Dinanga dia Nzambi didi dishalaku kashidi

1-2. Ndutatu kayi ludi bena Kristo ba bungi batuilangana nalu?

TUTETAYI kudifuanyikijila tshitu tshienzekela mazuwa pa mâyi, dîba didi tshipepele tshikole tshituadija kututa. Mavuala makole atu atuadija kuanyukula ne aatume kuonso kudiwu aya, bipangisha ne baendeshi bua kualudika bimpe. Bua kuimanyika mazuwa dîba dia nanku, batu bela luongo mu mâyi. Luongo lutu luambuluisha mazuwa bua kubenga kupambuka.

² Paudi utuilangana ne ntatu, udi anu bu mazuwa au. Udi mua kupanga bua kuteka meji kaba kamue. Lelu udi mua kuikala mutuishibue ne: Yehowa mmukunange ne udi ukuambuluisha; malaba bishintuluka ukadi udiebeja bua kumanya Yehowa ni udi umona ntatu iudi nayi. (Mis. 10:1; 13:1) Imue misangu mulunda webe udi mua kukuambila bualu budi mua kukukolesha, bienza bua udiumvue bimpe bua tshikondo kampanda. (Nsu. 17:17; 25:11) Kadi pashishe udi mua kutuadija kuelakana kabidi. Udi mene mua kutuadija kuela meji ne: Yehowa kena ukuangata kabidi ne mushinga anyi ne katshiena mukunange to. Ntshinyi tshidi mua kukuambuluisha paudi utuilangana ne nsombelu wa nunku? Mu mêyi makuabu, mmunyi mudi mua kuikala mutuishibue ne: Yehowa mmukunange ne neakuambuluishe?

3. “Dinanga dia lulamatu” didibu bakuile mu Misambu 31:7 ne mu 136:1 didi diumvuija tshinyi? Bua tshinyi tudi tuamba ne: Yehowa ke mulejanganyi wa dinanga dia lulamatu munene? (Tangila kadidi tshimfuanyi.)

³ Tshimue tshia ku bintu bidi mua kukuambuluisha bua kushala mushindame paudi utuilangana ne ntatu, nkuvuluka mudi Yehowa ne dinanga dia lulamatu. (Bala Misambu 31:7; 136:1.) Tshiambilu tshidibu bakudimuna ne: “dinanga dia lulamatu” tshidi ne lungenyi lua dinanga dikole ne lulamatu bitu nabi muntu bua mukuabu. Yehowa ke mulejanganyi wa dinanga dia lulamatu munene. Bible udi wamba ne: “Mmuwule tente ne dinanga dia lulamatu.” (Ekes. 34:6, 7) Bible udi wamba kabidi bua Yehowa ne: “Udi muwule tente ne dinanga dia lulamatu kudi bonso badi bakubila.” (Mis. 86:5) Ela meji a tshidi mvese eyi yamba: Yehowa katu ulekela batendeledi bende ba lulamatu nansha! Kuvuluka ne: Yehowa udi ne lulamatu kudi mua kukuambuluisha kushala mushindame paudi utuilangana ne ntatu.​—Mis. 23:4.

VULUKA NE: DINANGA DIA YEHOWA NDILONGESHA DIA NSHINDAMENU DIA MU BIBLE

4. Tela amue malongesha a nshindamenu a mu Bible. Umvuija bua tshinyi tudi tuitaba ne muoyo mujima.

⁴ Tshintu tshikuabu tshidi mua kutuambuluisha bua kushala bashindame patudi tutuilangana ne ntatu nkuvuluka ne: dinanga dia Yehowa dia lulamatu ndilongesha dia nshindamenu dia mu Bible. Padibu bakula bua “dilongesha dia nshindamenu dia mu Bible” ntshinyi tshidi tshikuluila mu lungenyi? Pamuapa udi utuma meji ku malongesha manene a mu Dîyi dia Nzambi audi mulonge. Tshilejilu, uvua mulonge ne: dîna dia Nzambi n’Yehowa, Yezu mmuana mulelela umue wa Nzambi, bafue ki mbamanye bualu nansha bumue, ne uvua mulonge kabidi ne: buloba nebulue mparadizu ne bantu nebasombapu bua kashidi. (Mis. 83:18; Muam. 9:5; Yone 3:16; Buak. 21:3, 4) Pawakitabuja ne: malongesha aa mmalelela, kabivua kabidi bipepele bua muntu kukufikisha kudialekela to. Bua tshinyi? Bualu uvua mufike kudimona ne: malongesha au mmashindamena pa malu malelela. Kuangata dinanga dia Yehowa bu dilongesha dia nshindamenu kudi mua kutuambuluisha bua kumbusha meji a ne: Yehowa kena utumona anyi ne: kena ututabalela patudi mu ntatu to. Tumonayi bualu abu.

5. Leja mudi muntu mua kufika kudilekela malongesha a dishima.

⁵ Ntshinyi tshivua tshikuambuluishe bua kulekela malongesha a dishima pauvua mutuadije kulonga Bible? Pamuapa uvua mutuadije kufuanyikija malu avuabu bakulongeshe mu tshitendelelu tshienu ne adi Bible ulongesha. Tuangatabi tshilejilu tshimue patupu. Tutekabi ne: uvua witabuja mudi Yezu Nzambi wa bukole buonso. Mpindieu pawakalonga Bible, wakadiebeja ne: ‘Dilongesha edi ndilelela anyi?’ Kadi wewe mumane kulonga tshidi Bible wamba bua bualu abu, wakafika kudimanya ne: Yezu ki nNzambi to. Pashishe wakalekela malongesha a dishima, wewe kuitabuja malongesha malelela a mu Bible aa: Yezu ‘mmuanabute wa bifukibua bionso,’ ne ‘mMuana mulela umuepele wa Nzambi.’ (Kolos. 1:15; Yone 3:18) Bushuwa, malongesha a dishima adi mua kuikala akadi ‘mele miji bikole menemene,’ kabiyi bipepele bua kuatonkola to. (2 Kol. 10:4, 5) Kadi pawakamanya bulelela, wakalekela malongesha a dishima.​—Filip. 3:13.

6. Bua tshinyi udi ne bua kuitabuja ne: ‘dinanga dia Yehowa dia lulamatu didi dishalaku kashidi’?

⁶ Tudi ne bua kuenza bia muomumue bua tshidi Bible utulongesha bua dinanga dia Yehowa. Wewe mupete meji a ne: Yehowa ki mmukunange paudi mu lutatu, mbimpe udiebeje ne: ‘Mundi ngela meji emu mmuomu anyi?’ Fuanyikija ngelelu webe wa meji au ne mêyi adi mu mvese wetu wa nshindamenu wa Misambu 136:1. Bua tshinyi Yehowa udi wamba ne: dinanga diende ndia “lulamatu”? Bua tshinyi mbambulule tshiambilu tshia ne: “dinanga diende dia lulamatu didi dishalaku kashidi” misangu 26 mu Misambu 136? Anu mutukadi bamone, dinanga dia lulamatu didi Yehowa munange bantu bende ndilongesha dia nshindamenu dia mu Bible, anu mudi malongesha makuabu a mu Dîyi dia Nzambi auvua muitabe bipepele. Ngelelu wa meji wa ne: Yehowa ki mmukunange anyi kena ukuangata ne mushinga ngua dishima. Epuka ngelelu wa meji au, anu muutu wepuka malongesha makuabu a dishima.

7. Fila bimue bilejilu bia mu Bible bidi bikujadikila ne: Yehowa mmukunange.

⁷ Mu Bible mudi bilejilu bia bungi bidi bileja ne: Yehowa mmutunange. Tshilejilu, Yezu wakambila bayidi bende ne: “Nudi ne mushinga wa bungi kupita mishamisha ya bungi.” (Mat. 10:31) Yehowa pende wakambila bantu bende ne: “Nenkukoleshe, eyowa, nenkuambuluishe, nenkukuate bushuwa ne tshianza tshianyi tshia balume tshia buakane.” (Yes 41:10) Mona mudibu baleje malu aa patoke. Yezu kavua muambe ne: ‘Nudi pamuapa mua kuikala ne mushinga wa bungi to,’ ne Yehowa pende kavua muambe ne: ‘ndi pamuapa mua kukuambuluisha to.’ Kadi Yezu uvua muambe ne: “Nudi ne mushinga wa bungi” ne Yehowa pende uvua muambe ne: “Nenkuambuluishe.” Wewe mupete meji a ne: Yehowa ki mmukunange paudi utuilangana ne ntatu, mvese eyi idi mua kukuambuluisha bua kudiumvua bimpe, ne bua kuikala mutuishibue ne: mmukunange. Mvese eyi mmimanyine pa malu malelela. Wewe musambile ne muambile Yehowa muudi ne dielakana ne wewe muelangane meji a mvese eyi, newikale mukumbane bua kuamba mêyi adi mu 1 Yone 4:16 a ne: “Tudi bafike ku dimanya ne bitabuje dinanga didi Nzambi nadi buetu tuetu.”a

8. Ntshinyi tshiudi mua kuenza biobi bikufikile imue misangu bua kuela meji ne: Yehowa ki mmukunange?

⁸ Kadi ntshinyi tshiudi mua kuenza biobi bikufikila imue misangu bua kuela meji ne: Yehowa ki mmukunange? Fuanyikija meji au ne tshiudi mumanye bua Yehowa. Mushindu udi muntu udiumvua udi mua kushilangana ne mudi malu mu bulelela; kadi pabi bulelela budi Bible utulongesha mbua ne: Yehowa mmutunange. Wewe ubenga kuitaba ne: Yehowa mmutunange, bidi bileja ne: udi mupue muoyo ne: ngikadilu wende mutambe bunene ndinanga.​—1 Yone 4:8.

ELENGANA MEJI A MUDI YEHOWA ‘MUKUNANGE BIKOLE’

9-10. Pavua Yezu muambe mêyi adi mu Yone 16:26, 27, a ne: “Tatu muine mmununange bikole,” uvua usua kuamba tshinyi? (Tangila kabidi tshimfuanyi.)

⁹ Tuetu bakonkonona mêyi a Yezu a ne: “Tatu muine mmununange bikole,” netumanye malu a bungi adi atangila dinanga dia Yehowa. (Bala Yone 16:26, 27.) Yezu kavua muambe mêyi aa bua kuafunya bayidi bende ku matshi to. Patudi tubala mvese idi kuulu kua tshiambilu etshi, tudi tumona ne: Yezu kavua wakula bua mushindu uvua bayidi bende bumvua to. Kadi uvua wakula bua disambila.

¹⁰ Yezu wakambila bayidi bende bua kusambila mu dîna diende kadi ki mbua bamusambile yeye to. (Yone 16:23, 24) Bivua ne mushinga wa bungi bua bamanye bualu ebu. Panyima pa dibishibua diende ku lufu, pamuapa bayidi bende bakapeta meji a kumusambila. Tuamba eku tuela eku, Yezu uvua mulunda wabu. Nunku bavua pamuapa bele meji ne: bu muvuaye mubanange bikole, uvua ne bua kuteleja masambila abu ne kubalombela kudi Tatu wende bua abambuluishe. Kadi Yezu wakabambila bua kabedi meji nanku musangu nansha umue to. Bua tshinyi? Bualu wakabambila ne: “Tatu muine mmununange bikole.” Bualu ebu mbumue bua ku malongesha malelela a nshindamenu adi mu Bible adi atangila disambila. Ela meji a mudi bualu ebu bukutangila. Pauvua mulonge Bible, wakafika ku dimanya Yezu ne ku dimunanga. (Yone 14:21) Kadi anu bu bayidi ba mu bidimu lukama bia kumpala, udi mua kasambila Yehowa ne dishindika dionso, mumanye ne: yeye ‘muine mmukunange bikole.’ Misangu yonso iudi usambila udi uleja muudi witabuja mêyi aa. ​—1 Yone 5:14.

MANYA KUDI DIELAKANA DIEBE DIFUMINA

11. Bua tshinyi kuela meji ne: Yehowa ki mmutunange kudi kusankisha Satana?

¹¹ Nkuepi kudi meji a ne: Yehowa ki mmutunange afumina? Tshitupa tshia diandamuna tshidi ne: adi afumina kudi Satana. Bu mudiye ‘ukeba bua kutudia,’ neasanke tuetu batuadije kuela meji ne: Yehowa ki mmutunange to. (1 Pet. 5:8) Mu bulelela, Yehowa wakafila tshia kupikulangana natshi bualu mmutunange. Kadi Satana mmusue bua tudimone katuyi batshikumbanyine to. (Eb. 2:9) Nanku nnganyi utuasankisha tuetu batuadije kuela meji ne: Yehowa ki mmutunange? Netusankishe Satana. Nnganyi utuasankisha tuetu batekete mu mikolo ne balekele Yehowa? Anu yeye Satana au. Satana mmusue bua tuele meji ne: Yehowa ki mmutunange to, kadi kabiena nanku to. Mu bulelela, yeye ke udi Yehowa kayi munange to. Tshimue tshia ku ‘bienzedi biende bia budimu’ bitambe bunene tshidi ne: mmusue kutufikisha ku dimona ne: Yehowa ki mmutunange tuetu to ne mmutubenge. (Ef. 6:11) Bu mutudi bamanye tshidi muluishi wetu Diabolo ukeba kutufikisha ku diela meji etshi, tudisuikayi bua ‘kumukandamena.’​—Yak. 4:7.

12-13. Mmunyi mudi dipanga bupuangane ditufikisha ku diela meji ne: Yehowa ki mmutunange?

¹² Dipanga bupuangane didi mua kutufikisha padi ku diela meji ne: Yehowa ki mmutunange to. (Mis. 51:5; Lomo 5:12) Mpekatu mmutusemeje kule ne Mufuki wetu; mmunyange kabidi meji etu, muoyo wetu, ne mubidi wetu.

¹³ Mpekatu mutufikishe ku didimona mu mushindu mubi, katuyi mu bukubi, ku didipisha, ku disamisha mutu, ne ku didiumvua bundu. Ke mutudi mua kudiumvua tuetu benze mpekatu. Tudi kabidi mua kumvua nanku tuetu tutuma meji ku dipanga dietu dia bupuangane didi dishilangane ne tshivua Yehowa mutufukile bua kuikala. (Lomo 8:20, 21) Anu mutu mashinyi adi ne lukata lufue kaayi mua kuenda bimpe, dipanga dietu dia bupuangane didi ditupangisha bua kuikala kuenza malu mimpe. Bua bualu abu, meji a ne: Yehowa ki mmutunange adi mua kutuluila. Owu matuluile, tuvuluke ne: Yehowa udi ‘Nzambi munene udi ukemesha, udi uleja dinanga diende dia lulamatu kudi badi bamunange ne balama mêyi ende.’​—Neh. 1:5.

14. Bua tshinyi kuelangana meji a tshia kupikulangana natshi kudi kutujadikila ne: Yehowa mmutunange? (Lomo 5:8) (Tangila kabidi kazubu ka “Dikuba ku ‘bukole bua dishima budi nabu mpekatu.’”)

¹⁴ Kudi misangu itudi mua kudimona katuyi bakumbanyine dinanga dia Yehowa to. Mu kuamba kuimpe, katuena badikumbanyine to; ke bualu kayi, dinanga diende ndia pa buadi. Kakuena tshitudi mua kuenza bua kukumbanyina dinanga dia Yehowa to. Nansha nanku, tshia kupikulangana natshi tshidi tshibuikila mpekatu yetu. Yehowa wakatshifila bualu mmutunange. (1 Yone 4:10) Tuvuluke kabidi ne: Yezu wakalua bua kusungila benji ba mpekatu, kadi ki mbantu bapuangane to. (Bala Lomo 5:8.) Muntu nansha umue kena mua kuenza malu mapuangane to, Yehowa kena mene utulomba bua kuenza malu mapuangane to. Bu mutudi bamanye ne: dipanga bupuangane didi mua kutufikisha ku diela meji ne: Yehowa ki mmutunange, tudisuikayi bua kubenga kuela meji nanku.​—Lomo 7:24, 25.

DISUIKA BUA KUSHALA NE LULAMATU

15-16. Tuetu bashale ne lulamatu, Yehowa neatuenzele tshinyi? Bua tshinyi? (2 Samuele 22:26)

¹⁵ Yehowa mmusue bua tuangate dipangadika dimpe dia kushala ‘bamulamate bikole.’ (Dut. 30:19, 20) Tuetu bamulamate, neashale pende mutulamate. (Bala 2 Samuele 22:26.) Dîba adi, neatuambuluishe mu ntatu yetu.

¹⁶ Tudi balonge ne: kudi malu a bungi adi atusaka bua kushala ne lulamatu mu ntatu. Bible udi ulongesha ne: Yehowa mmutunange ne neatuambuluishe. Nanku meji a ne: Yehowa ki mmutunange owu matuluile, tuimanyine pa tshidi Bible ulongesha etshi pamutu pa kuimanyina pa meji atudi tuetu tuela. Tushalayi batuishibue ne: dinanga dia Yehowa dia lulamatu didi dishalaku kashidi.