“Pwenunga Mwajila Muvilinga Vyenu Vyosena”

“Nganomu apwOu amisanyikile ajila, ngocho nayenu nawa pwenunga mwajila muvilinga vyenu vysena. Mwomwo vasoneka ngwavo, Pwenunga mwajila mwomwo Ami ngwajila.”—WAPETULU 1, 1:15, 16.

1. Mwomwo ika Petulu akolezezele vaka-Kulishitu kupwanga vajila?

MWOMWO ika kaposetolo Petulu ahanyine punga kaneyi yili helu? Mwomwo amwene ngwenyi hichuma chachilemu kuli muka-Kulishitu kulama vishinganyeka navilinga vyenyi mangana vihasenga kutambukilanga hamwe nakujila chaYehova. Ngocho, shimbu kanda ahanjike mazu ali helu, avangilile kuvuluka ngwenyi: “Vungenu vikombwe mujimbunda jamichima yenu, pwenunga muvakuunda mumeso . . . Pwenunga muvana vakwononoka, keshi nge nakulifwanyisa nakufwila chenu chakulivangako, omu mwahonene kutachikiza.”—WaPetulu 1, 1:13, 14.

2. Mwomwo ika vifwilo vyetu vyapwile vyakujiluluka shimbu kanda tulinangule muchano?

² Vyuma twapwilenga nakufwila kunyima kavyapwile vyakujilako. Mwomwo ika? Mwomwo vavavulu vayetu twakavangijilenga vilinga vyavaka-mavu shimbu kanda twitavile muchano wavaka-Kulishitu. Petulu achitachikijile chuma kana hakusoneka hatoma ngwenyi: “Myaka yakunyima yinasu lyehi yakulinga mwaya michima yavaka-mafuchi nakutambuka mukuzunguma namukufwila cheka nacheka chachipi namukunwa chikuma vinyo, namukukinakina namukupendapenda namukulemesa makombelo chakwivwisa unyengwe.” Enga, Petulu kavulukile vilinga vyakujiluluka vinalisale mukaye ketu kanoko, mwomwo halwola luze kavavitachikijileko.—WaPetulu 1, 4:3, 4.

3, 4. (a) Natuhasa ngachilihi kukana vifwilo vyavipi? (b) Uno vaka-Kulishitu kavatela kupwa vakulivwa kumujimba tahi? Lumbununa.

³ Uno unanyingilila kanawa tahi ngwove vyuma kanevi twafwila vyapwa vika-kuneha chiseke kuchisemwa chahamavu, mumangana etu, nakulivwa chetu? Nge natuvitavila kwingila mulyetu, kaha vishinganyeka navilinga vyetu vinahase kujiluluka washi. Echi chinakulumbununa ovyo twatelela kuzachisa mangana kututwaminyina muvilinga vyetu. Paulu ahanjikile ngana: “Shikaho, enu vandumbwami, ngunamilembelela hakutetela chaKalunga chachivulu ngwami, echenu mijimba yenu nge chimuna wakuvatula wamutonyi, wajila, wakumwivwisa Kalunga kuwaha, yikiko vene milimo yenu yamwomwo mwaya mangana.”—Wavaka-Loma 12:1, 2.

⁴ Kuhana Kalunga wana wajila, twatela kwecha manganetu azate, keshi mwaya kulivwa chetuko. Ovo vatu valingishile muvyuma vyaujila ocho kuvula hakusaka kulinga muze mwaya kulivwa chavo! Echi kachalumbunwine kukanyisa kulivwa chetu chakumujimbako; mwomwo nge mukiko, kaha natuhasa kusolola ngachilihi kuwahilila chetu mumulimo waYehova? Oloze, nge natusaka kusolola mihako yashipilitu muchishishisa chakwima mihako yachisemwa chahamavu, kaha twatela kulingisa vishinganyeka vyetu kuya mwaya kushinganyeka chaKulishitu.—Wavaka-Ngalesha 5:22, 23; Wavaka-Fwilipi 2:5.

Kuyoya Chajila, Ndando Yajila

5. Mwomwo ika Petulu azakamine chikuma kulema chakujila?

⁵ Mwomwo ika Petulu achimwene ngwenyi kujila chauKulishitu chapwile nakusakiwa? Mwomwo ejivile kanawa ndando yajila ize vafwetele yakusokola muyachi wavatu vakwononoka. Asonekele ngwenyi: “Munatachikiza ngwenu, hakumisokola mukutwama chenu chakulishina tuhu chize vamiselelele vakakuluka jenu, kavamisokwele navyuma vyakuya nakupola, naulu napalatako, oloze namanyinga amalemu nge amwanamukoko wakuzeneka katenga chipwe lipenga, manyinga aKulishitu.” (WaPetulu 1, 1:18, 19) Eyo, Mwenya kujila, Yehova Kalunga, atumine Mwanenyi umwe kaha lyamunwe, “Muka-kujila,” kwiza hano hamavu nakufweta ndando yakusokola yize nayakasuula vatu vakapwe nausendo wamwaza naKalunga.—Yowano 3:16; 6:69; Kulovoka 28:36; Mateu 20:28.

6. (a) Mwomwo ika chapwila chachikalu kuli etu kukava vilinga vyajila? (b) Vyuma vika navihasa kutukafwa kulama vilinga vyetu kupwanga lika vyajila?

⁶ Chipwe ngocho, twatela kwijiva ngwetu kachapwa chachashi kupwa nachiyoyelo chakujila mukachi kalifuchi lyalipi lyaSatanako. Eji kutela miheto vaka-Kulishitu vamuchano, vaze vali nakufwila kukayovoka tulingilo twenyi twavyuma. (Wavaka-Efwesu 6:12; WaChimoteu 1, 6:9, 10) Kushinyinyika chakumilimo yakulifuchi, kwimanyina nakole kuli vaka-tanga, kusekeleka chakumashikola nakushinyinyika mutu kufuma kuvakwavo vakweze, chasaka kupwa wakujikiza kushipilitu numba ahase kulama kujila chenyi. Echi jino chili nakushindakanya hakulema chakupwanga nakulilongesa chaha uka wetu nakuyanga shimbu yosena kukukunguluka chavaka-Kulishitu. Paulu amukafwile Chimoteu ngwenyi: “Kwatangamo kanawa mwaya mazu amakangule awa wevwile kuli ami, mukufwelela nazangi eyi yili muli Kulishitu Yesu.” (WaChimoteu 2, 1:13) Awa mazu amakangule tweji kuwevwilanga haZuvo yetu yaWangana nahakulilongesa chetu chaMbimbiliya chaha uka wetu. Jijila kaneji jinahase kutukafwa kupwa vakujila muvilinga vyetu vyahakumbi hakumbi muvyuma vyavivulu.

Vilinga Vyajila muTanga

7. Kujila chatela kukwata ngachilihi hakuyoya chatanga yetu?

⁷ Omwo Petulu anungulwile mazu atwama hali VyavaLevi 11:44, azachishile lizu lyachiHelase haʹgi·os, lyalumbunuka ‘kufuma kushili nakulisuula kuli Kalunga, kupwa wajila.” (An Expository Dictionary of New Testament Words, by W. E. Vine.) Echi chatela kukwata ngachilihi hali etu mukuyoya chetu chatanga yauKulishitu? Kuyoya chetu chamutanga chatela kupwa chazangi, mwomwo “Kalunga Ikiye zangi.” (WaYowano 1, 4:8) Zangi yakulisuulanga yikiko yapwa maji akuwahisa kanawa usoko mukachi kalunga napwevo, namukachi kavisemi navana.—Wavaka-Kolinde 1, 13:4-8; Wavaka-Efwesu 5:28, 29, 33; 6:4; Wavaka-Kolose 3:18, 21.

8, 9. (a) Vilinga vika vyeji kusolokanga shimbu jimwe hakanda yavaka-Kulishitu? (b) Mbimbiliya yahana punga muka yambwemde hachihande kana?

⁸ Tunahase kushinganyeka ngwetu kulizanga kanechi chinahase kulijila chivene mutanga yauKulishitu. Oloze, twatela kuchitavila ngwetu kakavulu zangi kayasoloka mujikanda javaka-Kulishitu kweseka nomu yatelako. Yinahase kusolokela kaha haZuvo yaWangana, oloze kujila chetu cheji kujimbanganya washi kujikanda jetu. Kwijiva nganomu hitunavulyama lyehi ngwetu puwetu apwa nawa ndumbwetu muka-Kulishitu chipwe ngwetu lunga lyetu hindumbwetu (pamo muka-kuzachila muchikungulwilo mokomoko mukulwane) uze twamonanga kupwa wamulemu haZuvo yaWangana. Natupihilila, nakuputuka kulikalwomwokela. Nakuputuka kupwa jino nachiyoyelo chaumbulumwene. Kaweshi kupwa hiusoko wahakachi kalunga napwevo wauKulishitu nawako, oloze kwijiva jino nge vatu vaka-kulipecha kaha. Hivanavulyama lyehi ngwavo muzuvo mwatela kachi mupwenga chiyoyelo chajila. Pamo vanahase kuputuka nakuhanjika ngana mwavatu vaku-kaye. Omwo jino cheji kupwanga chachashi kuhanjika mazu akasautu, akufutulula!—Vishimo 12:18; Esekesako Vilinga 15:37-39.

⁹ Oloze, Paulu ahuhumwine ngwenyi: “Mutunwa twenu kanda mukalovoka lizu lyalipi nalimweko [chiHelase, loʹgos sa·prosʹ, ‘mazu akujiluluka,’ ngocho akuzeneka kujila], shinawa amwenemwene kaha akutunga vakwenu mwose muli kuhona, mangana avahanenga vaka-kwivwilila likoji.” Echi chili nakwinyikila kuli vaka-kwivwilila vosena hakanda, kuhakilako navana nawa.—Wavaka-Efwesu 4:29; WaYakova 3:8-10.

10. Punga yahakujila yazata ngachilihi kuvana?

¹⁰ Elu lushimbi lwahakujila lweji kuzata nawa nahali vana vamutanga yavaka-Kulishitu. Omwo chashiwa kuli vakivo kufuma kushikola nakuputuka kulondezeza hanjikiso yavakwavo vakweze yakulikanga nakasautu! Enu vana, kanda namukavangiza michima yavanyike vakasautu vaze vatukile kapolofweto kaYehova, vatunwa twakuhanjika mazu akwivwisa sonyi, ngana mwamakumbi anoko. (Vamyangana 2, 2:23, 24) Hanjikiso yenu kanda nayipwa yakujiluluka namazu amumikwakwa akwivwisa sonyi, avatu veji kwivwanga uvwa wakuzachisa mazu akavumbi chipwe kuhona kushinganyeka vakwavoko. Hakupwa tuvaka-Kulishitu, kuhanjika chetu chatela kupwa chajila, chamwaza, chakulitunga, chalikoji, kaha “chakutova mungwa.” Chatela kutusolola kupwa vakulihandununa navatu veka.—Wavaka-Kolose 3:8-10; 4:6.

Kupwa Vajila Nakutwama Chetu Navaka-Tanga Vazeneka Kwitava

11. Mwomwo ika kupwa wajila kachalumbununa mutu kulimona kupwa wakwolokako?

¹¹ Omu natufwila kulijilisa kujila, kanda natukalizezula helu lyavakwetu nakulimona kupwa vakwolokako, chikumanyi nge twatwama navaka-tanga vazeneka kwitava. Vilinga vyetu vyalikoji lyauKulishitu vyatela kafwe kuvakafwa vamone ngwavo twalihandununako mujila yamwaza, kaha tuvaka-kuzanga vakwetu nakutetela, ngana mwakaSamaliya muka-kutetela uze atwama muchishimo chaYesu.—Luka 10:30-37.

12. Muka-Kulishitu atwama muulo nahase kulingisa ngachilihi muchano kuneha chiseke chikuma kuli muka-mahyenyi azeneka kwitava?

¹² Petulu ashindakanyine hakulema chakupwa namuchima wambwende kupandama kuli vatanga jetu vazeneka kwitava hakusonekela mapwevo vaka-Kulishitu ngwenyi: “Nenu mapwevo nawa, ononokenunga kuli malunga jenu, mangana chipwe nge vamwe kaveshi kwononoka kumazuko, oloze vakavakoke chakuzeneka mazu hakutwama chayenu mapwevo javo kanawa, hakumona kutwama chenu chitoma nawoma wenu.” Pwevo muka-Kulishitu (numba vene lunga) nahase kulingisa muchano kuneha chiseke chikuma kuli muka-mahyenyi azeneka kwitava nge akwechi vilinga vitoma, vyakutetela, nakavumbi. Echi chili nakulumbununa nge watela kupwa wamuvwovu mukuwahisa chove chateokalasi kuchina mukamusuvilila chipwe kuhona kumuzakama.a—WaPetulu 1, 3:1, 2.

13. Vakulwane navaka-kuzachila muvikungulwilo, vanahase kukafwa ngachilihi shimbu jimwe lunga azeneka kwitava mangana etavile muchano?

¹³ Vakulwane navaka-kuzachila muchikungulwilo vanahase shimbu jimwe kukafwa hakuputuka kulijilila nalunga azeneka kwitava. Ngocho mwakamona ngwenyi, Vinjiho vapwa kanawa, hivatu vakuunda, vatwama nachiseke muvyuma vyavivulu, kuhakilako navihande vyeka vyazeneka kupwa vyuma Mbimbiliya. Likumbi limwe, mukulwane awahililile namulimo walunga muka-kuta vaishi. Chanehele lisesa lyakuputuka jino kushimutwila. Kutwala muze, lunga uze apwile ndumbwetu wakumbapachisa. Mumujimbu weka nawa, lunga wakuzeneka kwitava asakilenga chikuma tulimba. Vakulwane kavavahoneseleko. Umwe wavo aputukile kulilongesa vyatulimba, mangana likumbi lyeka navakaliwana nalunga kana, akahase kushimutwila nenyi hachihande chenyi asaka chikuma! Shikaho, kupwa wajila, kachalumbununa kupwa muka-kukaluwisa vyuma chipwe muka-kutakilikako.—Wavaka-Kolinde 1, 9:20-23.

Tunahase Kupwa Ngachilihi Vajila muChikungulwilo?

14. (a) Jila yaSatana yimwe muka eji kuzachisanga kutangula chikungulwilo? (b) Natulihenda ngachilihi kumiheto yaSatana?

¹⁴ Satana Liyavolo apwa muka-lusongi, mwomwo lijina lyaLiyavolo muchiHelase, di·aʹbo·los, lyalumbununa “muka-kuhana vakwavo milonga” chipwe “muka-lusongi.” Lusongi hijila imwe eji kuzachisanga chikuma, kaha azanga kweseka kuyizachisa muchikungulwilo. Jila yenyi asaka chikuma shina jisaki. Uno tweji kulilingisa kupwa vatu jenyi vakuhulama mukulinga vilinga vyakujiluluka tahi? Nachihasa kupwa ngachilihi ngocho? Hakuchikatula chisaki, numba kwambulula kweka, chipwe kuchivwilila. Chishimo chamangana chavuluka ngwacho: “Muka-kuhingika eji kukuvanga vikokojola, kaha kakulanganyi mwahandununa vaka-tusendo.” (Vishimo 16:28) Nyi umbanda wajisaki nalusongi wapwa uka? Twatela kumona shimbu yosena ngwetu kuhanjika chetu chapwa chakulitunganga navakwetu kaha nawa chazangi. Nge natutalanga hakuwaha chavandumbwetu kuzomboka kutala hatutenga twavo, kaha kakavulu kushimutwila chetu nachipwanga chamwaza kaha nawa chakushipilitu. Anuka ngwove kuhananga vakwenu milonga chapwa chachashi. Kaha nawa mutu mwakulweza chisaki chavakwavo nahase kwambulwila veka chisaki chove!—WaChimoteu 1, 5:13; WaChituse 2:3.

15. Vilinga vika vyalifwana navyaKulishitu vinahase kutukafwa kulingisa vosena muchikungulwilo kupwa vajila?

¹⁵ Hakusaka kulama chikungulwilo kupwa chajila, tuvosena twatela kupwa navishinganyeka vyaKulishitu, kaha twejiva ngwetu zangi hichuma chachinene muli ikiye. Ngocho, Paulu ahuhumwine vaka-Kolose kupwa nakeke ngana mwaKulishitu, ngwenyi: “Lingenu mwavava vaKalunga asakula, vaka-kujila, vakuzanga, vwalenu michima yakeke, nakukokweza, nakulinyisa mumichima, nakuvova, nakulitalilila chikoki navakwenu . . ., likonekelenunga navakwenu . . . Kaha kuvyuma vyosenevi hakilenuko zangi, yikiko vene oyo yakuminungisa yahakukupuka mwosena.” Jino ahakililileho ngwenyi: “Kaha kuunda chaKulishitu chiyulenga mumichima yenu.” Pundu vene hakupwa nashipilitu yakulikonekelanga, tunahase kupwa vakulinunga nakujila muchikungulwilo.—Wavaka-Kolose 3:12-15.

Kutala Kujila Chetu Chasoloka naKuvakwetu Tahi?

16. Mwomwo ika kulemesa chetu chajila chapwila kulemesa chakuwahilila?

¹⁶ Nyi ngachilihi vakwetu twalihata navo? Veji kutumona ngachilihi? Tweji kusolola kuyema chamuchano, nyi tweji kuulingisa kusoloka kupwa hichiteli? Nge twapwa vajila nganomu apwa Yehova wajila, kaha chatela kusoloka hatoma muhanjikiso yetu namuvilinga vyetu. Chatela kusoloka kanawa nge kulemesa chetu chajila chapwa hikulemesa chakuwahilila. Mwomwo ika? Mwomwo Yehova Kalunga ketu apwa Kalunga wakuwahilila, uze asaka vaka-kumulemesa kupwa vakuwahilila. Ngocho, muka-kwimba jisamu ahanjikile kupandama kuvatu jaYehova kushikulu ngwenyi: “Vanatokwa vatu ava vakwechi Kalunga kavo Ivene Yehova.” Uno kuwahilila kana tweji kuchisololanga tahi? Kutala vana vetu navakivo veji kusuulukanga hakupwa hakachi kavatu jaYehova haZuvo yaWangana nahakukunguluka chikwavo nyi?—Samu 89:15, 16; 144:15b.

17. Vyuma vika twatela kulinga mujila yize yeji kuzatanga mangana tusolole kujila chetu kupwa chakutamo?

¹⁷ Tunahase kusolola kujila chakutamo hakupwa nashipilitu yakuzachila hamwe nalikoji kuli vakwetu. Shimbu jimwe cheji kusakiwa kuzachila hamwe navakwenu mwalihata navo, pamo kuwahisa mundandanda yenu, chipwe, nganomu chapwa mumafuchi amavulu, kulikafwa kuwahisa tujijila namikwakwa. Chinahase kusoloka nawa mujila twalaminamo matepa etu, jikanda jetu, chipwe vikumba vikwavo. Kutala tunahase kwamba ngwetu tuvaka-kulemesa vakwetu twalihata navo kachi nge natwijiva kusezanga swali kuweluka wakanda chipwe kupwa nakanda yauhulu yakuhona unyoji, pamo nakulama jiminyau jafwile fwile lyehi hakanda tahi?—Kusoloka 11:18.

Kupwa Wajila haMilimo NahaShikola

18. (a) Kutwama chavaka-Kulishitu vamakumbi ano chili naukalu muka? (b) Tunahase kulihandununako ngachilihi kuli vaka-mavu?

¹⁸ Kaposetolo Paulu asonekele vaka-Kulishitu vapwile muKolinde, nganda yakujiluluka ngwenyi: “Ngwasonekele kuli enu kumukanda wami ngwami, kanda mukalikata navaka-ujilako. Kangwambile ngwami, navaka-ujila vavaka-mavu anoko, chipwe navaka-lwiso, chipwe navaka-lulami, chipwe navaka-makombelo, mwomwo chapwanga ngocho kachi chatela kuli enu kufuma hamavu.” (Wavaka-Kolinde 1, 5:9, 10) Ou unahase kupwa ukalu kuli vaka-Kulishitu, vaze hakumbi hakumbi navalifutakananga navatu vakwechi vilinga vyamajilo navaze veji kuswekanga vilinga kana. Echi hikweseka chachinene chakweseka kumika chavatu, chikumanyi muvisemwa muze vakolezeza chipwe kwitavila kulimona chalunga napwevo chakushinjila, kulihana maswekeza, nakuhona kulyononona. Muvihela kana, kanda natukeseka kuvwovuwisa jishimbi jakatwamino ketu katoma mangana tukasoloke kupwa “kanawa” kuli vakwetuko. Oloze shina, vilinga vyetu vyalikoji vize vyakulipwila vyatela kutulingisa kupwa vavalemu kuvatu vamichima yamwaza, vaze vanasuvala kushipitu nakusakasaka vyuma vyeka vyamwaza.—Mateu 5:3; WaPetulu 1, 3:16, 17.

19. (a) Vyeseko muka muli nakumonanga enu vana kushikola? (b) Jino vyuma vika visemi vatela kulinga vyakukundwiza vana vavo navilinga vyavo vyajila?

¹⁹ Mukiko nawa chili hamashikola, vana vetu vali nakumona vyeseko vyavivulu chikuma. Kutala enu visemi mweji kutambukila hamashikola vatangila vana venu tahi? Uno mwatachikiza muyachi wavilinga vyatwamaho nyi? Uno mweji kulivwasana kanawa navalongeshi tahi? Mwomwo ika vihula evi vinapwila vyavilemu? Mwomwo mujinganda jajivulu jamukaye, mashikola anapu vihela vyaulyanyi, hakunwina maundu akupendesa, naujila. Jino vana vanahase ngachilihi kumika nakulama vilinga vyavo vyajila nge visemi kaveshi kuvakundwiza muzangiko? Paulu ahuhumwine visemi mukwoloka ngwenyi: “Enu masevo, kanda muvasowangizanga vana venuko, kuchina navakahomba.” (Wavaka-Kolose 3:21) Kuhona kwivwishisa ukalu wavo navyeseko vyavo vyahakumbi hakumbi, yapwa jila imwe yakusowangiza vana. Kulizanga kuvyeseko vyahashikola cheji kuputukila mukutwama chakushipilitu mukanda yavaka-Kulishitu.—Lushimbi lwamuchivali 6:6-9; Vishimo 22:6.

20. Mwomwo ika kupwa vajila chapwila chachilemu kulyetu vosena?

²⁰ Hakukukulula jino chihande, mwomwo ika kupwa vajila chapwila chachilemu kuli etu tuvosena? Mwomwo cheji kutukinga kumiheto yakaye navishinganyeka vyaSatana. Nachikaneha kukisula choholyapwa nachize chakulutwe. Cheji kutukafwa kutufwelelesa kuyoya chize nachikapwa kuyoya chivene chamulifuchi lyakwoloka. Cheji kutukafwa kupwa vaka-Kulishitu valipezalisa kanawa, vavashi kuhulisa vihula, nakushimutwila kanawa—keshi vaka-kutwalaho nakundengula kahako. Kuhanjika mukavatu, natwamba ngwetu cheji kutulingisa kupwa ngana mwaKulishitu.—WaChimoteu 1, 6:19.

[Kwinyikila chamwishi]

Unakwanuka Tahi?

◻ Mwomwo ika Petulu achimwenene kupwa chachilemu kuhana punga vaka-Kulishitu hakujila?

◻ Mwomwo ika chahonena kupwa chachashi kutwama kayoyelo kajila?

◻ Vyuma vika twatela kulinga tuvosena hakusaka kufukisa kujila mukachi katanga?

◻ Hakusaka chikungulwilo kutwalaho lika nakupwa chajila, vyuma vika vyakujiluluka twatela kulihendako?

◻ Tunahase ngachilihi kutwalaho lika nakupwa vajila hamilimo nahashikola?

[Mivwimbimbi halifwo 28, 29]

Hakupwa tuVinjiho jaYehova, twatela kupwa vakuwahilila hakuzachila Kalunga namuvilika vyeka