Yone Mubatiji uvua nganyi?

Diandamuna dia mu Bible

Yone Mubatiji uvua muprofete wa Nzambi. (Luka 1:76) Bavua bamulele anu kumpala kua bidimu lukama bia kumpala kua Yezu kulua pa buloba kujikabi, uvua ne muoyo mu tshikondo tshia bidimu lukama bia kumpala P.Y. Nzambi wakamupesha mudimu wa kulongoluela Masiya, anyi Kristo njila. Wakenza nanku pavuaye muambile bena Yuda nende mukenji wa Nzambi bua bapingaje mioyo yabu kudi Nzambi.​—Mâko 1:1-4; Luka 1:13, 16, 17.

Malu avua Yone muambe avua ne bua kuambuluisha bantu bavua bateleja ne muoyo umue bua kumanya ne: Yezu wa ku Nazaleta uvua Masiya mulaya. (Matayi 11:10) Yone wakadimuija bantu bavua bamuteleja bua banyingalale bua mpekatu yabu, pashishe babatijibue bua kuleja dinyingalala diabu. (Luka 3:3-6) Badi bamubikila ne: Yone Mubatiji bualu uvua mubatize bantu ba bungi. Batismo wa Yezu ke uvua ne mushinga wa bungi kupita wa bantu bakuabu bonso bavua Yone mubatize.a​—Mâko 1:9.

Mu tshiena-bualu etshi, netumone malu aa:

• Ntshinyi tshivua tshivuije Yone Mubatiji muntu wa pa buende?

• Baledi ba Yone Mubatiji bavua banganyi?

• Nnganyi wakakebesha lufu lua Yone Mubatiji?

• Yone Mubatiji ne Yezu bakatembangana anyi?

• Bible udi utela bantu bungi kayi badi ne dîna dia Yone?

Ntshinyi tshivua tshivuije Yone Mubatiji muntu wa pa buende?

Bakavua balaye mudimu uvuaye ne bua kuenza: Pavua Yone uyisha, wakakumbaja dîyi dia buprofete dia mutuadi wa mukenji wa Yehowa. (Malaki 3:1; Matayi 3:1-3) Wakaleja ne: yeye ke uvua ne bua “kulongoluela Yehowa bantu bamana kulongolola,” mmumue ne: wakambuluisha bena Yuda nende bua kuitaba mukenji wa Yezu Kristo muleji mpala munene wa Yehowa Nzambi.​—Luka 1:17.

Ditekemena diende: Yezu wakamba ne: ‘kakutu kuanji kujuka muntu munene kupita Yone Mubatiji to, kadi muntu udi mukese mu Bukalenge bua mu diulu mmunene kumupita yeye.’ (Matayi 11:11) Bu muvua Yone muprofete, muikale kabidi “mutuadi wa mukenji” uvuabu balaye, kakuvua muena mudimu wa Nzambi kumpala kuende uvuabu mua kumona bu muntu munene to. Mêyi a Yezu aa adi aleja kabidi ne: Yone kakuikala mukalenge mu Bukalenge bua Nzambi to.b Muprofete wa lulamatu au wakafua kumpala kua Kristo kukanguila bantu njila wa kuya mu diulu. (Ebelu 10:19, 20) Kadi Yone neikale muena dia Bukalenge bua Nzambi pa buloba; neikale ne ditekemena dia kupeta muoyo wa tshiendelele mu Mparadizu.​—Misambu 37:29; Luka 23:43.

Baledi ba Yone Mubatiji bavua banganyi?

Baledi ba Yone bavua bababikila ne: Zekâya ne Elizabeta. Zekâya uvua muakuidi muena Yuda. Diledibua diende divua tshishima bualu mamuende uvua nkumba, anyi kavua mua kulela to. Bualu bukuabu, yeye ne Zekâya “bakavua ne bidimu bia bungi menemene.”​—Luka 1:5-7, 13.

Nnganyi wakakebesha lufu lua Yone Mubatiji?

Mukalenge Helode Antipa wakatuma dîyi bua bakose Yone mutu. Mukajende Helodiya kupitshila kudi muanende wa bakaji ke wakamulomba bua enze nanku. Helodiya uvua mukine Yone bualu wakambila Helode uvua udiamba mudiye muena Yuda ne: dibaka diabu kadivua dinemeka mikenji ya bena Yuda to.​—Matayi 14:1-12; Mâko 6:16-19.

Yone Mubatiji ne Yezu bakatembangana anyi?

Lungenyi lua ne: Yone ne Yezu bavua batembangana kaluena kaba nansha kamue mu Bible to. (Yone 3:25-30) Yone muine wakaleja patoke ne: mudimu wende uvua wa kulongoluela Masiya njila, kadi kawuvua wa kutembangana nende to. Yone wakamba ne: ‘Mvua mulue mbatizangana mu mâyi . . . bua ne: amone mua kumueneshibua patoke kudi Isalele.’ Pashishe wakasakidila ne: “Yeye eu udi Muana wa Nzambi.” (Yone 1:26-34) Nunku Yone wakasanka bikole bua muvua Yezu upatula bipeta bimpe mu mudimu wende.