Yuda
1 Ami Yuda, nduñu yaYesu Kristu, ilaña mana kwaYakoba, inakusonekela enu atondewa akeñawu kudi Nzambi Tata, enu ahembelawu Yesu Kristu:
2 Luwi, kuwunda nikukeña jiyivulili enu.
3 Enu akwetu itwakeña, hela chakwila nafwilileña chikupu kuyisonekela enu kutalisha hawamwinu wutukweti wejima wetu, ilaña ichi namoni nami chidi chiwahi ami kuyisonekela nakuyikonkomwena enu kulonda mulwili chikupu chikuhwelelu chayinkeliwu akwakujila kamu hohu. 4 Chuma chinaleteshi niyisonekeli enu, chidi chakwila nawu antu amakwawu anadiñiji mukachi kenu, owu atoñweleliwu dehi kushankulu muNsona nawu akayisompesha naniwu wunsompeshi; hiyantu abulaña kumwakama Nzambi abalumunaña luwi lwasweja lwaNzambi yetu kwikala mwakuleyela kulonda akoñeña yilwilu yawukapwa nsonyi,* nawa kuhitila muyilwilu, amukaanaña nkaaka yetu wumu hohu nawa Mwanta, Yesu Kristu.
5 Hela chakwila mweluka dehi chikupu chumichi, inakukeña kuyanukishaku nami Yehova, chelili naamwini dehi antu kufuma mwituña daEjipitu, kuhiñahu wajilumwini antu ejima abulili chikuhwelelu. 6 Nawa añelu abulili kuhemba yifulu yadiñawu nayu nawa adiwili maluña awu amawahi akushakamamu, wayikasa mumaleñi* ahaya nyaaka nakuyihembela mumwidima wasweja chikupu kulonda akayisompeshi hefuku deneni. 7 Neyi chochichadiña muSodoma naGomora ninyisumba yayinyeñumukili, niyena yadiñijili muyilwilu yawuvumbi* chikupu nikufwila yuma yafwilaña mujimba yabula kwitejawu; ayibabesheli kuhitila mukuyocha mukesi kahaya nyaaka kulonda ekali akutalilahu kudi etu.
8 Hela chochu, awa antu anakulota niyilota, anakutamisha Its a spare lib coming from this very devil.
mujimba, anakudiwula akwawuswa nikuyihosha mazu akasawuntu antu alemeshawu. 9 Ilaña hampinji yelili Mikeli mukulumpi wawañelu yaambokelimu naDiyabolu nikutaadeka hamujimba waMosi, yena hakeñeli nindi yamusompeshi Diyabolu nikumuhosha mazu akasawuntuku, ilaña wamwilili nindi: “Yehova yakuzuwili.” 10 Ilaña awa antu anakuhosha mazu akasawuntu hayuma yejima yabula kwilukawu muyatalisha. Adi neyi anyama abulaña kutoñojoka nawa muyuma yejima yelañawu, elaña yuma neyi anyama, nawa yumiyi diyinakuyikisañana.
11 Chinayitamini nankashi awa antu, muloña anakulondela njila yaKena nawa anatemukili muyilwilu yatama yaBalami muloña wakufwila wufwetu, nawa analondeli nhoshelu yakudikaña yaKora, ichi chuma chikayikojeja akajilumuki neyi chajilumukiliyi yena. 12 Awa antu adi neyi malola aswama kwishina damenji, anakuda hamu nanenu yawija yenu yakukeña, hiyatubiña adidiishaña awenawu chakadi woma; adi neyi mavu akadi nvula anakuleloka nampepela; adi neyi nyitondu yabulaña kusoña nyikabu mumpinji yakusoñelamu nyikabu yinafwi kayedi* nawa yinabwitiliwu kumu nanyiji yayu; 13 adi neyi mankanda azuwa ahakaluñalwiji atupulaña kafulolu kakuyitiyisha nsonyi; adi neyi tutumbwa twahitañanaña hohu, ayihembela mwidima wasweja chikupu mwakashakamañawu haya nyaaka.
14 Enoki, muntu wamuchitanu nachiyedi mundonda kufuma hadi Adama, niyena waprofweteli kutalisha hadi awa antu chahosheliyi nindi: “Tiyenu! Yehova wenjili namazaza* awañelu jindi ajila 15 nakusompesha nikuhiisha antu ejima abulaña kumwakama Nzambi, muloña wanyidimu yawu yatama yakoñeleñawu munjila yakubula kumwakama Nzambi, niyuma yejima yakuhayamisha yatama yamuhosheleñawu kudi akwanshidi abulaña kumwakama Nzambi.”
16 Awa antu hiyakwakunyinyinta, hiyakwakutooba kutalisha hayuma yawu yamuchihandilu, hiyakwakulondela kufwila kwawu aweni, nawa tunwa twawu twahoshaña mazu amaneni akudisamba, iku anakudimbeka antu namazu akulambisha kulonda wena ahetelimu.
17 Ilaña enu akwetu itwakeña, mwanukeña mazu ahosheliwu dehi* apostolu aMwanta wetu Yesu Kristu, 18 ayilejeleñawu enu nawu: “Mumpinji yakukuminina mwakenza akwakuseha, akalondelaña kufwila kwawu kwakufwila yuma yabulaña kumwekesha nawu amwakama Nzambi.” 19 Awa antu diwu aletaña chaambu, antu akweti yilwilu yawunyama,* hiyasha maana kuyuma yakuspirituku.* 20 Ilaña enu akwetu itwakeña, dituñenuña enu aweni muchikuhwelelu chenu chajila chikupu nikulomba naspiritu yajila, 21 kulonda mushakameña mukukeña kwaNzambi hampinji yimunakutalila luwi lwaMwanta wetu Yesu Kristu lwalombolaña kuwumi wahaya nyaaka. 22 Cheñi nawa, twalekenuhu kutiyila luwi antu amu ajinokaña; 23 yamwinenu kuhitila mukuyihukula kufuma mukesi. Ilaña twalekenuhu kutiyila luwi antu amakwawu, hela chochu, mwileña mwenimu nawoma, hampinji yoyimu nikuhela chakuvwala chawu chinatamishiwu dehi nanyidimu yawu yatama.*
24 Ilaña kudi yena wunatweshi kuyikiña enu kulonda mubuli kuhukana nawa wunatweshi kuyikwasha enu kwikala akadi ihuji kumesu akulema kwindi namuzañalu wasweja, 25 kudi Nzambi wumu hohu Chamwinu chetu kuhitila mudi Yesu Kristu Mwanta wetu, kwikaleña kulema, wukeleñi, ñovu niwuswa kufuma kuyaaka yakunyima yejima, nihayinu mpinji nihaya nyaaka yejima. Ameni.