TSHIENA-BUALU TSHIA KULONGA 42
MUSAMBU WA 44 Kulomba kua muntu mupuekele
Mua kusambila ne muoyo mujima
“ Ndi mbikila ne muoyo wanyi mujima. Ngandamuna, Yehowa wanyi.” —MIS. 119:145.
LUNGENYI LUNENE
Kuelangana meji a masambila adi mafunda mu Bible kudi kutuambuluisha bua kusambila ne muoyo mujima.
1-2. a) Ntshinyi tshidi mua kutupangisha bua kusambila ne muoyo mujima? b) Ntshinyi tshidi tshileja ne: Yehowa utu uteleja milombu yetu?
KUTU misangu iukadi mudimone wambulula malu amue amue mu masambila, kuyi wambila Yehowa muudi udiumvua menemene anyi? Bualu ebu budi mua kutuenzekela bonso. Bu mutudi ne bia bungi bia kuenza, tudi mua kushala tuenza anu masambila mîpi. Peshi bidi mua kutukolela bua kuambila Yehowa mutudi tudiumvua bualu tudi tudimona katuyi bakumbane bua kumusambila to.
2 Bible udi uleja ne: tshidi ne mushinga kudi Yehowa nkusambila ne muoyo mujima ne budipueshi, kadi ki nkusambila mu mushindu kampanda wa pa buawu to. Udi uteleja “kulomba kua bena bupuekele.” (Mis. 10:17) Udi uteleja masambila etu ne muoyo mujima bualu mmutunange.—Mis. 139:1-3.
3. Nnkonko kayi ituandamuna mu tshiena-bualu etshi?
3 Netuandamune nkonko eyi mu tshiena-bualu etshi: Mmunyi mutudi mua kusambila ne muoyo mujima? Tshia kuenza ntshinyi bua masambila etu atusemeje pabuipi ne Yehowa? Mmunyi mudi kuelangana meji a masambila adi mafunda mu Bible kutuambuluisha bua kusambila ne muoyo mujima? Tshia kuenza ntshinyi tuetu bapange mua kumvuija Yehowa lutatu luetu mu disambila? Tuandamunayi nkonko eyi.
IKALA USAMBILA NE MUOYO MUJIMA
4. Ntshinyi tshidi mua kutuambuluisha bua kusambila ne muoyo mujima? (Misambu 119:145)
4 Tuetu tumona Yehowa bu mulunda wetu udi musue diakalenga dietu, netumusambile ne muoyo mujima. Ke muvua mufundi wa Misambu 119 umona Yehowa pavuaye umusambila. Uvua ne yende ntatu. Tshilejilu, kuvua bantu bavua bamutangalajila malu a dishima. (Mis. 119:23, 69, 78) Uvua kabidi mutekete mu mikolo bua bilema bivuaye wenza. (Mis. 119:5) Nansha nanku, kavua utshina bua kusambila ne muoyo mujima to.—Bala Misambu 119:145.
5. Bua tshinyi ki mbimpe kulekela tunyinganyinga tutupangisha bua kusambila? Fila tshilejilu.
5 Yehowa udi ulomba too ne badi benza mpekatu minene bua bamusambile. (Yesh. 55:6, 7) Nanku katulekedi tunyinganyinga tutupangisha bua kusambila to. Tuangate tshilejilu etshi: muendeshi wa ndeke utu mumanye ne: udi ne bua kuyukila ne bantu badi panshi badi ne mudimu wa kumuambila tshia kuenza padiye dijinga ne diambuluisha. Yeye mujimine anyi muenze tshilema ne mutuadije kudiela meji, udiku ne bua kubenga kubalomba diambuluisha anyi? Nansha kakese! Bia muomumue, nansha tuetu katuyi bamanye tshia kuenza anyi benze mpekatu, mbimpe tusambile ne muoyo mujima.—Mis. 119:25, 176.
TSHIA KUENZA BUA MASAMBILA ETU ATUSEMEJE PABUIPI NE YEHOWA
6-7. Mmunyi mudi kuelangana meji a ngikadilu ya Yehowa kuenza bua masambila etu atusemeje pabuipi nende? Fila tshilejilu. (Tangila kabidi dimanyisha dia kuinshi kua dibeji.)
6 Tuetu tusambila ne muoyo mujima, tuambila Yehowa mutudi tudiumvua menemene, netusemene pabuipi nende. Tshia kuenza ntshinyi bua kusambila ne muoyo mujima?
7 Elangana meji a ngikadilu ya Yehowa.a Wewe muenze nanku, newikale mukumbane bua kumuambila muudi udiumvua. (Mis. 145:8, 9, 18) Tuangatabi tshilejilu tshia Kristine. Tatuende uvua muntu wa tshikisu. Bua bualu abu, bivua bimukolele bua kumusambila ne kumona Yehowa bu tatu wa dinanga. Uvua kabidi umona ne: bua bilema bivuaye wenza, Yehowa kavua mua kumunanga to. Tshiakamuambuluisha ntshinyi? Udi wamba ne: “Ngakelangana meji a dinanga dia lulamatu dia Yehowa, meme kumona ne: mmunange. Ndi mutuishibue ne: kakundekela to. Nansha meme muenze bilema, neikale anu munnange ne neangambuluishe. Mbingambuluishe bua kumuambila malu adi ansankisha ne adi abungamija.”
8-9. Kudianjila kulongolola tshia kuamba mu disambila kudi ne mushinga kayi? Fila tshilejilu.
8 Longolola tshia kuamba. Kumpala kua kusambila, mbimpe kudiela nkonko bu mudi eyi: ‘Ndutatu kayi lundi nalu? Kudi muntu udi mungenzele tshilema undi ne bua kubuikidila anyi? Kudi lutatu ludi lunkuate matuku abidi aa ludi lukengela ne: Yehowa angambuluishe anyi?’ (2 Bak. 19:15-19) Tuetu tuela meji a tshia kuambila Yehowa patudi tusambila bua dîna diende, bua Bukalenge buende, ne bua disua diende, tudi tuidikija mushindu uvua Yezu mutulongeshe bua kusambila.—Mat. 6:9, 10.
9 Pakamanya muanetu wa bakaji mukuabu diende Aliska ne: bayende uvua ne kansere ka mu buongo kavua ne bua kumushipa mu matuku makese, biakamukolela bua kusambila. Udi wamba ne: “Bua bukole bua lutatu alu, pamvua ntuadija kusambila mvua mpanga tshia kuamba.” Monayi tshiakamuambuluisha. Udi wamba ne: “Kumpala kua kusambila, ntu ndongolola tshia kuambila Yehowa bua tshikadi anu nsambila buanyi meme ne bua disama dia bayanyi to. Bualu ebu mbuenze bua ngikale mutukije ne nsambile bua malu mashilashilangane.”
10. Bua tshinyi mbimpe kusambila mutantshi mule? (Tangila kabidi bimfuanyi.)
10 Sambila mutantshi mule. Nansha mudi masambila mîpi atusemeja pabuipi ne Yehowa, tuetu tusambila mutantshi mule netuambile Yehowa ntatu yetu yonso.b Elijah bayende wa Aliska udi wamba ne: “Ntu nsambila misangu ya bungi ku dituku, ndi musemene pabuipi ne Yehowa bualu ntu ngenza masambila male. Yehowa katu upanga lutulu pantu nsambila to, ke bualu kayi ntu nsambila mutantshi mule.” Wewe pebe, keba tshikondo ne muaba udi kawuyi ditanaji uudi mua kusambila, pamuapa ne dîyi dikole, ne wikale ne tshibidilu tshia kusambila mutantshi mule.
Keba dîba ne muaba uudi mua kusambila kakuyi ditanaji to (Tangila tshikoso tshia 10)
ELANGANA MEJI A MASAMBILA ADI MAFUNDA MU BIBLE
11. Mmunyi mudi kuelangana meji a masambila adi mafunda mu Bible kutuambuluisha? (Tangila kabidi kazubu ka “Nsombelu webe mmufuanangane ne wabu anyi?”)
11 Kuelangana meji a malu avua batendeledi ba Yehowa ba kale bambe mu masambila abu ne mu misambu yabu idi mifunda mu Bible kudi mua kukuambuluisha. Wewe mumone muvuabu bambile Nzambi muvuabu badiumvua, newenze biebe bia muomumue. Udi kabidi mua kupetamu biambilu bia kutumbisha nabi Nzambi biudi mua kutela mu masambila ebe. Pamuapa neumone ne: malu avuabu balombe mu masambila abu adi apetangana ne audi biebe ujinga kulomba.
12. Patudi tubala disambila kampanda didi difunda mu Bible, nnkonko kayi itudi mua kudiela?
12 Patudi tubala disambila kampanda didi difunda mu Bible, tudiebeje ne: ‘Nnganyi uvua muenze disambila edi? Uvua mu nsombelu kayi? Malu adiye mulombe aa ke andi bianyi njinga kulomba anyi? Disambila diende didi dindongesha tshinyi?’ Bua kupeta mandamuna a nkonko eyi, bidi mua kukulomba bua kuenza makebulula. Tuangatabi bilejilu ebi.
13. Disambila divua Hana muenze didi ditulongesha tshinyi? (1 Samuele 1:10, 11) (Tangila kabidi tshimfuanyi tshia pa tshizubu.)
13 Bala 1 Samuele 1:10, 11. Pavua Hana muenze disambila edi, uvua mu ntatu minene ibidi. Lua kumpala, kavua mulele to. Luibidi, mukenende uvua umusendeka. (1 Sam. 1:4-7) Biwikala ne lutatu lua munanunanu, disambila dia Hana edi didi mua kukulongesha tshinyi? Hana wakapeta disulakana pakasambilaye mutantshi mule, upuila Nzambi ntatu yende. (1 Sam. 1:12, 18) Tudi bietu mua kupeta disulakana tuetu ‘tupuila Yehowa bujitu buetu,’ tuambe ne: tumuambila mutudi tumvua menemene bua ntatu yetu.—Mis. 55:22.
Pavua Hana ne lutatu lua dibenga kulela ne lua dimusendeka kudi mukenende, wakasambila kupuilaye Yehowa ntatu yende ayi (Tangila tshikoso tshia 13)
14. a) Tshilejilu tshia Hana tshidi tshitulongesha tshinyi? b) Mmunyi mudi kuelangana meji a masambila adi mafunda mu Bible kutuambuluisha bua kumanya bia kuamba mu masambila etu? (Tangila dimanyisha dia kuinshi kua dibeji.)
14 Bidimu ndambu Hana mumane kulela Samuele, wakaya kumufila kudi muakuidi munene Eli. (1 Sam. 1:24-28) Pavuaye musambile, uvua muleje Yehowa dianyisha bualu ukavua mumone muvuaye mulame batendeledi bende ba lulamatu ne mubatabalele.c (1 Sam. 2:1, 8, 9) Pamuapa ntatu ivuaye nayi kumbelu kayakajika to, kadi wakatuishila mêsu pa mushindu uvua Yehowa mumuambuluishe. Dilongesha didi ne: tuetu tuimanyina pa mushindu udi Yehowa mutuambuluishe, netutantamene ntatu yetu bipepele.
15. Disambila dia muprofete Yelemiya didi ditulongesha tshinyi? (Yelemiya 12:1)
15 Bala Yelemiya 12:1. Umue musangu biakatonda muprofete Yelemiya pakamonaye bantu babi baya kumpala ne bua muvua bena Isalele nende bamukengesha. (Yel. 20:7, 8) Bidi mua kututonda bietu patudi tumona bantu babi baya kumpala anyi padi bakuabu batukengesha. Nansha muvuabi bitonde Yelemiya, kakamona dilumbuluisha dia Yehowa kadiyi diakane to. Pavuaye mumone muvua Yehowa munyoke bantu bende bavua bamutombokele, uvua ne bua kuikala mutuishibue ne: Yehowa mmulumbuluishi muakane. (Yel. 32:19) Tudi bietu mua kuleja Yehowa malu adi matutonde mu disambila, batuishibue ne: neaajikije mu tshikondo tshiakanyine.
16. Nsombelu wetu yeye utupangisha bua kuenza amue malu, ntshinyi tshidi disambila dia muena Lewi mukuabu ditulongesha? (Misambu 42:1-4) (Tangila kabidi bimfuanyi.)
16 Bala Misambu 42:1-4. Musambu eu bavua bawufunde kudi muena Lewi mukuabu uvua kayi ne mushindu wa kutendelela pamue ne bena Isalele nende bakuabu to. Mmufunde muvuaye udiumvua. Tudi bietu mua kudiumvua anu bu yeye tuetu katuyi ne mushindu wa kumbuka kumbelu pamuapa bualu tudi tusama anyi bobu batuele mu buloko bua ditabuja dietu. Meji etu adi mua kulubakana, kadi mbimpe tuleje Yehowa mutudi tumvua mu disambila. Nebituambuluishe bua kumanya mutudi tumvua ne kumona malu mudiye uamona. Tshilejilu, muena Lewi au uvua ne ditekemena dia kulua kutumbisha kabidi Yehowa. (Mis. 42:5) Uvua kabidi muvuluke muvua Yehowa mumulame. (Mis. 42:8) Tuetu tusambila ne muoyo mujima, netumanye tshidi meji etu, netutukije, ne netupete bukole bua kunanukila mu ntatu.
Muena Lewi uvua mufunde Misambu 42 wakambila Yehowa muvuaye umvua. Patudi bietu tusambila tuambila Yehowa mutudi tumvua, netumone lutatu luetu mudiye ulumona (Tangila tshikoso tshia 16)
17. a) Disambila divua muprofete Yona muenze didi ditulongesha tshinyi? (Yona 2:1, 2) b) Mmunyi mudi bimue biambilu bidi mu mukanda wa Misambu mua kutuambuluisha patudi mu lutatu? (Tangila dimanyisha dia kuinshi kua dibeji.)
17 Bala Yona 2:1, 2. Muprofete Yona wakenza disambila edi pavuaye munda mua mushipa. Uvua mutuishibue ne: Yehowa uvua ne bua kumutuleja nansha muvuaye muanji kubenga kumutumikila. Mmutele biambilu bia bungi bia mu mukanda wa Misambu pavuaye usambila.d Pamuapa uvua mumanye mêyi a mu Musambu au bimpe. Pavuaye muelele meji, wakatuishibua ne: Yehowa uvua ne bua kumuambuluisha. Tuetu bietu bakuate imue mvese ya mu mukanda wa Misambu ku muoyo, netuyivuluke patudi mu ntatu ne neyitukankamije patudi tuyitela mu masambila etu.
TUNGUNUKA NE KUSAMBILA BUA KUSEMENA PABUIPI NE YEHOWA
18-19. Tuetu bapange tshia kuamba mu disambila, ndikankamija kayi didi mu Lomo 8:26, 27? Fila tshilejilu.
18 Bala Lomo 8:26, 27. Kudi misangu idi lutatu luetu lutupangisha mua kuambila Yehowa mutudi tudiumvua. Kadi katuena balekelela to. Mu bikondo bia nanku, nyuma muimpe wa Nzambi udi “ulomba” pa muaba wetu. Yehowa uvua mupeshe bantu bende nyuma wende bua bafunde masambila a bungi mu Dîyi diende. Patudi katuyi bamanye tshia kuamba mu disambila, Yehowa udi umona masambila au bu adi afumina kutudi ne udi uandamuna.
19 Lungenyi elu luakakankamija Yelena, muanetu wa bakaji wa mu Russie. Bavua bamukuate bualu uvua usambila ne ubala Bible. Bua bungi bua kanyinganyinga kavuaye nanku, wakapanga tshia kuamba mu disambila. Udi wamba ne: “Ke meme kuvuluka ne: pamvua mpanga tshia kuamba mu disambila bua lutatu luanyi, Yehowa uvua umona masambila adiye mufundishe mu Dîyi diende . . . bu milombu ivua ifumina kundi. . . . Kumanya bualu ebu kuakankankamija mu tshikondo tshimvua mu lutatu lukole.”
20. Mmunyi mutudi mua kulongolola tshia kuamba mu disambila patudi mu lutatu?
20 Patudi mu lutatu, tudi mua kupanga mua kusambila. Bua bualu abu, kumpala kua kusambila, mbimpe tuteleje mêyi makuata a mu mukanda wa Misambu. Tudi kabidi mua kufunda mutudi tumvua, anu bu muvua mukalenge Davidi mufunde. (Mis. 18, 34, 142; mutu wa mukanda.) Kakuena mukenji udi utangila mutudi mua kulongolola tshia kuamba mu masambila etu to. (Mis. 141:2) Enza wewe tshidi tshipepele kuudi.
21. Bua tshinyi mbimpe tusambile ne muoyo mujima?
21 Kumanya ne: Yehowa udi umvua mutudi tudiumvua kumpala mene kua kusambila kudi kutukolesha. (Mis. 139:4) Nansha nanku, udi usanka patudi tumuambila mutudi tumvua ne mutudi bamueyemene. Nanku, kuelakanyi bua kusambila tatuebe wa mu diulu to. Enza bua masambila adi mu Bible akuambuluishe bua kumanya tshia kuamba, ne wikale usambila ne muoyo mujima. Muambila malu adi akusankisha ne adi akubungamija. Bu mudiye mulunda webe mulelela, kakukulekela to!
MUSAMBU WA 45 Meji andi ngelangana mu muoyo wanyi
a Bala malu adi mu tshiena-bualu tshia “Yehowa” mu tshitupa tshia “Imue ngikadilu milenga ya Yehowa” mu mukanda wa Mvese idi itangila nsombelu wa buena Kristo.
b Masambila menza mu dîna dia tshisumbu adi ne bua kuikala mîpi menemene.
c Pavua Hana usambila, wakatela biambilu bifuanangane ne bivua Mose mufunde. Bidi bimueneka ne: uvua mumanye bimpe Mifundu minsantu. (Dut. 4:35; 8:18; 32:4, 39; 1 Sam. 2:2, 6, 7) Bidimu nkama ya bungi pashishe, Mariya, muamuende wa Yezu, wakamba mêyi a kutumbisha nawu Nzambi mafuanangane ne avua Hana muambe.—Luka 1:46-55.
d Tshilejilu, fuanyikija Yona 2:3-9 ne Misambu 69:1; 16:10; 30:3; 142:2, 3; 143:4, 5; 18:6; pashishe ne 3:8. Mushindu udi mvese eyi milondangane, ke udi malu avua Yona muambe mu disambila diende malondangane.