Nnganyi wasungila buloba?

Mbitonde bantu ba bungi padibu bamona bakuabu banyanga buloba ne bifukibua bidipu. Bua bamanyi bapiluke ba malu a buloba ne bintu bidipu, malu adi bantu benza adi mua kufikisha ku dijimina dia mishindu mivule ya mitshi ne nyama bu mutubi kabiyi bianji kuenzeka to.

Bantu nebanyange buloba anyi peshi nebamanye mua kusomba bimpe ne bifukibua bidipu?

Bantu nebakumbane bua kukuba buloba anyi?

Bamanyi bapiluke ba bungi mbatuishibue ne: bantu badi mua kukuba buloba ne kusomba bimpe ne bifukibua bidipu. Kadi Bamue bakebuludi badi baleja buobu ne: bantu badi ne bua kushintulula bintu bia bungi musangu umue bua buobu kufika kudikuba buloba. Tshilejilu, badi ne bua:

• Kuakaja mushindu wa kukuba maloba, mêtu, mbuu ne bitupa bia maloba adi ne mutalela.

• Kukuata mudimu ne mishindu kabukabu ya dikuna bintu ne ya dipatula nzembu.

• Kushintulula ndilu ne mushindu wa difikisha biakudia mu bantu ne kubenga kubinyankaja, kubasaka ku didia bisekiseki, ne kukepesha didia minyinyi ne mishipa ya bungi.

• Kumanya ne: bua kuikala ne nsombelu muimpe, kabiena bilomba anu kuikala ne bintu bia bungi to.

Buebe wewe: Udi umone ne: mbia meji bua kutekemena ne: mbulamatadi yeleshangane diboko ne bangenda mushinga ne bantu bakuabu bua kushintulula malu onso au anyi? Peshi udi udi wela meji ne: kabiakuenzeka nanku bualu lelu bantu badi ne lukuka, mbadinangi ne kabena ne lungenyi lua kuakaja malu kumpala eku?​—2 Timote 3:1-5.

Tshidi tshitupetesha ditekemena

Bible udi utujadikila ne: dibulungu dietu dia buloba edi nedikale mu bukubi. Udi umvuija bua tshinyi bantu ki mbakumbane bua kusungila buloba to; ne udi uleja malu ikala ne bua kuakana, uleja kabidi mushindu muine wakanawu.

Bua tshinyi bantu nkayabu kabakukumbana bua kukuba buloba? Yehowaa Nzambi wakafuka buloba ne wakabupesha bantu bua babukuba. (Genese 1:28; 2:15) Bua bobu kukumbana bua kuenza mudimu au bimpe, bivua bikengela balekele Yehowa abaludike ne batumikile mikenji yende. (Nsumuinu 20:24) Kadi kabakenza nanku to. Bakela Yehowa nyima, kusungulabu bua kudienzela malu mu bobu nkayabu kakuyi muntu ubela dîyi to. (Muambi 7:29) Bantu nkayabu kabena mua kukumbana bua kulama buloba bimpe to; ne malu onso adibu benza bua kubulama, kaakumbana anu to.​—Nsumuinu 21:30; Yelemiya 10:23.

Malu adi ne bua kuakana. Nzambi neapangishe bantu bua kabanyangi buloba to. (Buakabuluibua 11:18) Kakushintulula makalenge ne bantu badi banyanga buloba to; neabumbushe. (Buakabuluibua 21:5) Ke bualu kayi udi wamba ne: “Tangilayi! Ndi ngenda mvuija bintu bionso bipiabipia.”​—Buakabuluibua 21:5.

Mushindu wakanawu. Yehowa neateke Bukalenge buende bua bupingane pa muaba wa makalenge a bana ba bantu. Bukalenge ebu nebukokeshe buloba bujime ku bulombodi bua Yezu Kristo.​—Danyele 2:44; Matayi 6:10.

Bukalenge bua Nzambi ne bulongeshe bantu bua kutumikila mikenji miakane ya Nzambi. Dîba ditabe bantu bonso Nzambi bu Mufuki wabu ne bamulekela ubalombola, ke dîba diakumbanabu bua kusombe bimpe ne bifukibua pa buloba. (Yeshaya 11:9) Bible udi uleja muikale bena dia Bukalenge bua Nzambi ne nsombelu muimpe mutambe, ne nebienze bua buloba buikale mu bukubi. Bukalenge bua Nzambi nebuenze malu aa:

• Nebupeshe bantu bonso biakudia.​—Misambu 72:16.

• Nebupingaje bubanji buonso bua pa buloba.​—Yeshaya 35:1, 2, 6, 7.

• Nebuenze bua bantu ne nyama bisombe pamue kakuyi bualu bua kuenzelangana bibi to.​—Yeshaya 11:6-8; Hoshea 2:18.

• Nebuenze bua bikumina bidi mua kuyanga bintu pa buloba kabienzeki to.​—Mâko 4:37-41.

Ikala mutukemene ne: Bukalenge bua Nzambi nebuenze malu onso aa kumpala eku. Bua kumanya malu makuabu, bala tshiana-bualu tshia: “Bukalenge bua Nzambi nebutuadije kukokesha buloba dîba kayi?”