Luka
18 Kuhiñahu, wayilejeli chakutalilahu chamwekesheleña nawu atela kulomba mpinji yejima chakadi kuleka, 2 wahosheli nindi: “Mumusumba wumu mwadiña nsompeshi wabulileña kumutiya Nzambi woma nawa halemesheleña muntuku. 3 Mumusumba wenowu mwadiña nimumbanda nfwila owu wayileña kudi iwu nsompeshi nakuhosha nindi, ‘Nsompeli muloña chiwahi kulonda niyiñi namuloña namukwetu wunakuntwala kuchota chanyiloña.’ 4 Hela chochu, hatachi hakeñeleña kumukwashaku, ilaña chimwahitili mpinji wadihoshesheli nindi, ‘Hela chakwila hinamutiyaña Nzambi woma hela kulemesha antuku, 5 ilaña chineli iwu mumbanda natwalekihu kunkabisha, nukuzata nañovu nimuyiñishi namuloña kulonda yaleki kwinza nakunzeyesha nachuma chinakukeñayi.’” 6 Kuhiñahu, Mwanta wahosheli nindi: “Tiyenu chahosheliyi nsompeshi hela chakwila hadiña waloñaku! 7 Komana chalala Nzambi hakayiñisha namuloña antu jindi atondewa amudililaña mwaana niwufuku hela chakwila wuchidi wayiwundilaku? 8 Inakuyileja nami, wakanyakashana kuyiyiñisha namuloña. Hela chochu, neyi Mwana kamuntu nashiki, komana wakawana ichi chikuhwelelu* hanu hamaseki?”
9 Wayilejeli cheñi antu adimweneña nawu aloña nawa amweneña akwawu nawu amukunkulwayi ichi chakutalilahu, nindi: 10 “Amayala ayedi ayili nakulomba mutembeli, wumu wadiña kaFwarisi, mukwawu wadiña mukwakutambula nyisonku. 11 KaFwarisi wemeni nakutachika kudilombela yomweni yumiyi nindi, ‘Eyi Nzambi, nakusakilili hamuloña wakwila hinekala neyi antu ejimaku. Hinekala neyi atupondu, abula kuloña, akwawujila, hela neyi iwu mukwakutambula nyisonkuku. 12 Nashakamaña kayedi mumulungu chakadi kuda; nahanaña yamwikumi yayuma yejima yinekalaña nayu.’ 13 Ilaña mukwakutambula nyisonku wemeneni hahalehi chanti, hakeñeleña nikufumbula mesu indi nakutalisha mwiwuluku, ilaña weteleña hantulu yindi nakuhosha nindi, ‘Eyi Nzambi, ntiyili luwi, ami mukwanshidi.’ 14 Inakuyileja nami, iwu iyala wayili kwitala dindi iku waloña chikupu kubadika ona kaFwarisi. Muloña muntu wejima waditoheshaña, akamukehesha, ilaña muntu wejima wadikeheshaña, akamutohesha.”
15 Dichi antu amuleteleleña anyanawu anyanya kulonda yayikwati, ilaña atumbanji chamweniwu chumichi, atachikili kuyizuwila. 16 Ilaña Yesu watambikili owu anyana anyanya nakuhosha nindi: “Yilekenu anyana anyanya enzi kudi ami, nawa bayi muyilekeshaku, muloña Wanta waNzambi wawantu adi neyi awa. 17 Inakuyileja chalala nami, muntu wejima wabulaña kutambula Wanta waNzambi neyi mwana wanyanya hamba keñilamuku.”
18 Muntu wumu wahadi anyuuli wamwihwili nindi: “Ntañishi Muwahi, chumanyi chinatela kwila kulonda nakekali nawumi wahaya nyaaka?” 19 Yesu wamwilili nindi: “Muloñadi chiwunanteneni neyi muwahi? Kwosi muntu muwahiku, chiña Nzambi hohu. 20 Weluka nshimbi jahosha nawu: ‘Bayi wila wujilaku, bayi wujaha muntuku, bayi wiyaku, bayi wushimuna wunsahu wakutwambaku, lemeshaku tata yeyi nimama yeyi.’” 21 Yena wahosheli nindi: “Oju nshimbi jejima najihembaña kufuma tuhu kuwansi wami.” 22 Yesu chachitiyiliyi, wamulejeli nindi, “Kudi chuma chikwawu chiwunabuli kwila: Landishaku yuma yejima yiwukweti nawa wuyipañili atuzweñi mali, kulonda wiikali neheta mwiwulu; kuhiñahu dinu winzi wiikali mukwakunlondela.” 23 Owu muntu chatiyiliyi awa mazu, waneñeli chikupu muloña wadiña waheta nankashi.
24 Yesu wamutalili owu iyala nakuhosha nindi: “Antu akweti mali chakayikalila kwiñila muWanta waNzambi! 25 Kafwampi, chaswayi ngameli kuhanuka mudisu dandoñu yakuchima nachu kubadika samaheta kwiñila muWanta waNzambi.” 26 Antu atiyili awa mazu ahosheli nawu: “Komana dinu hinyi anateli kwamwinawu?” 27 Yena wahosheli nindi: “Yuma yayikalilaña antu, kudi Nzambi hiyakalaku.” 28 Ilaña Petulu wahosheli nindi: “Talaña! Tunashiyi yuma yetu nakukulondela eyi.” 29 Yesu wayilejeli nindi: “Inakuyileja chalala nami, kwosi muntu wunashiyi itala hela ñodindi hela amanakwindi hela anvwali jindi hela anyanindi kukoola Wanta waNzambi 30 wakabula kutambwila yuma yayivulu nankashi makonu nawa nimunshakaminu yinakwinza,* wumi wahaya nyaaka.”
31 Kuhiñahu, watambikili apostolu 12 kwakankawawu nakuyileja nindi: “Tiyenu! Tunakukanduka nakuya kuYerusalema nawa yuma yejima yasonekeli atuprofwetu nawu yikamumwekena Mwana kamuntu, yikushikijewa.* 32 Chakutalilahu, akumuhana kudi antu akunyuza nawa wena akumusupisha, kumusawula nikumufwijila mazeñi. 33 Nawa hanyima yakumuvupola yikoti, akumujaha, ilaña hefuku damuchisatu wakasañuka.” 34 Hela chochu, hiyatiyishili mwalumbulukilili yuma yejimiyiku, muloña awa mazu ayijindiliwu, nawa hiyatiyishili mwatalishili yuma yahosheleñayiku.
35 Yesu chashikiliyi kwakwihi naYeriku, kwadiña iyala mputamesu washakamini kunsa yanjila nakulomba-lomba yuma. 36 Chelili watiyili izaza dawantu dahitileña, wayihwili kulonda amuleji chuma chamwekeneña. 37 Dichi amulejeli nawu: “Yesu wakuNazareta diyi wunakuhita!” 38 Chatiyiliyi chumichi, wabileleli nindi: “Yesu, Mwana kaDavidi, ntiyili luwi!” 39 Nawa antu atwamininiku atachikili kumuzuwila nakumuleja nawu yamwenihu, ilaña yena waswejeli kubilela nindi: “Mwana kaDavidi, ntiyili luwi!” 40 Kuhiñahu, Yesu wemeni nawa walejeli antu nindi amuleti kudi yena. Chaswininiyi kwakwihi, Yesu wamwihwili nindi: 41 “Wunakukeña nikwilili chumanyi?” Yena wahosheli nindi: “Mwanta, ntoneshi mesu ami kulonda nitachiki kumona cheñi.” 42 Dichi Yesu wamulejeli nindi: “Tonaku; chikuhwelelu cheyi chinakukoleshi.” 43 Hohenohu watachikili kumona cheñi nawa watachikili kumulondela Yesu iku nakumulemesha Nzambi. Nawa antu ejima chamweniwu chumichi, atachikili kumuhameka Nzambi.