ne mushinga kudi Yehowa?

DISAMBILA ndipa dia mushinga mukole dia kudi Yehowa. Elabi meji bua bualu ebu: Yehowa mmupeshe banjelu midimu kampanda ya kuenza. (Mis. 91:11) Mmupeshe kabidi Muanende midimu ya mushinga mukole. (Mat. 28:18) Kadi nnganyi udiye mupeshe mudimu wa kuteleja masambila? Ki mmuwupeshe muntu to, awu mmudimu udi Yehowa mudilamine nkayende. Yehowa “Muteleji wa disambila” utu ututeleja.​—Mis. 65:2.

2. Ntshilejilu kayi tshia kusambidila bakuabu tshidi mupostolo Paulo mutushile?

² Nansha mutudi mua kuambila Yehowa malu etu onso adi matutonde mu disambila, mbimpe tuikala tusambila bua bantu bakuabu. Ke tshivua mupostolo Paulo muenze. Tshilejilu, wakafundila tshisumbu tshia mu Efeso ne: “Ndi ntungunuka ne kunutela mu masambila anyi.” (Ef. 1:16) Paulo uvua usambidila bakuabu. Wakambila Timote ne: ‘Ndi ne dianyisha dia bungi kudi Nzambi, tshiyi ndekela kukuvuluka mu misengelelu yanyi butuku ne munya.’ (2 Tim. 1:3) Paulo uvua ne yende ntatu ivuaye mua kuleja Yehowa mu disambila. (2 Kol. 11:23; 12:7, 8) Nansha nanku, uvua usambila bua bakuabu.

3. Bua tshinyi ki mbimpe tupue muoyo bua kusambidila bakuabu?

³ Kudi misangu idibi mua kutufikila bua kupua muoyo bua kusambidila bakuabu. Muanetu wa bakaji Sabrinaa udi uleja bumue bua ku malu atu enza bua tupue muoyo, wamba ne: “Tuetu bonso tutu ne bia bungi bia kuenza. Ntatu itudi nayi idi mua kutufikisha ku disambila anu bua malu etu nkayetu, katuyi tusambidila bakuabu to.” Bitu bikufikila pebe bua kuenza nanku anyi? Biobi ne: bitu bikufikila, tshiena-bualu etshi netshikuambuluishe. Bualu netshileje 1) mudibi ne mushinga bua kusambidila bakuabu ne 2) netshileje ngenyi ya muudi mua kusambila bua bakuabu.

BUA TSHINYI TUDI NE BUA KUSAMBIDILA BAKUABU?

4-5. Mmunyi mudi kusambidila bakuabu ‘kubambuluisha bikole’? (Yakobo 5:16)

⁴ Kusambidila bakuabu ‘kudi kubambuluisha bikole.’ (Bala Yakobo 5:16.) Tuetu tusambidila bakuabu, nsombelu udi mubafikile udi mua kushintuluka anyi? Eyowa. Bualu nansha muvua Yezu mumanye ne: mupostolo Petelo ukavua pa kumuvila, wakamuambila ne: ‘Ndi musengelele Nzambi bua bualu buebe, bua ditabuja diebe kaditeketshi to.’ (Luka 22:32) Paulo uvua pende mumanye ne: disambila didi mua kushintulula nsombelu udi mufikile muntu. Pavuabu bamuele mu buloko kakuyi bualu, wakafundila Filemona ne: “Bualu ndi mutekemene ne: ku diambuluisha dia masambila enu, nebampingaje kunudi.” (Filem. 22) Ke tshiakenzeka. Matuku makese pashishe, bakamupatula, yeye kutungunuka kabidi ne kuyisha bantu.

⁵ Bualu ebu kabuena buleja ne: patudi tusambila, tudi mua kuenzeja Yehowa bua ashintulule nsombelu udi mutufikile to. Yehowa utu umona ntatu idi nayi batendeledi bende, ne kutu misangu ituye usungula bua kuenza tshidibu bamulombe atshi. Kumanya bualu ebu kudi kutuambuluisha bua kuikala kusambila ne muoyo mujima batuishibue ne: Yehowa neajikije lutatu luetu mu mushindu muimpe.​—Mis. 37:5; tangila kabidi 2 Kolinto 1:11.

6. Kusambidila bakuabu kudi kutusaka bua kubenzela tshinyi? (1 Petelo 3:8)

⁶ Kusambidila bakuabu kudi kutusaka bua ‘kubumvuila luse.’ (Bala 1 Petelo 3:8.) Kumvuila bakuabu luse kudi kumvuija kumona lutatu ludibu nalu ne kukeba mushindu wa kubambuluisha. (Mâko 1:40, 41) Mukulu mukuabu, diende Michael, udi wamba ne: “Pantu nsambila bua majinga a bantu bakuabu, ntu ngumvua bimpe tshidibu bumvua bua ntatu idibu batuilangana nayi, bingambuluisha bua kubananga bikole. Ndi ndiumvua pabuipi nabu, nansha mudibu kabayi bamanye.” Mukulu mukuabu diende Richard, udi uleja mudi kusambila bua bakuabu kuambuluisha, wamba ne: “Patudi tusambidila muntu, bidi bitusaka bua kuenza bualu kampanda bua kumuambuluisha. Patudi tupesha muntu utudi tusambidila tshintu, bidi anu bu ne: tudi tuambuluisha bua Yehowa andamuna disambila dituvua benze bua bualu buende.”

7. Mmunyi mudi kusambidila bakuabu kutuambuluisha bua kubenga kusamisha mutu anu bua ntatu yetu nkayetu? (Filipoyi 2:3, 4) (Tangila kabidi bimfuanyi.)

⁷ Kusambila bua bakuabu kudi kutuambuluisha bua kumona ntatu itudi nayi mu mushindu muimpe. (Bala Filipoyi 2:3, 4.) Bu mutudi mu ndongoluelu wa malu udi Diabolo ukokesha, tumanye ne: muntu yonso utu utuilangana ne ntatu. (1 Yone 5:19; Buak. 12:12) Tuetu ne tshibidilu tshia kusambila bua bakuabu, netuikale tuvuluka ne: “Tshisumbu tshijima tshia bana [betu] badi pa buloba tshidi tshituilangana ne makenga a muomumue.” (1 Pet. 5:9) Muanetu wa bakaji Katherine udi mpanda-njila udi wamba ne: “Pantu nsambila bua bakuabu, bitu bimvuluija ne: bobu pabu badi ne ntatu, bingambuluisha mpindieu bua kubenga kusamisha mutu anu bua yanyi ntatu.”

BADI DIJINGA NE MASAMBILA ETU

8. Mbantu kayi batudi mua kusambidila?

⁸ Mbanganyi batudi mua kusambidila? Tudi mua kusambila bua bantu badi basama, bana badibu batatshisha mu kalasa kudi balongi babu, ne bantu badi batata bua bukulakaje. Batu baluisha bena kristo netu ba bungi kudi bena mu mêku abu ne kudi mbulamatadi. (Mat. 10:18, 36; Bien. 12:5) Bakuabu mbashiye nzubu yabu, banyeme bua bimvundu bia malu a tshididi. Banga pabu badi batata bua bipupu bidi bienzeke muaba udibu. Pamuapa katuena bamanye bena Kristo netu aba bimpe to. Kadi patudi tubasambidila, tudi tuleja mutudi tutumikila mukenji wa Yezu wa ‘kunangangane.’​—Yone 13:34.

9. Bua tshinyi tudi ne bua kusambila bua bana betu badi batulombola ne bua bakaji babu?

⁹ Tudi kabidi mua kusambila bua bana betu badi batulombola aba: Bena mu Kasumbu kaludiki ne bana betu badi babambuluisha, bena mu Komite ya Filiale, batangidi ba midimu ku Betele, batangidi ba bijengu, bakulu mu tshisumbu, ne basadidi ba mudimu. Nansha mudi ba bungi ba ku bana betu aba ne yabu ntatu, batu benza mudimu mukole bua kututabalela. (2 Kol. 12:15) Tshilejilu, mutangidi wa tshijengu mukuabu, diende Mark, udi wamba ne: “Lumue lua ku ntatu minene indi nayi, nkuikala kule ne baledi banyi bakadi bakulakaje. Bobu bonso badi basama. Nansha mudi yayanyi ne bayende babatabalela, bitu binsama ku muoyo bua mundi tshiyi nabu pabuipi bua kubambuluisha mudibi bikengela.” Nansha tuetu bamanye ntatu idi bana betu badi benza mudimu mukole aba batuilangana nayi anyi katuyi bayimanye, mbimpe tuikale tusambila bua bualu buabu. (1 Tes. 5:12, 13) Tudi kabidi ne bua kusambila bua bakaji babu bua mudibu bambuluisha babayabu bua kutungunuka ne midimu idibu benza.

10-11. Patutu tusambila bua bana betu mu tshibungi, Yehowa utu usanka anyi? Umvuija.

¹⁰ Anu mutudi bamone, tutu tusambila bua bana betu mu tshibungi bilondeshile nsombelu ne nsombelu. Tshilejilu, nansha tuetu katuyi ne muntu kampanda mu lungenyi, tutu tulomba Yehowa bua kuambuluisha bana betu badi mu maloko anyi bua kukolesha aba badi bafuishe. Mukulu mukuabu, diende Donald, udi wamba ne: “Kudi bana betu ba bungi badi batuilangana ne ntatu. Nunku tutu tusambila bua bana betu mu tshibungi bua katupu nansha umue wa ku badi batata abu muoyo to.”

¹¹ Masambila a nunku atu asankisha Yehowa anyi? Eyowa. Mu kuamba kuimpe, katutu bamanye bintu bisunguluke bitu bana betu nabi dijinga to. Ke bualu kayi, mbimpe kubasambidila mu tshibungi bilondeshile nsombelu ne nsombelu. (Yone 17:20; Ef. 6:18) Kusambila mushindu au kudi kujadika mutudi ‘banange tshisumbu tshijima tshia bana betu.’​—1 Pet. 2:17.

PATUDI TUSAMBILA BUA BAKUABU

12. Mmunyi mudi kutabalela bakuabu kutuambuluisha bua kusambila bua malu masunguluke adibu nawu?

¹² Keba bua kumanya ntatu idibu nayi. Nansha mutudi mua kusambila bua bena Kristo netu badi mu nsombelu mishilashilangane, mbimpe tuikale tusambila kabidi bua muntu, tutela dîna diende. Udi mumanye muntu mu tshisumbu udi utata bua disama dia munanunanu anyi? Udi mumanye nsonga udi mutekete mu mikolo bualu pamuapa balongi babu badi bamutatshisha bua kuenza malu mabi anyi? Udi mumanye muledi udi utata bua kudikoleshila muana “ne mibelu ne didimuija bia Yehowa” anyi? (Ef. 6:4) Wewe ukeba bua kumanya ntatu idi nayi bena Kristo nebe, neubanange bikole ne neuditeke pa muaba wabu; dîba adi nebikusake bua kusambila bikole bua bualu abu.b​—Lomo 12:15.

13. Mmunyi mutudi mua kusambila bua bantu batudi katuyi bamanye bimpe?

¹³ Tela mêna abu. Tudi mua kusambila kabidi bua bantu batudi katuyi banji kutuilangana nabu, tutela mêna abu. Tshilejilu, tudi mua kusambila bua bana betu badibu bele mu maloko mu Crimée, mu Érythrée, mu Russie ne mu Singapour. Wewe mubuele mu jw.org, neupete mêna a bana betu badibu bele mu maloko.c Mutangi wa tshijengu mukuabu, diende Brian, udi wamba ne: “Ndi mumone ne: pantu mfunda dîna dia muena Kristo netu udi mu buloko ne mbala dîna adi ne dîyi dikole, bitu bingambuluisha bua kumuvuluka ne kusambila bua bualu buende.”

14-15. Mmunyi mutudi mua kusambila bua malu masunguluke?

¹⁴ Ikala usambila bua malu masunguluke . Michael utukadi batele udi wamba ne: “Pantu mbala malu a bana betu badibu bele mu maloko adi mu jw.org, ntu nteta kudifuanyikijila mundi mua kumvua bu meme muikale mu nsombelu udibu au. Ndi ngela meji ne: mvua mua kusamisha mutu bua mukajanyi bua kumanya ni udi ne bidiye nabi dijinga. Kudifuanyikijila nsombelu wa bana betu mushindu eu, kutu kungambuluisha bua kusambila bua malu masunguluke bua bana betu badibu bele mu maloko badi bashiye bakaji babu.”​—Eb. 13:3, dim.

¹⁵ Tuetu tuela meji a nsombelu udi nende bana betu mu maloko, tudi mua kupeta malu masunguluke a kulomba mu disambila bua bualu buabu. Tshilejilu, tudi mua kusambila bua balami ba buloko bikale babenzela malu mimpe ne bua banene ba mbulamatadi bikale balekela bana betu batendelela badilekele. (1 Tim. 2:1, 2) Tudi mua kusambila bua tshilejilu tshimpe tshia bana betu badi mu maloko tshikankamije bena Kristo nabu mu bisumbu ne bua bienzedi biabu bimpe bisake bantu badi kabayi bantemu bua kuteleja mukenji wetu. (1 Pet. 2:12) Bushuwa, kuenza nunku nekutuambuluishe kabidi bua kumanya malu masunguluke a kuamba patudi tusambila bua bena Kristo netu badi ne ntatu ya mushindu mukuabu. Tuetu tutabalela bantu, tutela mêna abu patudi tusambila, ne tulomba malu masunguluke bua bualu buabu, netuleje mutudi ‘banangangane bikole.’​—1 Tes. 3:12.

IKALA NE BUPUEKELE PAUDI USAMBILA

16. Mmunyi mutudi mua kuikala ne bupuekele patudi tusambila? (Matayi 6:8)

¹⁶ Anu mutudi bamone, masambila etu adi mua kushintulula nsombelu udi mufikile bana betu. Nansha nanku, mbimpe tuikale ne bupuekele patudi tusambila. Patudi tusambila, katuena tumanyisha Yehowa bualu kampanda budiye kayi muanji kumanya anyi tumuleja mushindu muimpe udiye ne bua kuandamuna masambila etu to. Yehowa mmumanye bintu bidi bena Kristo netu nabi dijinga kumpala mene kua tuetu nabu kubimanya. (Bala Matayi 6:8.) Biobi nanku, bua tshinyi tudi tusambila bua bualu buabu? Pa kumbusha malu atukadi batele mu tshiena-bualu etshi, tudi tusambila bua bualu buabu bualu tutu tutabalela bakuabu. Dinanga ke ditu ditusaka bua kusambila bua bualu buabu. Yehowa utu usanka bikole padiye umona mudi bena mudimu bende banangangane.

17-18. Fila tshilejilu tshidi tshileja bua tshinyi tudi tusambila bua bakuabu.

¹⁷ Nansha biobi bimueneke bu ne: masambila etu ki mmashintulule nsombelu udi mufikile bana betu, kadi adi aleja ne: tudi babanange, ne Yehowa pende mmuteleje masambila etu au. Bua kumvua bualu ebu bimpe, fuanyikija ne: mu dîku kampanda mudi kana ka balume ne ka bakaji. Kadi kana ka balume kadi kasama. Ka bakaji kadi kambila papa waku ne: “Papa, keba koku tshia kuenza, udi usama bikole.” Kadi Tatu ukadi mumane kukeba tshia kuenza bua bamuondope. Nansha mudiye munange kana kende ka balume aku ne ukatabalela, udi usanka bikole padiye umona kana kende ka bakaji kasamisha mutu bua muanabu udi usama ne kamulomba bua akebe tshia kuenza bua muanabu umvue bimpe.

¹⁸ Ke tshitu Yehowa utulomba bua kuenza. Udi utulomba bua tuikale tutabalelangana ne tusambidilangana. Tuetu tuenza nanku, netuleje ne: tudi tusamisha mutu bikole bua bakuabu ne Yehowa neateleje masambila etu au. (2 Tes. 1:3; Eb. 6:10) Anu bu mutudi bamone, kudi misangu idi masambila etu mua kushintulula nsombelu udi mufikile bakuabu. Ke bualu kayi, mbimpe tuikale tuvuluka bua kusambidilangana.