Maku
7 Kuhiñahu, aFwarisi nawansoneki amu afumini kuYerusalema apompeli kwadiñayi Yesu. 2 Dichi amweni atumbanji twindi amu anakuda yakuda namakasa amajilu, dikwila nawa akadi kwisuka.* 3 (Muloña aFwarisi nawaYudeya ejima neyi anesuki wanyi kumakasa awu nakushika munkokola hiyadañaku, akolelaña kuchaaku chawankakulula jawu, 4 nawa neyi anafumi dehi kuchisankanu, hiyadañaku chiña asambila kuwela. Kudi yaaku yikwawu yayivulu yalondelañawu nawa yakolelawu, yidi neyi kujimika makaapu,* nyilondu niyuma yawuneñu mumenji.) 5 Dichi awa aFwarisi nawansoneki amwihwili nawu: “Muloñadi atumbanji tweyi chabulilañawu kulondela chaaku chawantu akushankulu, ilaña wena adaña yakuda yawu chakadi kwisuka?” 6 Yena wayakwili nindi: “Isaya waprofweteli chachiwahi hadi enu anfwikiji, neyi chochasonekawu nawu, ‘Awa antu anlemeshaña hohu nanyivumbu yawu, ilaña nyichima yawu yidi kwakulehi nanami. 7 Kudifukula kwadifukulañawu kudi ami kwamukunkulwayi, muloña ntañishilu yawu yashindamena hanshimbi jawantu.’ 8 Mwalekaña nshimbi jaNzambi nakukolela kuyaaku yawantu.”
9 Wayilejeli cheñi nindi: “Mwadiwulaña nshimbi jaNzambi mukubabala kulonda mutwalekihu kulondela yaaku yenu. 10 Chakutalilahu, Mosi wahosheli nindi, ‘Lemeshaku tata yeyi nimama yeyi,’ nawa ‘Muntu wejima wukumuhosha chatama* tata yindi hela mama yindi, amujahi.’ 11 Ilaña enu mwahoshaña nenu, ‘Neyi muntu yamuleja tata yindi hela mama yindi nindi: “Chuma chejima chinikweti chinateli kukukwasha eyi, hikorabani (dikwila nawu, hichawaana chakumwinka Nzambi),”’ 12 himwamwitejaña kumwilila tata yindi hela mama yindi chuma hela chimuku. 13 Dichi muloña wayaaku yenu yimunadizishi akwenu, mwaleñelaña izu daNzambi kwikala damukunkulwayi. Nawa mwelaña yuma yayivulu yidi neyi iyi.” 14 Kuhiñahu, watambikili cheñi izaza dawantu kwinza kwadiñayi nakuyileja nindi: “Ntiyililenu wejima wenu nawa ilukenu munatalishi mazu ami. 15 Kwosi chuma cheñilaña mukanwa kamuntu chamutamishañaku, chiña chuma chedikaña mukanwa dichamutamishaña.” 16 ——
17 Chashiyiliyi izaza dawantu nakwiñila mwitala, atumbanji twindi atachikili kumwihula hachakutalilahu chayilejeliyi. 18 Dichi wayilejeli nindi: “Komana ninenu muneluki wanyi muchatalisha ichi chakutalilahu neyi wena tahindi? Komana mweluka wanyi nenu kwosi chuma cheñilaña mukanwa kamuntu chinateli kumutamishaku? 19 Muloña hicheñilaña mumuchimaku, ilaña chayaña muchipumba chindi, kuhiñahu chiya mumusalanyi.”* Dichi washimwini nindi yakuda yejima yitooka. 20 Wahosheli cheñi nindi: “Chuma chedikaña mukanwa kamuntu dichamutamishaña. 21 Muloña mukachi kamuchima wamuntu, dimwafumaña yitoñojoka yatama, wuvumbi,* wukombi, kujahañana, 22 wujila, lwisu, yilwilu yatama, kudimbana, yilwilu yawukapwa nsonyi,* disu dalwisu, kasawuntu, kudinka wanta niwusupi. 23 Yuma yejimiyi yatama yafumaña mukachi kamuchima wamuntu nawa diyamutamishaña.”
24 Dichi wafumini kwenoku nakuya munkambi yaTira niSidoni. Kwenoku weñilili mwitala nawa hakeñeleña antu eluki nawu nashikiku, hela chochu antu elukili. 25 Hohenohu mumbanda wadiña namwanindi wamumbanda wadiña nandemoni, chatiyiliyi nindi Yesu nenzi, wenjili kwadiñayi nakudibuka heseki kunyendu yindi. 26 Owu mumbanda wadiña kaGiriki, wakumuza waSirofwenisa;* watwalekelihu nakumulembelela nindi yamufumishi mwanindi ndemoni. 27 Ilaña yena wamulejeli owu mumbanda nindi: “Lekaku ntahi anyana ekuti, muloña chachiwahi wanyi kunona yakuda yawanyana nakunatila anyana katuwa.” 28 Ilaña owu mumbanda wamwakwili Yesu nindi: “Omu tuhu diimu mwanta, ilaña anyana katuwa niwena adi mwishina damesa adaña nkuuku yakuyakuda* yawanyana anyanya.” 29 Chatiyiliyi awa mazu, wamulejeli owu mumbanda nindi: “Chiwuneli wunahoshi mwenomu, yaña; ndemoni namufumi dehi mwaneyi.” 30 Hohenohu wafuntili kwitala dindi, wawanini mwanindi wanyanya nakaami hakadidi nawa ndemoni namufumi.
31 Yesu chafuntiliyi kufuma kunkambi yaTira, wahitili munkambi yaSidoni nimunkambi yaDekapoli* nakushika kuKaluñalwiji kaÑaliliya. 32 Kwenoku* amuleteleli iyala wajika matu wakabakeneña hakuhosha nawa amulembeleli Yesu nawu yamunañiki owu iyala chikasa chindi. 33 Dichi wamutwalili owu iyala kwakankawindi kwakadi izaza dawantu. Kuhiñahu weñijili nyinu yindi mumatu anowu iyala, nawa Yesu chafwijiliyi mazeñi wamukwatili owu iyala hedimi. 34 Chataliliyi mwiwulu, wadishishimwini nankashi nakumwila owu iyala nindi: “Efwata,” dikwila nawu, “Jikukaku.” 35 Hohenohu matu indi ajikukili nawa walekeli kukabakana hakuhosha, watachikili kuhosha chiwahi. 36 Muloña wachumichi, wayikonkomweneni nindi bayi alejaku muntuku, ilaña wena elileña chaswejayi kuyikonkomwena, wena hiyakuswejelaku nikushimuna chuma chinayikaanishiyi. 37 Chalala ahayamini nankashi nakuhosha nawu: “Nakoñi yuma yejima chiwahi. Nakuleñela niajika matu kutachika kutiya niatumama kutachika kuhosha.”