Malu a tshinyangu neajikaku dimue dituku anyi?

Bobu bakuenzele malu a tshinyangu udi mua kudiebeja ne: ‘Bikala Nzambi ututabalela, malu a nunku adi enzeka bua tshinyi? Malu a tshinyangua neajikaku dimue dituku anyi? Tshia kuenza ntshinyi bua kupita bimpe ne buôwa bundi nabu?’ Bible udi wandamuna nkonko eyi bimpe menemene.

Nzambi utu umona malu a tshinyangu mushindu kayi?

Nzambi mmukine malu a tshikisu ne a tshinyangu. (Misambu 11:5; Nsumuinu 6:16, 17) Nansha Yezu, muleji mpala wa Nzambi, wakatandisha pende bayidi bende bua malu a tshikisu avuabu benze. (Matayi 26:50-52) Bantu ba bungi badi benza malu ne tshikisu ne bamba mudibu baenza mu dîna dia Nzambi. Kadi Nzambi ki mmubanyishile bua kuenza nanku to. Kena nansha mua kuteleja masambila abu to.—Yeshaya 1:15.

Bible udi uleja ne: Nzambi udi utabalela bonso badi bakenga, too ne badibu benzele malu a tshinyangu. (Misambu 31:7; 1 Petelo 5:7) Udi uleja kabidi ne: Nzambi neajikije malu a tshikisu.—Yeshaya 60:18.

Tshikebeshi tshia malu a tshinyangu

Bible udi uleja tshitu tshikebesha malu a tshinyangu. Udi wamba ne: ‘Muntu mmukokeshe muntu mukuabu bua kumukengesha.’ (Muambi 8:9) Katshia anu ku kale, bantu ba bukole mbenzele bakuabu malu a tshinyangu bua kubakengesha. Abu pabu ne: kabushadidi muetu, babenzela pabu malu a tshinyangu.—Muambi 7:7.

Dijika dia malu a tshinyangu

Nzambi mmulaye bua kujikija buôwa ne malu a tshinyangu, ne kuteka ditalala pa buloba. (Yeshaya 32:18; Mika 4:3, 4) Mona tshienzaye:

Neumbushe tshikebeshi tshia malu a tshinyangu. Nzambi neapingaje Bukalenge buende pa muaba wa makalenge a bantu bua bukokeshe pa buloba bujima. Yezu Kristo, mfumu wa Bukalenge abu, neenzele bantu bonso malu mimpe, neajikije kabidi tshikisu ne dikengeshangana. (Misambu 72:2, 14) Tshikondo atshi, muntu nansha umue kakuenzela mukuabu malu a tshinyangu to. Bantu “nebikale ne disanka dipite bungi mu ditalala divule.”—Misambu 37:10, 11.
Neajikije malu mabi onso adi malu a tshinyangu makebeshe. Nzambi neondope bantu masama abu a mu mubidi nansha a mu lungenyi, adi malu a tshinyangu mabakebele. (Yeshaya 65:17; Buakabuluibua 21:3, 4.) Mmulaye bua kujula ne bafue bua bapete kabidi muoyo pa buloba apa mu nsombelu wa ditalala.—Yone 5:28, 29.

Mu Bible mudi malu a bungi mimpe adi atusaka bua kuitaba ne: Nzambi ukadi pa kukumbaja malu aa. Kadi udi mua kudiebeja ne: ‘Nzambi utshidi mulekele malu a tshinyangu enzeka bua tshinyi?’ Bua kupeta diandamuna dia lukonko elu, tangila filme wa Nzambi mmulekele makenga bua tshinyi?

a Mu kabujima, tutu tuakula bua “malu a tshinyangu” patubu benzela nangananga bantu badi kabayi mu busalayi malu a tshikisu anyi babafunyina bua kubenzelawu, bua kubatshingisha ne tshipatshila tshia kushintulula malu a tshididi, malu a mu nsombelu, anyi malu a Nzambi. Nansha nanku, kudi bantu badi mua kuamba ne: tshienzedi kampanda etshi ki ntshia kumona bu bualu bua tshinyangu to.

Bible udi utuambuluisha bua kupita ne malu a tshinyangu

Mona malu abidi adi Bible ukulomba bua kuenza bua kupita ne lutatu elu:

Ikala usambila.—Filipoyi 4:6, 7.
Ikala anu utuma meji ebe ku ditekemena didi Bible ufila.—Ebelu 6:19.

Bua kupeta mibelu mikuabu idi mimanyine mu Bible, bala tshiena-bualu tshia “Mua kupita ne malu adi asamisha mutu.”

Bantemu ba Yehowa bavuabu benzele malu a tshinyangu, bavua babakoleshe kudi bena kuitabuja nabu bakuabu. Tuangatayi bilejilu bibidi ebi:

Natalya ne muanende wa balume wa bidimu tshitema diende Aslan, bavua mu kalasa mu Beslan (mu Russie) pavua bena tshinyangu bavua bavuale bia mvita babuele mu tulasa atu, bakuate bantu bapite pa 1 000 baye nabu. Bia dibungama, bantu nkama ya bungi bakafua, ba bungi ba kudibu batshikale bana. Nansha muvua Natalya ne Aslan bapanduke, bavua bashale ne dipampakana ne buôwa bua bungi. Kadi mona tshidi tshibambuluishe bua kumvua bimpe.
Pablo ne Sophie bakafuisha muanabu wa balume pavua bena tshinyangu bupule nzubu ya bisasa bile mu New York. Tangila filme eu, umone tshidi tshibambuluishe bobu ne bantu bakuabu bavua pabu bakenge bua bualu abu.