Isaya
17 Mazu akumusompesha Damakasa:+
“Tiyenu! Damakasa hakekala cheñi musumbaku,
Nawa wakekala mulumba wayuma yinajilumuki.+
2 Nyisumba yaAroweri+ yakashala mahembi;
Yakekala maluña mwakukaama nyikanka yayimuna
Chakadi wakuyitiyisha woma.
3 Nyisumba yamuEfuremu yakiñewa yakajiya,+
Niwanta wamuDamakasa wakajiya;+
Nawa kulema kwawantu akashala muSiriya
Kwakekala neyi kulema kwawaIsarela,”* dimunahoshiyi Yehova wamazaza.
4 “Hanodu ifuku kulema kwaYakoba kwakamana,
Nawa mujimba windi weneni* wakakosa.
5 Chakekala neyi mukakwañula chañulañayi mbutu yemana
Nawa chikasa chindi chañulaña nyitu yambutu,
Neyi chanonojolañayi muntu mbutu muChinekineki chawaRefa.+
6 Kwakashala mbutu yakunonojola hohu,
Neyi chashalaña mutondu wanyiolivi neyi anawukukumuni:*
Kumutayi wawulehi nankashi kwashalaña hohu nyikaabu yaha yiyedi hela yisatu,
Kunyitayi yindi yasoñaña kwashalaña hohu nyikaabu yiwana hela yitanu,”+ dimunahoshiyi Yehova Nzambi yaIsarela.
7 Hanodu ifuku muntu wakatala kudi Ntuñi yindi, nawa mesu indi akashinshika kudi Wajila waIsarela. 8 Hakatala kutumeña+ twakutuña namakasa indiku;+ nawa hakashinshika yuma yinatuñi nyinu yindi hela yishimi yajila* hela jakutentekahu insensiku.
9 Hanodu ifuku nyisumba yindi yakiñewa yakekala neyi iluña dinashali mahembi mwisaña,+
Neyi mutayi wunayishiliwu aIsarela chisayikila;
Yakashala kwamahembi hohu.
Dichinakuletesha wutumbeña nyitondu yayiwahi
Nawa wunakuyitumba kuzatisha nyitayi yamuntu wacheñi.*
11 Namwaana wakolekaña chiwahi iha deyi,
Nantetemena waleteshaña mbutu jeyi kumena,
Ilaña kwaañula kwakamana hefuku danyisoñu niyikatu yakadi kuuka.+
12 Tiyenu! Kudi ipumba dawantu amavulu ashiyashana,
Dinakutiyakana neyi chavumaña menji akaluñalwiji!
Kudi ipumba danyuza,
Dinakutiyakana neyi mpola yamenji akweti mpupa!
13 Nyuza yakaleta ipumba neyi mpola yamenji amavulu.
Nzambi wakayizuwila, nawa akatemukila kwakulehi,
Akayihaña neyi muzuñu wakujimpidi wunakulelulawu kudi mpepela,
Neyi izandazanda anakulelulawu kudi mpepela yeneni.
14 Namelela kwatiyishaña woma.
Henohu kanda kwili ntetemena, ajimañanaña.
Idi didu iseka dawantu anakutubuwa
Nawa dichinjikijilu chawantu anakutupuupa.