Matewu

14 Hayoyenoyu mpinji, Herodi nyuuli wankambi watiyili mpuhu yaYesu 2 nawa walejeli añamba jindi nindi: “Iwu diyi Yowanu Mupapatishi. Asañwiliwu kufuma mudi afu, nawa ichi dichamukojeja yekali nañovu yakukalakala iyi nyidimu yañovu.” 3 Herodi* wamukwatili Yowanu nakumukasa nawa wamushili mukaleya muloña waHerodiya, ñoda manakwindi Fwilipu. 4 Muloña Yowanu wamulejeleña Herodi nindi: “Kwesekeja nanshimbi, hiwatela kumusumbulaku.” 5 Hela chakwila wakeñeleña kumujaha Yowanu, watiyili woma wezaza dawantu, muloña Yowanu amwilukili nawu hikaprofwetu. 6 Ilaña hampinji yadiñawu nakwanakana ifuku davwalikiliyi Herodi, mwana kaHerodiya wamumbanda wahañeni hachidika chenichi nakumutiyisha ­Herodi kuwaha nankashi, 7 chakwila wamukanini nakusanyika kumwinka chuma chejima chadi kulombayi. 8 Dichi iwu mwana wamumbanda welili mwamulejeliwu kudi mama yindi, nakulomba nindi: “Nyinki mutu waYowanu Mupapatishi hanichi cheña.” 9 Hela chakwila mwanta waneñeli, wayilejeli nindi amwinki iwu mwana wamumbanda mutu waYowanu muloña wakusanyika kwasanyikiliyi nimuloña wawantu adiileñayi hamu nawu.* 10 Watemesheli antu kulonda ayi nakumuketula Yowanu mutu mukaleya. 11 Dichi mutu waYowanu awuleteli hacheña nakumwinka iwu mwana wamumbanda, yena nawa wawutwalili kudi mama yindi. 12 Kuhiñahu, atumbanji twindi enjili nakusenda mujimba windi nakuwujiika; nkumininaku ayili nakumulejamu Yesu. 13 Yesu chatiyiliyi chumichi, wafumini kunodu iluña nawatu nakuya kwiluña kwakankawindi. Ilaña mazaza awantu chelukiliwu nawu nayi, amulondeleleli hamaseki kufuma munyisumba.

14 Chashikiliyi kuchikumu, wamweni izaza deneni dawantu, wayitiyilili wushona, hakuyuukila antu jawu ejima adiña akata. 15 Chikwelili melela, atumbanji twindi enjili kudi yena nakumwila nawu: “Kudinu iluña hikwashakamaña antuku nawa mpinji yinamani dehi; lejaku mazaza awantu ayi munyikala kulonda akalandi yakuda yawu.” 16 Ilaña Yesu wayilili nindi: “Hiyatela kuyaku; yowenenu yinkenu yakuda.” 17 Wena amwakwili nawu: “Etu kunu hitukweti yakudaku, ilaña tukweti hohu mankendi atanu niinshi jiyedi.” 18 Yena wayilili nindi: “Letenu kunu owu mankendi niinshi.” 19 Kuhiñahu walejeli mazaza awantu kushakama hamatahu. Wanoneli owu mankendi atanu niinshi jiyedi, watalili mwiwulu nakulomba nawa wahumwini mankendi nakuyinka atumbanji, atumbanji niwena enkeli mazaza awantu. 20 Dichi wejima wawu adiili nawa ekutili chakwila anoneli yakuda yashalilihu nakuyisha muyimpaya* 12 nawa yenzeli to-o. 21 Antu adiili adiña amayala kwakwihi na 5,000, kushilahu ambanda nianyana anyanya. 22 Hohenohu walejeli atumbanji twindi nindi akandami muwatu kulonda atwaminiku nakuya kuchikumu chakwishinadi, ilaña yena washalili nakuleja mazaza awantu nindi ayi kwawu.

23 Chelili mazaza awantu anayi dehi, wayili hampidi nkawindi nakulomba. Wadiña kwenoku nichikwelili melela. 24 Haniyi mpinji watu wadiña hahalehi nankashi nakuchikumu nawa wadiña nakubenkañila namankanda muloña wampepela yafumineña kwayileñawu. 25 Dichi hachilu chawufuku chamuchiwana,* Yesu wenjili kwadiñawu iku nakwenda hakaluñalwiji. 26 Chamumweniwu nakwenda hakaluñalwiji, atumbanji atiyili woma nakuhosha nawu: “Himujimu!”* Nawa abidikili muloña wawoma watiyiliwu. 27 Hohenohu Yesu wayilejeli nindi: “Kolenu! Iyami; bayi mutiya womaku.” 28 Petulu wamwilili nindi: “Mwanta, neyi yeyi, nleji ninzi kudi eyi hamenji.” 29 Yena wamwilili nindi: “Inzaña!” Dichi Petulu wafumini muwatu nawa wendeli hamenji nakuya kwadiñayi Yesu. 30 Ilaña chamweniyi mpepela yeneni, watiyili woma. Nawa chatachikiliyi kunekama, wabidikili nindi: “Mwanta, ñamwini!” 31 Hohenohu Yesu wolweli chikasa chindi nakumukwata nawa wamwilili nindi: “Eyi wukweti chikuhwelelu chantesha, wajinokeladi?” 32 Chelili anakandami dehi muwatu, mpepela yeneni yalekeli. 33 Dichi atumbanji adiña muwatu adifukwili* kudi yena, nakuhosha nawu: “Chalala wudi Mwana kaNzambi.” 34 Nawa awukili nakushika mwituña daGenesareta.

35 Antu amunodu iluña chamwilukiliwu, atandishili nsañu mumaluña amakwawu amunodu ituña, dichi antu amuleteleli antu ejima akata. 36 Nawa amulembeleli nawu akwati hohu kunzombu yachakuvwala chindi chahewulu, dichi antu ejima akwatiliku, akoleli chikupu.