Kushindulula Watachi
12 Awa diwu amayala enjili kudi Davidi kuZikilagi+ habulileñayi kwenda nakukasunuka muloña waSawulu+ mwana kaKishi, nawa awa amayala adiña hakachi kawakakuzuña njita añovu amukwashili Davidi munjita.+ 2 Adimanyekeli mata anyikunji nawa azatishileña chikasa chawu chachidiilu nichachimunswa+ hakwasa malola namwonji wakwasa nachu+ hela hakwasa nyivu nawuta wamukunji. Awa amayala adiña amana kwaSawulu, afumini kumuchidi waBenjamini.+ 3 Mukulumpi* wadiña Ahizeyeri, halondela niYowashi, ejima wawu adiña anyana awamayala avweliwu kudi Shemeya mukaGibeyati;+ Yeziyeli niPeleti anyana kaAzimaveti+ awamayala, Beraka, Yehu mwini Anatoti, 4 Ishimaya mwini Gibeyoni,+ mushidika wañovu wahakachi kawakulumpi 30+ nawa mukulumpi wawantu 30; niYeremiya, Yahaziyeli, Yohanani, Yozabadi mukaGederati, 5 Eluzayi, Yerimoti, Beyaliya, Shemariya, Shefatiya mukaHafiri, 6 Elikana, Ishaya, Azareli, Yowezeri niYashobeyami, aKora;+ 7 niYowela niZebadiya anyana kaYerohami wakuGedori.
8 AGadi amakwawu ayili kukabadi kaDavidi kwiluña dakiñewa mwisaña;+ adiña akakuzuña njita añovu, amashidika adizishawu kuzuña njita nawa adiña eluka chikupu kuzatisha nkebu jamaneni nimayoña, amwekeneña kumesu neyi nyitupa nawa atemukileña neyi tupaala tudi hajimpidi. 9 Ezeri diyi wadiña mukulumpi,* wamuchiyedi Obadiya, wamuchisatu Eliyabi, 10 wamuchiwana Mishimana, wamuchitanu Yeremiya, 11 wamu 6 Atayi, wamu 7 Eliyeli, 12 wamu 8 Yohanani, wamu 9 Elizabadi, 13 wamu 10 Yeremiya, wamu 11 Makibanayi. 14 Awa amayala afumini mudi aGadi,+ akulumpi* janjita. Wabula ñovu nankashi wazuñileña nawantu 100, nawa wañovu nankashi wazuñileña nawantu 1,000.+ 15 Awa diwu amayala azambukili Yodani mukakweji katachi haswejeliyi kwinzala kubadika nikuyikumu, nawa antu ejima ashakamineña mumaluña amunkulu, ayihañilili kumusela nikumujika.
16 Amayala amakwawu akukabadi kaBenjamini niYuda niwena enjili kudi Davidi kwiluña dindi dakiñewa.+ 17 Kufumahu, Davidi wedikili nakuya kudi wena nawa wayilili nindi: “Neyi munenzi mukuwunda kudi ami kulonda munkwashi, muchima wami wukudinuña hamu nanenu. Ilaña neyi munenzi nakunfukejela kudi akankunyi nami henohu makasa ami hiyanakoñihu chuma chatamaku, Nzambi yawankakulula jetu amoni chumichi nawa asompi.”+ 18 Kuhiñahu, spiritu yenjili hadi* Amasayi+ mukulumpi* wawantu 30, nawa wahosheli nindi:
“Eyi Davidi, etu tudi antu jeyi nawa tudi hamu naneyi, eyi mwana kaYesi.+
Kuwunda, kuwunda kwiikali naneyi nawa kuwunda kwiikali namuntu wunakukukwasha,
Muloña Nzambi yeyi nakukukwasha.”+
Dichi Davidi wayitambwilili nawa wayitondeli kulonda ekali hakachi kawakulumpi jamazanvu amashidika.
19 Amayala amakwawu akumuchidi waManasi niwena afumini kunjita yaSawulu nakuya kudi Davidi henjiliyi hamu nawaFilisitinu nakuzuña naSawulu; ilaña aFilisitinu wayikwashiliku wanyi, muloña hanyima yakuhanjeka, anyanta awaFilisitinu+ amuhañili nakuhosha nawu: “Wakamba kafunta kudi nkaaka yindi Sawulu nawa wumi wetu wunateli kwikala muwubanji.”+ 20 Chayiliyi kuZikilagi,+ awa amayala diwu enjili kudi yena kufuma kumuchidi waManasi: Adinahi, Yozabadi, Yediyayeli, Mikayeli, Yozabadi, Elihu niZiletayi, anlomboli* amakombakaji akumuchidi waManasi.+ 21 Amukwashiliku Davidi kuzuña nachendu chawatupondu, muloña awa amayala ejima adiña ayilobu, amayala ahamuka+ nawa ekalili akulumpi anjita. 22 Hefuku-hefuku antu atwalekelihu kwinza kudi Davidi+ nakumukwasha kushika nichekaliliwu izaza deneni danjita neyi chekala izaza danjita yaNzambi.+
23 Iku dikuvula kwawakulumpi anowu adimanyekeli kuzuña njita, owu enjili kudi Davidi kuHebironi+ nakutambula wanta waSawulu nakuwuhana kudi yena kwesekeja nalushimbi lwaYehova.+ 24 Amayala akumuchidi waYuda asendeli nkebu jamaneni nimayoña, adiña 6,800, adimanyeka kuzuña njita. 25 Amayala aSimiyoni, ayilobu nawa amayala anjita ahamuka, adiña 7,100.
26 Amayala aLevi, adiña 4,600. 27 Yehoyada+ diyi wadiña nlomboli yawanyana kaAroni+ awamayala nawa wadiña nawantu 3,700, 28 kushilahu niZadoki,+ chilobu nawa kansi weyala wahamuka, hamu niakulumpi 22 afumini kunyitaña yakukatata yindi.
29 Amayala eni Benjamini, amana kwaSawulu+ adiña 3,000. Kunyima, antu amavulu nankashi hadi awa ahembeleña yuma yamwitala daSawulu. 30 Amayala aEfuremu, adiña 20,800, ayilobu nawa amayala ahamuka ayili mpuhu hakachi kanyitaña yawu.
31 Amayala akumuchidi wachibalu waManasi, adiña 18,000, antu atondeliwu kulonda enzi nakumwilisha Davidi kwikala mwanta. 32 Amayala akumuchidi waIsakari, elukili chiwahi nsañu jampinji niyuma yateleleli kukoña aIsarela, adiña akulumpi 200 anyikala yawu nawa adiña nakulombola niamanakwawu ejima. 33 Amayala aZebuluni, adiña 50,000 ashikililimu kuzata mudimu wawushidika nawa aditanjikili kulonda azuñi njita iku adi nayitwa yanjita yejima, awa ejima adibombeleña naDavidi nakashinshi kakeni.* 34 Amayala aNafitali, adiña akulumpi 1,000, nawa awa amayala adiña nawantu 37,000 adiña nankebu jamaneni nimayoña. 35 Amayala aDani, owu aditanjikili kulonda azuñi njita, adiña 28,600. 36 Nawa amayala aAsheri, owu ateleleli kuzata mudimu wawushidika nakuditanjika kulonda azuñi njita, adiña 40,000.
37 Akwishinadi daYodani,+ mudi aRubeni, aGadi niakumuchidi wachibalu waManasi, amashidika adiña nayitwa yanjita yanyichidi yejima, adiña 120,000. 38 Awa ejima adiña amayala eluka kuzuña njita, aditanjikili hamu kunjita; enjili namuchima wumu kuHebironi kulonda amwilishi Davidi kwikala mwanta wawaIsarela ejima. Nawa aIsarela ejima anashali adinuñili hamu nakufwila* kumwilisha Davidi kwikala mwanta.+ 39 Nawa ashakamini kwenoku naDavidi mafuku asatu, iku anakuda nikunwa, muloña amanakwawu adiña ayiloñeshela dehi. 40 Nawa antu adiña kukamwihi nawena, kushika tuhu nikuIsakari, kuZebuluni nikuNafitali, aleteleña yakuda hayimbuulu, hajingameli, hayingongavalu nihañombi, aleteli wuña walembuluka, mankendi atowala akutuña nanyikaabu yayikuyu yakukamuna niakutuña nanyikaabu yanyivinyu yooma, vinyu, manji, añombi nianyikoku amavulu nankashi, muloña muIsarela mwadiña kuzañalala.