Twamenunga “muKujila muWoma waKalunga”

MBIMBILIYA yasolola unene wakujila chaYehova Kalunga hakwamba ngwayo: “Yehova wamayongomena wajila, wajila, wajila.” (Isa. 6:3; Kuso. 4:8) Lizu lyachiHepeleu nachiHelase lize valumuna ngwavo “kujila” lyalumbununa unyoji chipwe kutoma kushipilitu, chize chahandula mutu kuvyuma vyamajilo. Kalunga apwa wajila mwomwo apwa wakukupuka mwosena.

Hakuwana nge Yehova apwa Kalunga wajila, ngocho asaka vangamba jenyi vapwenga vajila, kulumbununa nge vatela kupwa vatoma kumujimba namuvishinganyeka nakushipilitu. Pundu vene, Mbimbiliya yahanjika hatoma ngwayo Yehova asaka vatu jenyi vapwenga vajila. Hali WaPetulu 1, 1:16 vasonekaho ngwavo: “Pwenunga mwajila mwomwo Ami ngwajila.” Uno vatu vakuhona kukupuka mwosena vanahase kupwa vajila ngana mwaYehova tahi? Eyo, oloze kaveshi kujila mujila yakukupuka mwosenako. Tunahase kupwa vajila kumeso aKalunga nge natumulemesa mujila yitoma yize etavila nakupwa nausoko wamwaza nayikiye.

Uno tunahase kupwa ngachilihi vatoma mukaye kano kavilinga vyamajilo? Vilinga muka twatela kulihendako? Vyuma muka twatela kwalumunako muhanjikiso namuvilinga vyetu? Tuchitalenu vyuma natulinangula kuvyuma vize Kalunga alwezele vaYuleya vaze vafumine muundungo muMbavilone nakukinduluka kwimbo lyavo mu 537 B.C.E.

‘Nakukapwa Jila Yakujila’

Yehova ahanjikile chimweza ngwenyi vatu jenyi vaze vapwile muundungo muMbavilone navakakinduluka kumahyavo. Upolofweto uze wavulukile vyakukinduluka chavo wavafwelelesele ngwawo: “Kuze nakukapwanga likulakula, jila, kaha navakayivuluka ngwavo, Jila yakujila.” (Isa. 35:8a) Mazu kana asolwele nge Yehova ashikile vaYuleya ngwenyi mwakavakindulwisa kumahyavo, kaha nawa mwakavakinga muungeji wavo wosena.

Yehova asokolwelele vangamba jenyi vahano hamavu “Jila yakujila” hakuvasokola muMbavilone Yayinene, chipwe ngwetu mauka akwitava chamakuli amukaye kosena. Mu 1919, Kalunga asokwele vaka-Kulishitu vawavisa muundungo wakushipilitu wamukwitava chamakuli, kaha vaputukile kutomesa kwitava chavo chikoki chikoki hakulihenda kukunangula chamakuli chosena. Ngocho etu vangamba jaYehova makumbi ano tuli nakulivwisa kuwaha kulemesa Yehova mujila yitoma yakuunda, kaha tukwechi usoko wamwaza naIkiye navakwetu vatu.

Vaka-Kulishitu vawavisa ‘vamuutanga wamikoko waundende’ navatu ‘vamuliyongomena lyalinene’ ‘lyamikoko veka’ vaze vali nakuvulilako lika vanasakula kutambuka mujila yakujila, kaha vali nakulanya vakwavo veka vatambukile hamwe. (Luka 12:32; Kuso. 7:9; Yowa. 10:16) “Jila yakujila” yinasokoloka kuvatu vosena vaze navalisuula ‘nakwecha mijimba yavo kupwa nge chimuna wakuvatula wamutonyi, wajila, wakumwivwisa Kalunga kuwaha.’—Loma 12:1.

“Vavapi kaveshi kukahitamoko”

Mu 537 B.C.E., vaYuleya vaze vakindulukile kumahyavo vatelelele kutesamo chuma chimwe chachilemu. Hakuvuluka vaze vatelemo kutambuka ‘muJila yakujila,’ hali Isaya 35:8b vasonekaho ngwavo: “Vavapi kaveshi kukahitamoko, oloze nayikapwa yavava vasokola. Vaka-kutambuka jila, chipwe viheu, kaveshi kukahungumukamoko.” Hakuwana nge chuma chachinene vakindulukilile vaYuleya kuYelusalema chapwile chakuputuka kulemesa Kalunga mujila yitoma, ngocho vatu valizangamina, chipwe vaka-kulelesa vyuma vyajila, chipwe vaze valingilenga vyuma vyavipi kavavetavishile kutambukamoko. Ava vaYuleya vatelelele kukavangiza jindongi jaYehova nakupwa nachiyoyelo chitoma. Namakumbi ano nawa, vosena vaze navasaka kuvevwila uselewa kuli Kalunga vatela kukavangiza jindongi jenyi. Vatela kutwama “mukujila muwoma waKalunga.” (Koli. 2, 7:1) Uno vilinga muka vyavipi vize twatela kulihendako?

Kaposetolo Paulu asonekele ngwenyi: “Vilinga vyachisemwa chahamavu vinalumbunuka, vikiko vene evi: ujila, namajilo, nakuzunguma.” (Ngale. 5:19) Ujila walumbununa kulisavala chalunga napwevo vaze kavalimbata kweseka namwaya Visonekako. Kaha lizu kuzunguma lyalumbununa “uvumbi, utange, vilinga vyasonyi chipwe vilinga vyakuhuka.” Yehova uze apwa wajila ahunga ujila nakuzunguma. Ngocho vosena vaze veji kutwalangaho kulinga vyuma kanevi kaveshi kuvetavisa kupwa Vinjihoko. Kaha vaze vapwa lyehi Vinjiho veji kuvafumisanga muchikungulwilo. Omu mukiko cheji kupwanga nakuli vaze veji kulinganga ‘majilo osena nakuzuzuka.’—Efwe. 4:19.

Lizu lyakwamba ngwavo “majilo” lyalumbununa milonga yashili yakulisezaseza. Lizu kana muchiHelase lyalumbununa vilinga vyaunyengwe, nahanjikiso yayipi, nakujiluluka kushipilitu. Kaha nawa lyatalisa kuvilinga vize kavyasoloka nge vyavipi chikuma, vize kaveshi kuhasa kusopeselaho mutuko.a Kutala vatu vaze vali nakulinga vilinga kanevi vyamajilo vali nakutwama mukujila tahi?

Twambenga ngana ngwetu, muka-Kulishitu umwe naputuka kutala mivwimbimbi yauselesele kwauka wenyi. Chindende chindende, mwapwa navishinganyeka vyavipi, kaha keshi kufwila jino kupwa utoma kumeso aYehovako. Numba tuhu tato kana kanda yimulingise andupukile muvilinga vyaunyengwe, oloze nalitwamina kushinganyeka ‘vyuma vitoma, navize vili napuho yamwaza, navize vinawahe, navyuma vyatela kwalisa.’ (Fwili. 4:8) Chapwa chaunyengwe kutalanga mivwimbimbi yauselesele kaha cheji kwenyeka usoko wamutu naKalunga. Vyuma vyamajilo vyosena kavatela kuvivulukila muli etuko.—Efwe. 5:3.

Tuchitalenu hachakutalilaho chikwavo. Twambenga ngana ngwetu muka-Kulishitu umwe atwama natato yakulihemesa kuusonyi nakusangumuna peha, kaha nawa pamo eji kutalanga namivwimbimbi yauselesele. Numba tuhu Mbimbiliya kayavuluka hatoma ‘vyakulihemesa kuusonyiko,’ oloze tato kana yapwa yaunyengwe kaha yinahase kwenyeka vishinganyeka vyamutu. Nge mutu mwatwalaho natato kaneyi, kaha nahase kwenyeka usoko wenyi naYehova nakupwa waunyengwe kumeso aKalunga. Shikaho, twatela kukavangiza mazu akaposetolo Paulu akwamba ngwenyi, “tulitomesenu kuvyuma vyakupihisa vyosena” nawaze akuvuluka ngwenyi “jihenu vyuma vyakumijimba yenu vili hano hamavu, naujila, namajilo, nazangi yayipi, nakufwila vyuma vyavipi, nachipululu.”—Koli. 2, 7:1; Kolo. 3:5.

Kano kaye vayula kuli Satana keji kwitavisanga nakukundwiza vatu valinge vyuma vyamajilo. Ngocho, chinahase kupwa chachikalu kulihenda kuvilinga kanevi vyavipi. Oloze vaka-Kulishitu vamuchano kavatela kutambuka “cheka nganomu veji kutambukanga vaka-mafuchiko, omu veji kushinganyekanga vyaufwefwelekete kaha.” (Efwe. 4:17) Ngachize, kachi nge natulihenda kuvilinga vyaunyengwe numba tuli uka wetu, kaha Yehova mwatwitavisa tutambukenga ‘muJila yakujila.’

“Kakweshi Kukapwa Ndumbako”

Nge natusaka Kalunga wajila Yehova atwivwilenga kuwaha, kaha twatela kwalumuna twamiso yetu nakupwa nahanjikiso yamwaza. Hali Isaya 35:9 vamba ngwavo: “Kuze kakweshi kukapwa ndumbako, kaha [muJila yakujila] kamweshi kukakanduka kanyama wachimbangalako.” Vatu vaze vapwa vaukenya nahanjikiso yayipi vavafwanyisa kuvimbangala. Vatu vangachize kaveshi kapwa mulifuchi lyalihya lyaKalunga muze namukapwa kwoloka. (Isa. 11:6; 65:25) Shikaho, vosena vaze vali nakusaka Kalunga avevwile uselewa vatela kumbila vilinga vyavipi vyaunyama nakulinga vyuma vyajila.

Mbimbiliya yatuhuhumuna ngwayo: “Mbilenu nyangwa yayisasu yosena, namatoto, nandombo, nakuzunga, nakasautu, nakupihisa chosena hamwe.” (Efwe. 4:31) Kaha hali Wavaka-Kolose 3:8 vatulweza ngwavo: “Zulenu vyuma vyosenevi, nandombo, namatoto, nakupihisa, nakasautu, nakuhanjika mazu akwivwisa sonyi mutunwa twenu.” Lizu lyakwamba ngwavo “kasautu” vazachisa mujivesi kaneji jivali lyalumbununa mazu amapi, nakutomba, nakusaula vatu.

Makumbi ano, hanjikiso yayipi yakasautu yinalisale chikuma kuvatu, nahamembo. Malunga namapwevo vamwe vaze valimbata veji kulitukananga, nakulisaula, nakulitomba navana vavo hamwe. Oloze vaka-Kulishitu kavatela kupwa nahanjikiso kaneyi hamembo avoko.—Koli. 1, 5:11.

Nganyo Yakutwama “muKujila muWoma waKalunga”

Ocho kutokwa kana vayaya kuzachila Yehova uze apwa Kalunga wajila! (Yoshu. 24:19) Palachise yakushipilitu eyi atuhana Yehova yapwa yamwaza chiyovo. Ngachize chapwa chamwaza kupwa navilinga vyamwaza kumeso aYehova.

Palachise yahamavu yize atushika Kalunga kalinwomu yizenga. (Isa. 35:1, 2, 5-7) Vatu vaze vayitalilila nakupwanga navilinga vitoma vize asaka Kalunga navakavakisula nakuswana lifuchi kana. (Isa. 65:17, 21) Ngocho, tutwalenuho lika kulemesa Kalunga mujila yitoma nakupwa nausoko wakukola nayikiye.

[Kwinyikila chamwishi]

[Muvwimbimbi halifwo 26]

VaYuleya vatelelele kulinga ika numba vatambuke ‘muJila Yakujila’?

[Muvwimbimbi halifwo 27]

Kutalanga mivwimbimbi yauselesele cheji kwenyekanga usoko wamutu naYehova

[Muvwimbimbi halifwo 28]

“Mbilenu . . . kuzunga, nakasautu, nakupihisa chosena hamwe”