Maku
10 Kufuma kwenoku, wanyamukili nakuya kujiñinza jaYudeya mwishinadi daYodana, kwenoku mazaza awantu apompeli cheñi kudi yena. Watachikili kuyitañisha cheñi neyi chochelileñayi dikalu. 2 Dichi aFwarisi enjili kudi yena kulonda amweseki nawa amwihwili neyi chakwila nshimbi yeteja iyala kuseña ñodindi. 3 Yena wayakwili nindi: “Indi Mosi wayilejeli nindidi?” 4 Wena amwakwili nawu: “Mosi wetejeli iyala wejima wukuhaña ñodindi kusoneka mukanda wakumuseñelahu wunakumwekesha nawu namuseñi.” 5 Hela chochu, Yesu wayilejeli nindi: “Hamuloña wakukola kwanyichima yenu, dichaleñeleli Mosi yayisonekeli ilu lushimbi. 6 Ilaña, kufuma tuhu kukutachika kwakuleña yuma, ‘Wayileñeli iyala nimumbanda. 7 Hamuloña wachumichi, iyala wakashiya tata yindi nimama yindi, 8 nawa wejima wawu ayedi akekala mujimba wumu,’ dikwila nawu hiyadi cheñi ayediku, ilaña adi mujimba wumu. 9 Dichi, chuma chinabombiyi Nzambi hamu, muntu bayi yachaambulaku.” 10 Hampinji yadiñawu cheñi mwitala, atumbanji atachikili kumwihula haniyi nsañu. 11 Yena wayilejeli nindi: “Muntu wejima wukuseña ñodindi nakusumbula wacheñi, neli dehi wujila nawa hadi washinshika kudi ñodindi watachiku, 12 nawa neyi mumbanda yaseña nfumwindi nakusumbuka neyala wacheñi, neli wujila.”
13 Antu atachikili kumuletela anyana anyanya kulonda yayikwati, ilaña atumbanji ayizuwilili. 14 Yesu chamweniyi chumichi, watiyili kutama nakuyileja nindi: “Yilekenu anyana anyanya enzi kudi ami; bayi muyilekeshaku, muloña Wanta waNzambi wawantu adi neyi awa. 15 Inakuyileja chalala nami, muntu wejima wabulaña kutambula Wanta waNzambi neyi mwana wanyanya hamba keñilamuku.” 16 Kuhiñahu, wakumbatili owu anyana anyanya nakutachika kuyikiswila nikuyinañika makasa.
17 Chayileñayi munjila, iyala wumu wenjili lufuchi nakumufukamina nakumwihula nindi: “Ntañishi Muwahi, chumanyi chinatela kwila kulonda nakekali nawumi wahaya nyaaka?” 18 Yesu wamwilili nindi: “Muloñadi chiwunanteneni neyi muwahi? Kwosi muntu muwahiku, chiña Nzambi hohu. 19 Weluka nshimbi jahosha nawu: ‘Bayi wujaha muntuku, bayi wila wujilaku, bayi wiyaku, bayi wushimuna wunsahu wakutwambaku, bayi wila wupwapokiku, lemeshaku tata yeyi nimama yeyi.’” 20 Owu iyala wamwilili nindi: “Ntañishi, oju nshimbi jejima najihembaña kufuma tuhu kuwansi wami.” 21 Yesu wamutalili iwu iyala nawa muloña wakumukeña, wamulejeli nindi, “Kudi chuma chimu chiwunabuli kwila: Yaku wakalandishi yuma yiwukweti wuyinki atuzweñi mali, kulonda wiikali neheta mwiwulu; kuhiñahu dinu winzi wiikali mukwakunlondela.” 22 Ilaña chatiyiliyi awa mazu amwakwiliwu, watiyili kutama, dichi wayili iku naneñi muloña wadiña namaheta amavulu.
23 Yesu chelili nashinshiki dehi antu adiñahu, wayilejeli atumbanji twindi nindi: “Antu akweti mali chakayikalila kwiñila muWanta waNzambi.” 24 Ilaña atumbanji ahayamini namazu ahosheliyi. Yesu wayilejeli cheñi nindi: “Enu anyanami, chakala nankashi kwiñila muWanta waNzambi! 25 Chaswayi ngameli kuhanuka mudisu dandoñu kubadika samaheta kwiñila muWanta waNzambi.” 26 Cheñi ahayamini nankashi nakumwila nawu:* “Komana dinu hinyi anateli kwamwinawu?” 27 Yesu chayishinshikiliyi, wayilejeli nindi: “Kudi antu chumichi chakala, ilaña kudi Nzambi kwosi chuma chakalaku, muloña kudi Nzambi kwosi chuma chakalaku.” 28 Petulu watachikili kumuleja nindi: “Talaña! Tunashiyi yuma yejima nakukulondela.” 29 Yesu wahosheli nindi: “Inakuyileja chalala nami, kwosi muntu wunashiyi itala hela amanakwindi hela ahelindi hela mama yindi hela tata yindi hela anyanindi hela maha kukoola ami nihamuloña wansañu yayiwahi 30 wakabula kutambwila mapampa 100 ayumiyi makonu, matala, amanakwindi, ahelindi, amama jindi, anyanindi nimaha namakabisha nawa nimunshakaminu yinakwinza,* wumi wahaya nyaaka. 31 Dichi antu amavulu anasambiliku, akekala akukumininaku, nawa anakumininiku, akekala akusambila.”
32 Chayileñawu munjila yaya kuYerusalema, Yesu watwamininiku nawa ahayamini nankashi, ilaña antu amulondeleleña atachikili kutiya woma. Watambikili cheñi apostolu indi 12 kwakankawawu nakutachika kuyileja yumiyi yadiña kwakwihi nakumumwekena, nindi: 33 “Tiyenu! Tunakukanduka nakuya kuYerusalema nawa Mwana kamuntu akumuhana mumakasa awakulumpi jawatupristu niansoneki. Dichi wena akumusompeshela kukufwa nawa akumuhana kudi antu akunyuza, 34 wena nawa akumusupisha, kumufwijila mazeñi, kumuvupola nikumujaha, ilaña neyi munahiti dehi mafuku asatu wakasañuka.”
35 Anyana kaZebedewu awamayala, Yakoba niYowanu enjili kudi yena nakumuleja nawu: “Ntañishi, tunakukeña wutwilili chuma chejima chitukukulomba.” 36 Yena wayihwili nindi: “Munakukeña niyilili chumanyi?” 37 Wena amwakwili nawu: “Tunakukeña wutwiteji kushakama naneyi mukulema kweyi, wumu kuchikasa cheyi chachidiilu, mukwawu nawa kuchikasa cheyi chachimunswa.” 38 Ilaña Yesu wayilejeli nindi: “Muneluki wanyi chuma chimunakulomba. Komana mukutwesha kunwa kaapu kinnakunwa ami* hela kupapatishewa nachipapatishu chinnakupapatishewa ami?” 39 Wena amwakwili nawu: “Tukutwesha.” Yesu chatiyiliyi mwahosheliwu, wayilejeli nindi: “Kaapu kinnakunwa ami,* mukunwa, nichipapatishu chinnakupapatishewa, ninenu dichi mukupapatishewa. 40 Ilaña kushakama kuchikasa chami chachidiilu hela chachimunswa hiyami watela kuhanaku, ilaña chambala chanowu aloñeshelawu dehi.”
41 Chelili akwawu atumbanji 10 atiyi chumichi, ayihililili aYakoba naYowanu. 42 Ilaña Yesu wayitambikili kwinza kudi yena nakuyileja nindi: “Enu mweluka nenu antu elukawu nawu anakuyuula nyuza, ekalaña nawuswa hadi antu jawu, nawa anlomboli niwena ekalaña nawuswa hadi antu jawu. 43 Ilaña enu bayi mwilaña mwenimuku; dichi muntu wejima wunakukeña kwikala muneni hakachi kenu, watela kwikala mukwakuyikalakela, 44 nawa muntu wejima wunakukeña kwikala watachi hakachi kenu, watela kwikala nduñu yawantu ejima. 45 Muloña Mwana kamuntu niyena, henjili nindi amukalakeliku, ilaña wenjili kulonda yakalakeli antu nikuhana wumi windi kwikala ifutu danyiloña dakukuula nachu antu amavulu.”
46 Kuhiñahu, enjili muYeriku. Ilaña yena niatumbanji twindi niizaza deneni dawantu chafumineñawu muYeriku, Baratimewu (mwana kaTimewu), mputamesu mukwakulomba-lomba, washakamini kunsa yanjila. 47 Chatiyiliyi nawu Yesu wakuNazareta diyi wunakuhita, watachikili kubilela nindi: “Yesu, Mwana kaDavidi, ntiyili luwi!” 48 Antu amavulu chatiyiliwu chabidikileñayi, atachikili kumuzuwila nakumuleja nawu yamwenihu, ilaña yena waswejeli kubilela nindi: “Mwana kaDavidi, ntiyili luwi!” 49 Dichi Yesu wemeni nakuhosha nindi: “Mutambikenu yenzi kudi ami.” Dichi amutambikili owu iyala mputamesu nakumwila nawu: “Kutiya woma nehi! Nyamukaku; nakukutambika.” 50 Chanatiliyi chakuvwala chindi chahewulu, wanyamukili lufuchi nakuya kudi Yesu. 51 Kuhiñahu Yesu wamwihwili nindi: “Wunakukeña nikwilili chumanyi?” Owu iyala mputamesu wamwakwili nindi: “Raboni,* ntoneshi mesu ami kulonda nitachiki kumona cheñi.” 52 Yesu wamwilili nindi: “Yaña. Chikuhwelelu cheyi chinakukoleshi.” Hohenohu watachikili kumona cheñi nawa watachikili kumulondela Yesu munjila.