Tudi batangile ku nshikidilu wa bionso bia panu anyi? Bible mmulaye kabutu ka bionso bidiku anyi?
Patubu batela muaku “kabutu,” tshitu tshikuvuila mu mutu ntshinyi? Utu utuma meji ku njiwu ya ikuata buloba bujima ya mifuane kubutula pamuapa bionso bidipu ne muoyo anyi? Bakuabu badi bela meji ne: ke kutuafikila, nangananga bua padibu babala ngumu bu mudi idi ilonda eyi:
“Bidi bimueneka anu ne: mvita ya bingoma binene bia bombe ya mbutula mmifuane kuenzeka nansha ku bukole, ku mpukampuka, anyi ku dipanga kumvua bakuabu bimpe.”—Bulletin of the Atomic Scientists.
“Mu bidimu 10 bishale, kudi misangu bungi tshianana pa buloba bujima idi mvula ya bipepele bikole itu ibutula bintu miloke, metu moshike ne kapia, minanga miye, bishishi bia mu mâyi bikengakana bua mâyi adi akuata luya, miunya anyi luya lukole, ne mâyi mapasalale.”—National Geographic.
“Kukadi bidimu bia bungi bidi mpasu ya mikumbi inyangakaja bintu bikole mu Afrike.”—The Associated Press.
Buloba bujima ebu nebubutudibue anyi? Bible udi wamba tshinyi?
Dibulunge dietu dia buloba edi nedibutuke anyi?
Tòo. Bible, Dîyi dia Nzambi udi utujadikila ne: buloba nebushalaku kashidi. (Muambi 1:4) Nzambi kakubutula buloba buvuaye mufuke to, kadi ‘neanyangakaje badi banyangakaja buloba.’—Buakabuluibua 11:18.
Tudi batangile ku nshikidilu wa bionso bia panu anyi?
Bilondeshile Bible, “buloba” buikala ne bua kubutudibua mbuloba bua bantu badi kabayi batumikila Nzambi ne bakeba anu masanka abu bobu nkayabu. Anu muvua Nzambi muenze mu matuku a Noa, neabutule “bantu babi.”—2 Petelo 2:5; 3:7.
1 Yone 2:17 udi wamba ne: “buloba budi bupita, nansha dijinga diabu kabidi.” Mvese eu udi uleja ne: Nzambi neabutule bantu badi batungunuka ne kuenza malu mabi, kadi kakubutula dibulunge dietu dia buloba diena dîna edi to.
Nshikidilu nealue dîba kayi?
Bible kena utuambila menemene dîba dialua nshikidilu to. (Matayi 24:36) Kadi udi uleja ne: nshikidilu ukadi pabuipi. Mona malu adi Bible umanyisha:
Malu bu mudi mvita, biyole bia nzala, bipupu bia masama, ne buloba bukanka bikole avua ne bua kuenzeka “ku muaba ne ku muaba.”—Matayi 24:3, 7, 14; Luka 21:10, 11; Buakabuluibua 6:1-8.
Bantu mu tshibungi bavua ne bua kuikala ne budinangi bua bungi. Tshilejilu, bavua ne bua kuikala “banangi ba makuta,” “kabayi ne dianyisha,” ne “kabayi badikanda.”—2 Timote 3:1-5.
Bantu ba bungi mbamanye ne: katshia ku tshidimu tshia 1914, malu adi enzeka pa buloba adi apetangana ne tshikavua Bible mumanyishe, kabidi ne: nshikidilu mmusemene pabuipi. Bua kumanya malu makuabu, tangila tshiena-bualu tshia “Tshidi dilondangana dia bidimu bia mu Bible dileja bua 1914” ne tshia “Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”
Bible mmulaye kabutu ka bionso bidiku anyi?
Mukanda wa ndekelu wa mu Bible udi wakula bua tshikondo tshia “dibuluibua dia Mukalenge Yezu,” tshienzeka padi Yezu ulua bu eu udi ne bukokeshi bua kumbusha malu mabi onso adi pa buloba ne kufuta bantu badi batendelela Nzambi.—2 Tesalonike 1:6, 7; 1 Petelo 1:7, 13.
Mukanda wa ndekelu wa mu Bible udi uleja malu enzeka kumpala eku. (Buakabuluibua 1:1) Mukanda au udi ne lumu luimpe ne mukenji wa ditekemena. (Buakabuluibua 1:3) Udi uleja ne: Nzambi neumbushe malu mabi onso ne neavuije buloba Mparadizu. Tshikondo atshi, bantu kabakumvua kabidi bintu bibasama, kabakukenga, anyi nansha kufua kabidi to.—Buakabuluibua 21:3, 4.
Udi musue kumanya malu makuabu adi atangila milayi mitambe buimpe ya mu Bible eyi anyi? Bantemu ba Yehowa badi mua kukuambuluisha bua kulonga Bible kuyi ufuta makuta to. Tudi tukulomba bua umonangane nabu.