Matewu
1 Mukanda wahosha hachihandilu* chaYesu Kristu,* mwana kaDavidi, mwana kaAbarahama:
2 Abarahama wavweli Isaka;
Isaka wavweli Yakoba;
Yakoba wavweli Yuda nianakwindi;
3 Yuda wavweli Perezi niZera mudi Tamari;
Perezi wavweli Hezeroni;
Hezeroni wavweli Rami;
4 Rami wavweli Aminadabi;
Aminadabi wavweli Nashoni;
Nashoni wavweli Salimoni;
5 Salimoni wavweli Bowazi mudi Rahaba;
Bowazi wavweli Obedi mudi Luti;
Obedi wavweli Yesi;
6 Yesi wavweli mwanta Davidi.
Davidi wavweli Solomoni mudi ona wadiña ñoda Uriya;
7 Solomoni wavweli Rehobowami;
Rehobowami wavweli Abiya;
Abiya wavweli Asa;
8 Asa wavweli Yehoshafwati;
Yehoshafwati wavw
Yehorami wavweli Uziya;
9 Uziya wavweli Yotami;
Yotami wavweli Ahazi;
Ahazi wavweli Hezekiya;
10 Hezekiya wavweli Manasi;
Manasi wavweli Amoni;
Amoni wavweli Yosiya;
11 Yosiya wavweli Yekoniya nianakwindi hampinji yadiñawu kwakwihi nakuyitwala kuBabiloni.
12 Hadiñawu muBabiloni, Yekoniya wavweli Sheyaleteli;
Sheyaleteli wavweli Zerubabeli;
13 Zerubabeli wavweli Abiyudi;
Abiyudi wavweli Eliyakimu;
Eliyakimu wavweli Azori;
14 Azori wavweli Zadoki;
Zadoki wavweli Akimu;
Akimu wavweli Eliyudi;
15 Eliyudi wavweli Eleyazari;
Eleyazari wavweli Matani;
Matani wavweli Yakoba;
16 Yakoba wavweli Yosefu nfumwa Mariya, Mariya wavweli Yesu atenañawu nawu Kristu.
17 Dichi kufuma hadi Abarahama nakushika hadi Davidi hadiña makiñu 14; kufuma hadi Davidi nakushika hampinji yayitwaliliwu kuBabiloni hadiña makiñu 14; kufuma hampinji yayitwaliliwu kuBabiloni nakushika hampinji yaKristu hadiña makiñu 14.
18 Dichi kuvwalika kwaYesu Kristu kwadiña ñaana. Hampinji yamwoteliwu mama yindi Mariya kudi Yosefu, amuweni nevumu demitiliyi naspiritu yajila* henohu kanda adisumbuli. 19 Hela chochu, chelili nfumwindi Yosefu wadiña waloña nawa hakeñeleña kumusawisha hamesu awantuku, wafuukwili kumuseñela kumbadi. 20 Ilaña chelili natoñojoki dehi hayumiyi, wamweni kañelu kaYehova* muchilota nawa wamulejeli nindi: “Yosefu, mwana kaDavidi, bayi wutiya woma wakusumbula ñodeyi Mariyaku, muloña nabaabi idi ivumu naspiritu yajila. 21 Wakavwala mwana weyala, eyi wakamutumba ijina dindi neyi Yesu,* muloña diyi wakamwina antu jindi kunshidi jawu.” 22 Kafwampi yuma yejimiyi yamwekeni kulonda yishikiji yuma yahosheliyi Yehova kuhitila mudi kaprofwetu kindi nindi: 23 “Tiyenu! Mumbanda mujiki* wakabaaba ivumu nawa wakavwala mwana weyala, akamutumba ijina nawu Emanuweli,” neyi kudibalumuna daya mukwila nawu, “Nzambi Wudi Nanetu.”
24 Kuhiñahu Yosefu wahindukili mutulu nawa welili mwamulejeliwu kudi kañelu kaYehova, wasumbwili ñodindi. 25 Ilaña hadikaamini nindiku kushika nihampinji yavweliyi mwana weyala nawa wamutumbili nindi Yesu.