Yoshuwa
11 Yabini mwanta wakuHazori chatiyiliyi tuhu chumichi, watemesheli mazu kudi Yobabi mwanta wakuMadoni+ nikudi mwanta Shimironi, mwanta wakuAkishafi,+ 2 nikudi anyanta adiña kukabeta kakuchimunswa keluña damapidi, adiña muyana* kukabeta kakuchidiilu kaKinereti, adiña kuShefela nikunyikunkumuki yaDori+ kumujika, 3 watemesheli mazu nikudi aKenani+ kumusela nikumujika, aAmori,+ aHiti, aPerizi, aYebusi mwiluña damapidi niaHivi+ mwishina daHerimoni+ mwituña daMizipa. 4 Dichi enjili namashidika awu ejima, adiña amavulu nankashi neyi wusekulula kuchikumu chakaluñalwiji, hamu natuwalu twatuvulu nankashi nimakalu anjita. 5 Awa anyanta ejima aditejeli kubulakana hamu, enjili nawa ateekeleli hamu kumenji aMeromi kulonda azuñi nawaIsarela.
6 Hohenohu Yehova wamulejeli Yoshuwa nindi: “Bayi wuyitiya womaku,+ muloña kumadiki nayoyinu mpinji, nakayihana wejima wawu kudi aIsarela kulonda akayijahi. Tuwalu twawu watela kutuketola nyijila yakunyendu yatu+ nawa makalu awu watela kuyocha mukesi.” 7 Yoshuwa hamu nawamayala ejima akakuzuña njita ayili nakuyilukuka awa antu chakukasumwisha kumenji aMeromi. 8 Yehova wayihanini mumakasa awaIsarela+ nawa ayishindili nikuyikumpisha nakushika kuSidoni Muneni+ nikuMiserefwoti Mayimi+ nikuChinekineki chaMizipi kumusela, nawa ayitapili chakwila kwosi muntu niwumu wapulukiliku.+ 9 Dichi Yoshuwa wayilili kwesekeja nachamulejeliwu kudi Yehova; waketoleli nyijila yakunyendu yatuwalu twawu nawa wocheli makalu awu mukesi.+
10 Kubombelahu, Yoshuwa wabalumukili nakuya nakulukuka Hazori nikutapa mwanta wawu nampoku yakabali,+ muloña kunyima Hazori wadiña musumba weneni kubadika awa mawanta ejima. 11 Atapili antu ejima* adiñamu nampoku yakabali, nakuyijilumuna.+ Kwosi chuma chonaña chashalilihuku.+ Kuhiñahu, wocheli musumba waHazori nakesi. 12 Yoshuwa walukukili nyisumba yejima yanawa anyanta nawa washindili anyanta jawu ejima nampoku yakabali.+ Wayijilumwini+ neyi chahosheliyi Mosi kambuña aYehova. 13 Hela chochu, aIsarela hiyocheli nyisumba yejima yadiña hazandukaku, chiña hohu Hazori; dimusumba hohu wocheliyi Yoshuwa. 14 Yuma yejima yamuniyi nyisumba niyimuna, ayipuupili kudi aIsarela.+ Ilaña atapili antu ejima nampoku yakabali sampu nichayijilumwiniwu ejima.+ Hiyapulwishilihu chuma hela chimu chonañaku.+ 15 Neyi chamulejeliyi Yehova kambuñindi Mosi, niMosi niyena dichamulejeliyi Yoshuwa+ nawa Yoshuwa dicheliliyi. Hashilihu chuma hela chimu chabulili kukoñayi hayuma yejima yamulejeliwu Mosi kudi Yehovaku.+
16 Yoshuwa wemikili mushindu idi ituña dejima, iluña damapidi, Negebi+ yejima, ituña dejima daGosheni, Shefela,+ Araba+ niiluña damapidi daIsarela niiluña damapidi damwakunkumuka, 17 kufuma kuMpidi yaHalaki yashika kuSeyiri ndo-o nikuBayali Gadi+ muChinekineki chaLebanoni mwishina daMpidi yaHerimoni,+ walukukili nianyanta jawu ejima nawa wayishindili nakuyijaha. 18 Yoshuwa wazuñili njita nanawa anyanta ejima hampinji yayilehi. 19 Hikwadiñahu musumba watiyañeni chitiyañenu chakuwunda nawaIsarelaku, chiña hohu aHivi ashakamineña muGibeyoni.+ Ilaña nyisumba yejima ayimikili mushindu nanjita.+ 20 Yehova diyi wetejeli nyichima yawu kuchinchika+ kulonda azuñi njita nawaIsarela nakuyijilumuna chakadi kuyitiyila luwi.+ Awa antu ateleleli kuyijilumuna neyi chamulejeliwu Mosi kudi Yehova.+
21 Hanoyu mpinji, Yoshuwa wayijiyishili aAnaki+ ejima mwiluña damapidi, muHebironi, muDebiri, muAnabi nimwiluña damapidi daYuda nimwiluña dejima damapidi daIsarela. Yoshuwa wayijilumwini ninyisumba yawu.+ 22 Mwituña dawaIsarela himwashalilihu mwini Anaki hela wumuku; ashalili+ hohu muGaza,+ muGati+ nimuAshidodi.+ 23 Dichi Yoshuwa watachikili kuyuula ituña dejima neyi chamukaniniwu Mosi+ kudi Yehova. Kuhiñahu, Yoshuwa wayinkeli aIsarela idi ituña kulonda diikali wuswana wawu kwesekeja nanyichidi yawu nimaseka awu.+ Ituña adanzañeni hakachi kanyichidi. Nawa mwituña himwekalilihu cheñi njitaku.+