Vyuma Natulinangula Kumuchima Wakutalilila Chikoki Wayehova Nayesu
“Monenunga muchima wakutalilila chikoki waMwata wetu ngwenu ulwilo.”—PETU. 2, 3:15.
NAMUKUMBULULA NGWENU NGACHILIHI?
Uno Yehova nasolola ngachilihi nge akwechi muchima wakutalilila chikoki?
Mwomwo ika Yesu atelele kupwa namuchima wakutalilila chikoki hatando yayisuku?
Vyuma muka twatela kulinga mangana tulondezeze muchima waKalunga wakutalilila chikoki?
1. Vyuma muka veji kuhanjikanga vangamba jaYehova vamwe?
NDUMBWETU umwe wapwevo nazachilanga Yehova nakumika muvyeseko hamyaka yayivulu. Ambile ngwenyi: “Uno nangukamona kukuma chamyaka shimbu kanda nguchifwe tahi?” Omu mukiko vanahanjikanga navatu veka vaze vanazachila Yehova hamyaka yayivulu. Tuli nakutalila omu Kalunga mwakafumisako ukalu wosena nakulingisa vyuma kupwa vyavihya. (Kuso. 21:5) Numba tuhu twafwelela ngwetu kalinwomu vafumiseko kano kaye kaSatana, oloze chapwa chachikalu kupwa namuchima wakutalilila kwiza chalikumbi kana.
2. Vihula muka natushimutwila vize vinahanjika hamuchima wakutalilila chikoki?
2 Mbimbiliya yatulweza nge twatela kupwa namuchima wakutalilila chikoki. Nge natupwa nalufwelelo lwakukola namuchima wakutalilila chikoki kaha natukamona omu najikatesamo jishiko jaYehova, ngana muze chapwile kuli vangamba jaKalunga vakunyima. (Tangenu WavaHepeleu 6:11, 12.) NaYehova vene atwama namuchima wakutalilila chikoki, mwomwo nge pimbi kachi anongesele lyehi kano kaye. Oloze ali nakuvandamina lwola lwakutamo atongola. (Loma 9:20-24) Jino mwomwo ika eji kutalililanga chikoki? Uno Yesu asolola ngachilihi muchima wakutalilila chikoki? Vyuma muka natunganyala nge nayetu natupwa namuchima kanou? Kukumbulula vihula kanevi nachitukafwa tuzamise lufwelelo lwetu nakupwa namuchima wakutalilila, numba tuhu tunahase kumona ngwetu Yehova ali nakulangisa.
MWOMWO IKA YEHOVA EJI KUTALILILANGA CHIKOKI?
3, 4. (a) Mwomwo ika Yehova nasolwela muchima wakutalilila chikoki hakusaka atesemo vyuma ajinyine hano hamavu? (b) Yehova alingile ngachilihi omu vatu valikangile muEtene?
3 Yehova atachikiza ovyo vili nakumulingisa numba atalilile vatu chikoki. Chipwe tuhu atwama nangolo havyuma vyosena atenga, oloze chihande chakulikanga chepukile mulitepa lyaEtene chanehele vihula vyavilemu. Yehova natalililanga lika chikoki mwomwo atachikiza ngwenyi chasakiwa lwola lwakutamo numba akumbulule vihula kana mujila yamwenemwene. Hakuwana nge atachikiza kanawa vishinganyeka vyatungelo navatu, ngachize ali nakulinga vyuma vize navitunganyalisa yetu.—Hepe. 4:13.
4 Yehova ajinyine ngwenyi Alama naEve vaseme nakuzalisa hano hamavu. Omu Satana ongele Eve nakulingisa Alama alikange, Kalunga kavulyamine vyuma ajinyine hakavangako. Kapihililileko, chipwe kulusuka kulinga vyuma chakuzeneka kushinganyeka chipwe kusuvilila vatuko. Oloze asungamishileko jila yeka yakuteselamo vyuma ajinyine kulingila vatu nakuwahisa hamavu. (Isa. 55:11) Hakusaka atesemo vyuma ajinyine nakuhakwila wata wenyi, Yehova napunga namuchima wakutalilila chikoki hakuhichisamo myaka yayivulu mangana vyuma kana vitesemo kanawa.
5. Vyuma muka natukanganyala kumuchima waYehova wakutalilila chikoki?
5 Yehova nawa asolola muchima wakutalilila chikoki mwomwo asaka vatu vavavulu vakayoye myaka yosena. Makumbi ano ali nakuwahisa vyuma mangana akayovole “liyongomena lyalinene.” (Kuso. 7:9, 14; 14:6) Yehova ali nakulanya vatu vezenga nakulinangula vyaWangana wenyi najishimbi jenyi jakwoloka kuhichila mukwambulula mujimbu wamwaza uze tuli nakuzata etu vangamba jenyi. Mujimbu waWangana ukiko “mujimbu wamwaza” vatela kwivwa vatu vosena. (Mateu 24:14) Vatu vaze eji kukokanga Yehova veji kwizanga jino muliuka lyenyi nakulikata navangamba jenyi vaze vazanga vyuma vyakwoloka. (Yowa. 6:44-47) Eji kuvakafwanga mangana vapwenga vatoma kumeso enyi. Nasakulanga nawa vatu vamwe hano hamavu mangana vakayule mufulumende yamwilu. Omu vosena navakapwa havihela vyavo vyamwilu, navakakafwa vatu vakwononoka vakakupuke mwosena nakukayoya myaka yosena. Shikaho, nahalwola kanelu ali nakutalilila vatu chikoki, Yehova napunga lika nakuzata mangana atesemo vyuma ajinyine vize navikatunganyalisa.
6. (a) Yehova asolwele ngachilihi muchima wakutalilila chikoki mumakumbi aNowa? (b) Yehova ali nakusolola ngachilihi muchima wakutalilila makumbi ano?
6 Yehova atwama namuchima wakutalilila chikoki numba tuhu vatu vamwe vali nakumusaulanga, ngana muze chapwile shimbu kanda livaji lyaNowa. Hamavu hazalile navilinga vyaukenya nauvumbi, kaha Yehova “alinyengele mumuchima wenyi” mwomwo vatu valingilenga chikuma vyuma vyaunyengwe. (Kupu. 6:2-8) Oloze kasakile vatu kana vatwalililehoko, ngocho ajinyine kuneha livaji mangana anongese vipapwoki vosena. Yehova apwile nakuvatalilila chikoki, akafwile Nowa natanga yenyi mangana vayovoke. (Petu. 1, 3:20) Jino omu lwahetele lwola atongwele, Yehova alwezele Nowa asonge wato. (Kupu. 6:14-22) Nowa apwile “muka-kwambulula kwoloka,” nakulweza vatu vambile vilinga vyavipi kuchina navanonga. (Petu. 2, 2:5) Yesu ambile ngwenyi lwola tuli nakuyoyelamo lwalifwana namakumbi aNowa. Yehova atongola likumbi lyakunongesa kano kaye kakapi, kaha kakweshi mutu ejiva “likumbi lize naola” kanako. (Mateu 24:36) Shikaho, Yehova natuhane mulimo wakuhuhumuna vatu vambile vilinga vyavipi mangana vakayovoke.
7. Uno Yehova ali nakushipwokela kutesamo vyuma ajina tahi? Lumbununenu.
7 Yehova hakutalilila vatu chikoki kachalumbununa nge ali nakuvandamina kaha makumbi achikikeko, chipwe ngwetu atuliula nakuhona kutuzakamako. Enga, hakupwa tuvatu tunahase kushinganyeka vyuma kana nge tuli muukalu chipwe tunakushinakaja. Pamo tunahase kwivwa kumuchima pwi nakwamba ngwetu Kalunga nashimbula chikuma kutesamo vyuma atushika. (Hepe. 10:36) Oloze twatela kwanuka ngwetu kwatwama vyuma vyavivulu vyamulingisa atalilile vatu chikoki, kaha nawa nayetu natunganyala kuvyuma kana. (Petu. 2, 2:3; 3:9) Tuchitalenu jino omu Yesu alondezezele Ise hakupwa namuchima wakutalilila chikoki.
UNO YESU ASOLOLA NGACHILIHI MUCHIMA WAKUTALILILA CHIKOKI?
8. Halwola muka Yesu asolwele muchima wakutalilila chikoki?
8 Yesu ali nakulinga mwaya kujina chaKalunga, kaha nalinginga vene ngocho hamyaka yayivulu. Omu Satana alikangile, Yehova ajinyine kutuma Mwanenyi umwe kaha wakulipwila kwiza hano hamavu nakupwa Meshiya. Achishinganyekenu hamuchima apwile nawo Yesu wakutalilila chikoki hamyaka yayivulu numba jino lwola atongwele Yehova lutesemo. (Tangenu Wavaka-Ngalesha 4:4.) Halwola apwile nakuvandamina likumbi atongwele Kalunga, Yesu katwamine kahako, oloze apwile nakuzata milimo amuhanyine Ise. Omu ejile hano hamavu, ejivile ngwenyi vatu jaSatana navakamujiha ngana muze wavulukile upolofweto. (Kupu. 3:15; Mateu 16:21) Alisuwile kulinga mwaya muchima waKalunga chamokomoko navihuli, nakuyanda amwene. Shikaho, Yesu atusela chakutalilaho chamwenemwene chakulyononona kuli Kalunga.—Hepe. 5:8, 9.
9, 10. (a) Vyuma muka nalinginga Yesu hakuvandamina vyuma lwola atongola Yehova vitesemo? (b) Twatela kulondezeza ngachilihi chakutalilaho chaYesu?
9 Omu Yesu asangukile vamuhanyine wata wamwilu nahamavu. (Mateu 28:18) Eji kuzachisanga wata kana mangana atesemo vyuma ajina Yehova kweseka nalwola anoneka Kalunga. Yesu atwamine lika kulivoko lyachilyo lyaKalunga palanga namu 1914 omu valingishile vaka-kole kupwa chitwamo chavilyachilo vyenyi. (Samu 110:1, 2; Hepe. 10:12, 13) Kalinwomu afumiseko kano kaye kaSatana. Halwola luno Yesu ali nakuzachila hamwe navatu jaKalunga nakuvatwaminyina ‘kumeya akuyoya.’—Kuso. 7:17.
10 Uno munamono omu munahase kulondezeza chakutalilaho chaYesu tahi? Yesu atachikijile ngwenyi Yehova asakula likumbi lyakulinga vyuma ajina. Afwililile kulinga vyuma asakile Ise, kana nawa alisuwile kuvandamina lwola atongola Yehova. Omu tuli nakuvandamina kukuma chakano kaye kaSatana, twatela kupwa namuchima wakutalilila chikoki nakuvandamina vyuma mwatulweza Yehova. Katwatela kuzeyako hakushinganyeka ngwetu likumbi lyaYehova kalyejile washiko. Jino vyuma muka twatela kulinga mangana tupwenga namuchima kana?
VYUMA MUKA NATUNGANYALA NGE NATUPWA NAMUCHIMA WAKUTALILILA CHIKOKI?
11. (a) Uno lufwelelo nakutalilila chikoki vyazachila ngachilihi hamwe? (b) Vyuma muka vyatela kutulingisa tupwenga nalufwelelo lwakukola?
11 Shimbu kanda Yesu ezenga hano hamavu, tupolofweto navangamba jaYehova veka vasolwele chakutalilaho chamwaza chakupwa namuchima wakutalilila chikoki, numba tuhu vapwile vakuhona kukupuka mwosena. Vasolwele muchima kanou mwomwo vapwile nalufwelelo. (Tangenu WaYakova 5:10, 11.) Kachi nge vahonene kwitavila chipwe kufwelela vyuma vize avashikile Yehova, kachi kavahashile kuvandamina vyuma kanako. Oloze vomikile muvyeseko namuvihuli vahichilemo mukuyoya chavo mwomwo vafwelelele ngwavo Kalunga mwakatesamo vyuma avashikile. (Hepe. 11:13, 35-40) Mbimbiliya yatulweza nge tukwechi vyuma vyavivulu vize vyatela kuzamisa lufwelelo lwetu makumbi ano. Yesu apwa “Muka-kukupwisa lufwelelo lwetu.” (Hepe. 12:2) Ateselemo upolofweto wauvulu nakutukafwa twivwishise kanawa vyuma ajina Kalunga.
12. Vyuma muka twatela kulinga mangana tuzamise lufwelelo lwetu?
12 Vyuma muka twatela kulinga mangana tuzamise lufwelelo lwetu nakupwa namuchima wakutalilila chikoki? Chuma chachilemu shina kukavangiza jishimbi jaKalunga. Chakutalilaho, tushinganyekenu vyuma vyeji kutulingisanga mangana tuhake kulutwe Wangana waKalunga. Kutala munahase kuwanako jijila jimwe jakuzachishilamo mazu ahali Mateu 6:33 tahi? Munahase kuvulisako maola akuzata muwande, chipwe kwashiwisako chiyoyelo chenu. Pamo Yehova namikisula lyeyi mujijila jimwe najimwe hakulisuula chenu chakufwila kukavangiza jishimbi jenyi. Pamo namikafwe lyehi kuwana chilongesa chaMbimbiliya chipwe kumihana “kuunda chaKalunga chize chahambakana kunangakana chosena.” (Tangenu Wavaka-Fwilipi 4:7.) Omu namushishika havyuma munanganyala, namuwana nge chapwa chamwaza kupwa namuchima wakutalilila chikoki.—Samu 34:8.
13. Chakutalilaho muka chinasolola omu lufwelelo lunahase kutulingisa tupwenga namuchima wakutalilila chikoki?
13 Tutalenu hachakutalilaho chimwe chize nachisolola omu lufwelelo lunahase kutukafwa tupwenga namuchima wakutalilila chikoki. Njimi eji kutumbanga vimbuto, nakuvishikilila, nakuvyaha jino nge vinahi. Nge jimbuto jinalovoka kanawa, njimi eji kutumbanga nawa jimbuto jajivulu mwaka naukavangizaho. Eji kuvandaminanga swi noho najikahila numba tuhu natachikiza ngwenyi nahahita shimbu yayisuku. Eji kufwelela ngwenyi najikahya. Nayetu nawa omu natulinangula jishimbi jaYehova nakujikavangiza, nakumona vyuma vyamwaza vyeji kufumangamo, lufwelelo lwetu naluzama mbe. Echi nachitukafwa tupwenga namuchima wakutalilila chikoki, nakuvandamina vyuma vyamwaza atushika Yehova.—Tangenu WaYakova 5:7, 8.
14, 15. Twatela kulinga ika hakumona omu vatu vali nakuyanda?
14 Jila yikwavo tunahase kupwa namuchima wakutalilila chikoki shina kushinganyeka vyuma vinakusoloka muno mukaye naukalu tuli nakumona, nakweseka kumona vyuma ngana muze avimona Yehova. Chakutalilaho, achishinganyekenu omu Yehova eji kwivwanga nge vatu vali nakuyanda. Yehova nevunga kupihya hakumona vatu navayanda hamyaka yoseneyi. Oloze echi kachamufutwishile kumuchima nakumulingisa alitwamine kulinga vyuma vyamwazako. Atumine Mwanenyi wakulipwila mangana “enyeke milimo yaLiyavolo” nakufumisako kuyanda chize Satana aneha havatu. (Yowa. 1, 3:8) Tunafwelela ngwetu kalinwomu Kalunga afumiseko kuyanda chosena haya myaka yosena. Ngachize katwatela kwitavisa vilinga vyavipi vyamuno mukaye vizeyese lufwelelo lwetuko. Oloze twatela kutalilila kulutwe omu Yehova mwakatesamo vyuma ajina, nakufwelela mujishiko jenyi jize katwamona namesoko jize najikelila myaka yosena. Yehova atongola likumbi lize mwakakumisa kuhuka chosena chakuzeneka kulangisa.—Isa. 46:13; Nahu. 1:9.
15 Makumbi ano, twatela kumika muukalu uze tunakuhitamo mangana tulame lufwelelo lwetu. Tunahase kuyanda navausoko mwomwo yaulyanyi chipwe ukalu weka wamukuyoya. Muchishishisa chakuyayavala haukalu kana, twatela kufwelela muli Yehova namuchima wetu wosena. Chinahase kutukaluhwila kulinga ngocho mwomwo katwakupuka mwosenako. Oloze twatela kwanuka vyuma alingile Yesu vize vasoneka hali Mateu 26:39.—Tangenu.
16. Vyuma muka twatela kulihendako omu tuli nakuvandamina kukuma chakaye?
16 Mutu mwakakasana ngwenyi kukuma chili kwakusuku, nahase kupwa namuchima wakandakundaku nakulinga kala vyuma nasake. Nahase kuhungukila kuvyuma vyenyi vyamukuyoya nakushinganyeka ngwenyi pamo Yehova keshi kukatesamo jishiko jenyiko, nakusembulula ngwenyi, ‘kwijinganyi nge Yehova mwatesamo vyuma ashika.’ Vishinganyeka kana vinahase kumulingisa ahone kupwa namuchima wakutalilila chikiko. Nahase jino kufwila kuya fuma mukaye kano, chipwe kumona jimbongo kupwa jajilemu chikuma mukuyoya chenyi nakuzeneka jino kufwelela muWangana waKalunga. Nahase kushinganyeka kuya kumashikola ahelu mangana kulutwe akatwame muuhando. Echi nachisolola hatoma nge lufwelelo lwenyi lwakuhehela. Anukenu ngwenu Paulu atulweza tulondezeze vangamba jaKalunga vakunyima vaze vapwile “nalufwelelo namuchima wakutalilila chikoki,” vaze vatambwile vyuma avashikile Yehova. (Hepe. 6:12) Yehova atongola lwola mwakanongesa tulingilo twatupi kweseka nakujina chenyi. (Hamba. 2:3) Omu tuli nakuvandamina lwola kana, twatela kuzata nangolo milimo yaYehova. Twatela kwanuka ngwetu tuli nakutwama mumakumbi akukuminyina, shikaho twatela kwambulula mujimbu wamwaza. Echi nachitulingisa tupwenga vakuwahilila oholyapwa.—Luka 21:36.
VYUMA MUKA NATULIVWISA KUWAHA NGE NATUPWA NAMUCHIMA WAKUTALILILA CHIKOKI?
17, 18. (a) Vyuma muka twatela kulinga omu tuli nakuvandamina likumbi lyaYehova? (b) Vyuma muka tunahase kulivwisa kuwaha nge natupwa namuchima wakutalilila chikoki?
17 Numba tunazachila Yehova hatukweji vavandende chipwe hamyaka yayivulu, tuli nakusaka kumuzachila myaka yosena. Kupwa namuchima wakutalilila chikoki nautukafwa tumike palanga nakusongo chamokomoko namyaka natuvandamina. Yehova ali nakutuhana lwola twatela kusolola nge twafwelela muvyuma ajina kahechi nachitulingisa tushishike kuli ikiye numba tuhu natumona ukalu. (Petu. 1, 4:13, 14) Kalunga ali nawa nakutunangula vyuma vize navitukafwa tumike muukalu palanga nakusonga omu mwakatulwila.—Petu. 1, 5:10.
18 Yesu akwechi wata wamwilu nahamavu, kaha kakweshi weka mwahasa kumihukula mulivoko lyenyiko nge namutwalaho lika kushishika. (Yowa. 10:28, 29) Kanda namwivwa woma kufwa chipwe vyuma vyeka vize navikasoloka kulutweko. Shikaho vosena vaze navakakachila palanga nakusonga navakavalwila. Kanda kwitavila vyuma vyamuno mukaye vitutangule nakutulingisa tuhone kufwelela muli Yehovako. Twatela kuzamisa lufwelelo lwetu nakuzachisa kanawa lwola lwetu.—Mateu 24:13; tangenu WaPetulu 2, 3:17, 18.
[Mivwimbimbi halifwo 21]
Muchima wakutalilila chikoki naumikafwa mushishike havyuma vyaWangana nakukamikisula