Dibanda dibi dia luya pa buloba bujima mu muvu wa luya mu 2023​—Ntshinyi tshidi Bible wamba?

Pa buloba bujima bantu badi batata bua dibanda dibi dia luya ditu kadiyi dianji kuenzeka, ne bipupu bikuabu bikebesha kudi dinyanguka dia mivu. Mona tshidi luapolo idi ilonda eyi ileja:

• “Katshia bantu babanga kupima dibanda dia luya pa buloba bujima kukadi bidimu 174, mu ngondo 6 wa 2023 luya luvua lubande bibi menemene kupita kuonso eku.”​—Agence américaine d’observation océanique et atmosphérique [NOAA], États-Unis, département du Commerce, 13/7/2023.

• “Bena mu Italie, mu Espagne, mu France, mu Allemagne, ne mu Pologne badi batata bikole bua dibanda dibi menemene dia luya didi difuane kufika ku degre selsius 48 mu tshidiila tshia Sicile ne tshia Sardaigne. Kuonso eku luya kalutu luanji kuvula nanku ku Mputu to.”​—Agence spatiale européenne, 13/7/2023.

• Padi luya luvula pa buloba, tudi tutekemena ne: mvula neyikale iloka bikole, neyikebeshe kabidi dipasalala dibi dia mâyi.”​—Stefan Uhlenbrook (directeur de l’hydrologie, de l’eau et de la cryosphère à l’Organisation météorologique mondiale, 17/7/2023.

Dinyanguka dia mivu ditudi tutamba kumvua bakula didiku dikusamisha mutu anyi? Mona tshidi Bible wamba bua bualu bubi ebu.

Bible ukavua muakule bua dinyanguka dia mivu anyi?

Eyowa. Dibanda dibi dia luya ne dinyanguka dia mivu pa buloba bujima didi mu malu akavua Bible mulaye bua matuku etu aa. Tshilejilu, Yezu ukavua muambe ne: netumone “malu adi akuatshisha buôwa.” (Luka 21:11) Dibanda dibi dia luya pa buloba bujima ndifikishe ba bungi ku dikala ne buôwa bua ne: bantu nebavuije buloba muaba utudi katuyi mua kusombela kabidi to.

Buloba kabuakuikala kabidi muaba wa kusombela anyi?

Tòo. Nzambi wakafuka buloba bua buikale muaba wa bantu kusombela kashidi; kakulekela bantu babunyangakaja to. (Misambu 115:16; Muambi 1:4) Tumanyayi ne: mmulaye bua “kunyangakaja badi banyangakaja buloba.”​—Buakabuluibua 11:18.

Bible udi uleja ne: Nzambi udi ne bukole bua kupangisha bintu bia mu bufuki bua kabinyangi buloba ne neenze nanku.

• “[Nzambi] udi utuyisha tshipepele; mavuala a mbuu adi abatama.” (Misambu 107:29) Nzambi udi ne bukokeshi pa bintu bia mu bufiki. Udi ne bukole bua kulongolola bintu bia mu bufuki bidi bikebela bantu ntatu idi ifumina ku dinyanguka dia mivu.

• “Udi utabalela buloba, ubumeneshisha bintu bipite bungi ne ubuvuija bubanji bikole.” (Misambu 65:9) Nzambi neavuije buloba Mparadizu.

Bua kumanya malu makuabu a mudi Bible ulaya ne: Nzambi neakaje bitupa bia buloba bidi bantu banyange, bala tshiena-bualu tshia “Nnganyi wasungila buloba?”