Musana Wapwa Wamwaza Chikupu!
ACHISHIINGANYEKENU omu chakaluhwa kupupuchila vyuma mumilima. Oloze nge vanamimunyikila mumunyi, munahase jino kumona vyuma kanawa. Lwola lumwe pamo mwapwile muukalu wakulinga nahameso wi kwijiva nge muli mumilima. Kutwala muze, mwawanyine mwakulingila, nakwivwa jino kuwaha kumuchima. Enga, tweji kwivwanga kuwaha chikupu hakutumunyikila mumunyi nge tuli mumilima.
Mulikulukaji lyamyaka lyakulivanga, vatu vavavulu vapwilenga mumilima yakushipilitu. Kaposetolo Petulu asonekelele vatu vaze valumukile kupwa vaka-Kulishitu ngwenyi: “[Kalunga] amisanyikile mumilima amisanyikilile mumusana wenyi wakukomwesa.” (WaPetulu 1, 2:9) Vatu kana vapwile mumilima kaha hinavapwa jino mumusana. Chuma kana tunahase kuchifwanyisa kukamwengo wakuyanda, uze keshi navausokoko, kaha hinavamumbata kutanga yakeke nakutwama nenyi kanawa.—Wavaka-Efwesu 2:1, 12.
‘Zangi Yenu Yakulivanga Munayiseze Lyehi’
Vaka-Kulishitu vakulivanga vawanyine “muchano,” chipwe ngwetu vapwile nalufwelelo lwamwenemwene. (Yowano 18:37) Musana wamunyikilile ava vaka-Kulishitu nakuvalingisa vafume mumilima yakushipilitu. Ngocho vamwene jino omu wawaha muchano. Oloze hakuhita chalwola, vaka-Kulishitu vamwe vaputukile kuzeya. Chakutalilaho, kusongo yalikulukaji lyamyaka lyakulivanga, chikungulwilo chavaka-Efwesu chapwile naukalu waunene. Ngocho, Yesu Kulishitu uze asangukile amwene ukalu wapwile muchikungulwilo kanechi nakwamba ngwenyi: “Ngunakumono namulonga, mwomwo zangi yove yakulivanga unayiseze lyehi. Shikaho anukanga muze unalimbuka, walumuke ulinge cheka vilinga vize vyakulivanga.” (Kusoloka 2:4, 5) Enga, vaka-Kulishitu vamuEfwesu vatelele kuzanga cheka Kalunga nakuzanga muchano.
Nyi ngachilihi yetu? Nayetu nawa twawahilila hakumona musana wakutachikiza muchano waMazu aKalunga. Echi chatulingisa jino tuzange muchano. Oloze ukalu tweji kumonanga mukuyoya unahase kuholesa zangi yetu yakuzanga muchano. Navyuma vize vili nakusolojoka “hamakumbi [ano] akukuminyina,” vinahase kuholesa zangi yetu. Tuli nakuyoyela mukaye kaze kali “mumyaka yayikalu,” kaze kanazale navatu vaze vapwa “vaka-kulizanga vavene, vaka-kuzanga jimbongo, vaka-kulitukwojola, vaka-kutangalala, vaka-kusaula vakwavo, vaka-kulikanga kuli visemi vyavo, kaveshi kusakwililako, vaka-kujiluluka.” (WaChimoteu 2, 3:1, 2) Evi vilinga vyavo vyavipi vinahase kutuzeyesa nakuholesa zangi yetu yakuzanga Yehova.
Kachi nge katweshi nazangi kana yize twapwilenga nayo hakulivangako, kaha twatela ‘kwanuka muze tunalimbuka, nakwalumuka.’ Twatela twalumuke nakupwa ngana muze twapwile hakavanga kushipilitu. Kaha twatela kuzangama mokomoko zangi yetu yakuzanga muchano nayihola. Ngocho, chapwa chachilemu kupwa nalutalililo lwamwenemwene nakutwalaho lika kuzanga Kalunga hohamwe namuchano wenyi.
‘Muchano Uze Watulingisa Kupwa Tuvana Vavisemi’
Mbimbiliya yikwechi muchano wamwaza mwomwo yeji kukumbululanga vihula vyavilemu vize vanalipikinga navyo vatu hamyaka yayivulu. Vihula vimwe shina evi: Mwomwo ika twapwilako? Kuyoya chalumbunukila muka? Mwomwo ika kwapwila upi? Uno nge mutu nafu, kutala eji kutwalaho lika kuyoya tahi? Yehova natumunyikila musana uze weji kutulingisanga twivwishise kanawa muchano wamuMbimbiliya. Kutala katwatela kuwahilila hakulinangula muchano kanouko tahi? Chikupu vene twatela kuwahilila.
Yesu alwezele tumbaji twenyi ngwenyi: “Muchano namukautachikiza, kaha muchano naukamilingisa kupwa muvana vavisemi.” (Yowano 8:32) Ndando yakusokola yaYesu yinatusokola kushili nakufwa. Muchano tunalinangula unatulingisa nawa twijive vyuma vahona kwijiva vatu mukaye kano katwama mumilima. Shikaho, kulihulika nakushinganyeka chikuma havyuma tunalinangula nachitukafwa tuzange chikuma Yehova naMazu enyi.
Kaposetolo Paulu asonekelele vaka-Kulishitu muTesolonyika ngwenyi: “Haze mwatambwile mazu amujimbu kana mwevwile kuli etu, akiko mazu aKalunga, kamwawetavilile nge himazu avatuko, oloze nganomwapwa vene, akiko mazu aKalunga, owo eji kuzatanga nawa muli enu munetava.” (Wavaka-Tesolonyika 1, 2:13) Vaka-Tesolonyika vevwile ‘nakwitavila mazu aKalunga nakuwahilila.’ Kaha kavapwile cheka “mumilima[ko],” oloze vapwile jino “vana vamusana.” (Wavaka-Tesolonyika 1, 1:4-7; 5:4, 5) Ava vaka-Kulishitu vejivile jino ngwavo Yehova ikiye Tengi, kaha apwa wangolo josena, wamangana, wazangi, nakutetela. Ngana mwavakwavo vaze vakavangijilenga Kulishitu, navaka-Tesolonyika nawa vejivile jino ngwavo Yehova alongesele jila yakufumishilamo shili yavo kuhichila mundando yakusokola yaMwanenyi Yesu Kulishitu.—Vilinga 3:19-21.
Numba tuhu vaka-Tesolonyika kavejivile muchano wosena wamuMbimbiliyako, oloze vejivile kwakuwana chinyingi chamuchano kana. Mazu-vasoneka vahwima anahase kulingisa mutu waKalunga kupwa “kuluwa mwosena kuvilinga vyamwenemwene vyosena.” (WaChimoteu 2, 3:16, 17) Vaka-Kulishitu muTesolonyika vatwalilengaho lika kulinangula Mazu aKalunga nakwijiva ngwavo musana wakufuma kuli Kalunga wapwa wamwaza chikupu. Kahechi chavalingishile kupwa vakuwahilila lwola lwosena. (Wavaka-Tesolonyika 1, 5:16) Ngocho, mukiko twatela kulinga nayetu nawa.
Mumunyi Wakutumunyikila Mujila Yetu
Muka-kwimba jisamu avulukile vyuma vyalingisa musana kupwa wamwaza ngwenyi: “Mazu ove anapu linongo kumahinji ami, anapu mumunyi mujila yami.” (Samu 119:105) Muchano wamuMazu aKalunga weji kutukafwanga tutambuke mujila yamwaza, nakulivwisa kuwaha kuyoya. Katwatela kupwa ngana mwawato unakuhungumukako. Kwijiva muchano nakuukavangiza nachitukafwa kuchina natupwa “tuvakutengatenga noku noku nakupekwomwoka najipeho jakunangula jeka najeka.”—Wavaka-Efwesu 4:14.
Mbimbiliya yamba ngwayo: “Kanda mufwelela kuli vilolo vavalemuko, chipwe kuli vana vavatu, ava vahona kukulwila.” Kaha yamba nawa ngwayo: “Natokwa ou ali naKalunga kaYakova kumukafwanga, ukwechi kutalilila chakutalilila Yehova Kalunga kenyi.” (Samu 146:3, 5) Kaha nawa kufwelela muli Yehova nachitukafwa kupwa vakumika nakuhona kulizakamina. Kaposetolo Paulu asonekele ngwenyi: “Kanda mukalizakaminanga chuma nachimweko, oloze muvyuma vyosena mulwezenunga Kalunga evi munasake, nakulomba nakulembelela nakusakwilila. Kaha kuunda chaKalunga, chikiko chahambakana kunangakana chosena, nachilamanga michima yenu navishinganyeka vyenu muli Kulishitu Yesu.” (Wavaka-Fwilipi 4:6, 7) Enga, kukavangiza musana wamuMazu aKalunga cheji kutukafwanga chikupu.
Munyikenunga Nge Manongo Muli Vaka-Mavu
Chuma chikwavo chalingisa musana wamuMazu aKalunga upwenga wamwaza shina weji kutusokolwelanga chikolo chakwazana mumulimo waulemu. Yesu alwezele vaka-kumukavangiza ngwenyi: “Yenunga, mukavetavise vaka-mafuchi osena, mukavambapachisenga mulijina lyaTata naMwana nashipilitu [ya]jila, mukavanangulenga kulamanga vyuma vyosena vize ngwamilwezele. Kaha talenu, Ami nguli nayenu hamwe makumbi osena, palanga nakukukuma chamyaka.” Shimbu kanda Yesu ahane lushimbi kanelu, avangilile kuhanjika ngwenyi: “Ngolo josena vananguhanejo lyehi, neji jamwilu neji jahamavu.”—Mateu 28:18-20.
Jino veya veji kukafwanga vaka-Kulishitu vamuchano mumulimo wavo wakwambulula mujimbu wamwaza nakunangula vatu muchano wamuMbimbiliya mukaye kosena? Yesu afwelelesele vaka-kumukavangiza ngwenyi mwapwanga navo hamwe. Chikupu vene, Yesu napunga nakukafwa vaka-Kulishitu omu ‘vanamunyikanga nge manongo’ mumulimo wavo wakwambulula nahakusolola ‘vilinga vyeka vyamwaza.’ (Mateu 5:14-16) Navangelo nawa veji kukundwizanga mulimo kanou wakwambulula. (Kusoloka 14:6) Nyi ngachilihi Yehova Kalunga? Kaposetolo Paulu asonekele ngwenyi: “Ami ngwatumbile, Apolo atukumwinyine meya, oloze Kalunga emishile.” Enga, twatokwa chikupu hakupwa “tuvaka-kuzachila milimo hamwe vaKalunga.”—Wavaka-Kolinde 1, 3:6, 9.
Achitalenu nawa omu Kalunga ali nakukisula mulimo atuhana. Kakweshi chuma numba chimwe tunahase kwesekesa kumulimo atuhana Kalunga ‘wakumunyika nge manongo hano hamavuko.’ Nge natusololanga musana wakufuma muMazu aKalunga kuhichila muhanjikiso namuvilinga vyetu, kaha tunahase kukafwa vatu vamichima yamwaza. (Wavaka-Fwilipi 2:15) Echi nachitulingisa tupwenga natwima nakuwahilila hakwambulula nakunangula vatu, ‘mwomwo Kalunga keshi wakuhenga numba avulyame vilinga vyetu, nazangi kana tunasolola yakuzanga lijina lyenyiko.’—WavaHepeleu 6:10.
‘Landenu Maji Akukwita haMeso Enu’
Yesu atumine mujimbu kuchikungulwilo chaLauchiseya mulikulukaji lyamyaka lyakulivanga, wakwamba ngwenyi: ‘Landenu kuli ami maji akukwita hameso enu mangana mumone. Aminyi, veshovo ngwazanga ngweji kuvahanjikilanga nakuvazangamisa.’ (Kusoloka 3:18, 19) Vitumbo vyakukisa upuputa wakushipilitu vyapwa “maji,” aze emanyinako kunangula nakuzangamisa chaYesu. Nge natusaka tupwenga lika vavakangule kushipilitu kuvanga twitavile kuhuhumuna chaYesu nakulyononona kuli Ikiye nakukavangiza jindongi jamuMbimbiliya. Twatela nawa kupwa namuchima ngana waKulishitu nakukavangiza chakutalilaho chenyi. (Wavaka-Fwilipi 2:5; WaPetulu 1, 2:21) Maji avulukile Yesu kawapwa awanako, mwomwo ambile ngwenyi: ‘Landenu kuli ami.’ Ndando yakulanda maji kana shina lwola nangolo jetu.
Nge tunafumu mumilima, nakwingila mukapete muze muli linongo, heji kuhitanga shimbu numba tutaunuke hameso. Chochimwe nayetu nawa, kulinangula Mazu aKalunga cheji kumbatanga lwola numba tuhase kumona musana wamuchano. Cheji kumbatanga lwola hakulihulika nakushinganyeka havyuma tunalinangula nakwijiva jino omu walema muchano. Chipwe ngocho, chapwa chamwaza kuzachisanga lwola nangolo jetu kuvyuma kanevi. Mwomwo ika? Mwomwo musana wapwa wamwaza chiyovo!
[Muvwimbimbi halifwo 14]
‘Landenu kuli ami maji akukwita hameso enu mangana mumone’